The Phnom Penh Post Search

Search form

Logo of Phnom Penh Post newspaper Phnom Penh Post - សាច់​ ក ជ្រូក ត្រួយ​ខាត់ណា​ពី The Art Restaurant




សាច់​ ក ជ្រូក ត្រួយ​ខាត់ណា​ពី The Art Restaurant

Content image - Phnom Penh Post
សាច់​ ក ជ្រូក ស្រួយ​ខ្ញោក ជាមួយ​ត្រួយ​ខាត់ណា​ខ្ចី​ល្វក់​។ ឈឹម ស្រីនាង

សាច់​ ក ជ្រូក ត្រួយ​ខាត់ណា​ពី The Art Restaurant

ភ្នំពេញ: ស្ថិតនៅ​ផ្លូវ ១០៦ ជិត​ផ្សារ​រាត្រី ភោជនីយដ្ឋាន​ The Art Restaurant ជា​ហាង​រចនា​ឡើង​បែប​សិល្បៈ​សម័យ​ទំនើប​ ​ដោយ​យក​ស្លាបព្រា​ជាច្រើន​មក​តម្រៀប​គ្នា​ចេញ​ជា​រូបភាព​មួយ​ដែល​មើលទៅ​ទាក់ភ្នែក​ម្យ៉ាង បំភ្លឺ​ដោយ​អំពូល​ភ្លើង​ពណ៌​លឿង​ស្រទន់​មាន​រំយោល​ស្អាត។

តុ​កៅអី​ឈើ​បួន​ជ្រុង​អាច​អង្គុយ​បាន​គ្នា ១០ នាក់ និង​តុ​កៅអី​ឈុត​តូច​សម្រាប់គ្នា​ពីរនាក់​ ឬក៏​បួននាក់​អង្គុយ​ញុំា​អាហារ​និង​ជជែក​គ្នា​ផងដែរ។

The Art Restaurant គឺជា​ហាង​ដែល​បម្រើ​នៅមុខ​ម្ហូប​បែប​ថៃ​រសជាតិ​ដើម ដោយ​ចុងភៅ​ជនជាតិ​ថៃ​ពិតប្រាកដ សម្រាប់​អ្នក​ដែល​ចង់​ភ្លក្សនូវរសជាតិ​បែបថៃ ហើយ​ក៏មាន​ម្ហូប​ខ្មែរ​ខ្លះ​ផងដែរ។

លោក​ ឡុង លី​ណាំង​ ម្ចាស់​ហាង​ The Art Restaurant អាយុ ២៤ ឆ្នាំ វ័យក្មេង​រូបនេះ​បាន​និយាយ​ទាំង​ទឹកមុខ​រីករាយ​ថា៖ «ខ្ញុំ​សម្រេច​បើកហាង​នេះ​ឡើង​គឺ​សម្រាប់​តម្រូវ​ទៅ​ភ្ញៀវ​ជាតិ​ និង​អន្ដរជាតិ​ ដែល​គាត់ចង់​ញ៉ាំ​នូវ​ម្ហូប​ថៃ ហើយមិនចាំបាច់​ជិះ​យន្ដហោះ​ទៅ​ញ៉ាំ​ដល់​ក្រុង​បាងកក​ទៀត​ទេ គឺ​នៅទីនេះ​មាន​ម្ហូប​ថៃ​ជាច្រើន​មុខ ​​ដែល​ភ្ញៀវ​ខ្មែរ​យើង​ភាគ​ច្រើន​គាត់​ចូលចិត្ត​ញ៉ាំពេលដែល​គាត់​ទៅលេង​នៅ​ស្រុក ថៃ ​ដូចជា ​គុយទាវ​ជើង​មាន់ គុយទាវ​តុម​យ៉ាំ បុកល្ហុង​បំពង បាយ​ឆាកា​ពិ ផាត់ថៃ ខម៉ូយ៉ាង​ត្រួយ​ខាត់ណា ឡាប ស្លាបមាន់​បំពងគល់​ស្លឹកគ្រៃ​បែប​ថៃ ត្រី​បំព​ងស្រូបទឹក​អម្ពិល ​និងម្ហូប​ថៃ​ជាច្រើន​មុខ​ទៀត។

ចំពោះ​មុខម្ហូប ​ខ​ម៉ូ​យ៉ាង​ត្រួយ​ខាត់ណា​ខ្ចី​វិញ​គឺជាមុខម្ហូប​មួយ​ដែលមាន​រសជាតិ​ប្លែក​ឆ្ងាញ់​ដោយសារ​តែ​គេ​យកសាច់ ក ជ្រូក​ទៅ​ប្រឡាក់​ជាមួយ​គ្រឿងផ្សំ​ហើយ​ផ្អាប់​ទុក​មួយយប់​ទើប​យកមក​អាំង។

រីឯ​ត្រួយ​ខាត់​ណា​ខ្ចី​ល្វក់​ត្រូវ​ស្រុសរក្សា​ពណ៌​ឲ្យ​បៃតង​ល្អ ហើយ​រៀប​ជាមួយ​សាច់ មុន​នឹង​ទឹកជ្រលក់​រសជាតិ​ជូរ​ហឹរ​ផ្អែម។

ចំពោះ​សាច់​ ក ​ជ្រូក​ដែល​អាំង​នោះ​នៅពេល​ដែល​យើងទទួល​ទាន​​គឺ​វា​ស្រួយ​ខ្ញោក​តែ​ម្ដង។ ​

រឹតតែ​ឆ្ងាញ់​នោះ​គឺ​នៅ​ពេលដែល​ទំពាខាត់ណា​ខ្ចី​បន្ថែម​គឺរឹតតែ​ធ្វើ​ឲ្យ​រសជាតិ​សាច់​ស្រួយខ្ញោក​លាយ​បន្លែឆ្ងាញ់​ជាងមុន៕

អត្ថបទគួរចាប់អារម្មណ៍