ភ្នំពេញ : ស្ថិតនៅលើវិថីប៉ាស្ទ័រ ហានី កាហ្វេមានការតុបតែងលក្ខណៈអាស៊ីកាត់អឺរ៉ុប។ ដោយគ្រាន់តែចូលទៅដល់បរិវេណខាងក្នុងភ្លាម យើងនឹងឃើញអាងទឹកពណ៌ខៀវស្រងាត់នៅចំកណ្ដាលហាង ដែលហ៊ុមព័ទ្ធទៅដោយរុក្ខជាតិបៃតង និងដើមផ្កានានា។
តុអាហារតូចៗត្រូវបានរៀបចំនៅជុំវិញអាងទឹក ដោយជ្រកក្រោមម្លប់ឆត្រពណ៌សគួរជាទីមនោរម្យក្នុងការក្រេបភេសជ្ជៈ និងទទួលទានអាហារ។
ថ្វីដ្បិតតែមានស្លាកយីហោថាជាហាងកាហ្វេក្ដី ប៉ុន្តែ ហានី កាហ្វេ មានបម្រើសេវាម្ហូបអាហារជាច្រើនមុខមិនចាញ់ភោជនីយដ្ឋានទូទៅនោះទេ។
មុខម្ហូបដែលមានតុល្យភាពបន្លែ និងសាច់ហើយមើលទៅគួរឲ្យទាក់ទាញនោះគឺ «សាច់គោរុំទឹកជ្រលក់ឈីស» ដែលយើងទទួលទានជាមួយនឹងសាលាដនិងប៉េងប៉ោះ។ នៅខាងក្នុងស្នូលដុំសាច់គោនោះ គឺជាបន្លែត្រសក់ ដែលរសជាតិរបស់វាត្រូវគ្នានឹងទឹកជ្រលក់ឈីសដ៏ឈ្ងុយ។ ដោយសារតែមានបន្លែច្រើនអមមកជាមួយ ដូច្នេះអាហារនេះមិនត្រឹមតែទទួលទានមិនរងាន់ទេ វាថែមទាំងជាអាហារដ៏ល្អសម្រាប់សុខភាព និងសម្ផស្សថែមទៀតផង។
សាច់គោរុំស្រូបទឹកជ្រលក់ឈីសនេះមានតម្លៃប្រមាណ៥ដុល្លារ នៅ ហានី កាហ្វេ ស្ថិតលើផ្លូវលេខ ៥១ វិថីប៉ាស្ទ័រ សង្កាត់ចតុមុខ ខណ្ឌដូនពេញ។ ទាក់ទងទូរស័ព្ទ ០១១ ៣៣ ៧៣ ២៧៕
