ភ្នំពេញៈ ផ្ដើមចេញពីបទពិសោធកែច្នៃសាលាដ និងទឹកផ្លែឈើជួយសម្រកទម្ងន់ស្វាមីបានជោគជ័យអ្នកនាង លីម ស៊ូលីន ម្ចាស់ហាង JLC Salad បានផ្ដួចផ្ដើមគំនិតបើកហាងអាហារសុខភាព និងជំរុញប្រជាជនខ្មែរឲ្យងាកមករករបបអាហារសម្បូរបន្លែ ផ្លែឈើ ដើម្បីជួយសម្អាតជាតិពុល រក្សាទម្ងន់ ថែសម្រស់ ព្រមទាំងសុខភាពទូទៅផងដែរ។
អ្នកនាង លីម ស៊ូលីន មានវ័យ ២៦ ឆ្នាំបានរៀបរាប់ថា៖ «ខ្ញុំជាអ្នកចូលចិត្តធ្វើម្ហូបខ្ញុំក៏ជា YouTuber ដែរពីមុនខ្ញុំថតវីដេអូធ្វើម្ហូប post ច្រើន view ឡើងដល់ ១ លាន ទៅ ១,៥ លាន ហើយថ្ងៃមួយស្វាមីខ្ញុំគាត់ចង់ស្រកទម្ងន់ រួចខ្ញុំក៏រកវិធីច្នៃធ្វើសាលាដឲ្យគាត់ញ៉ាំស្រួល។ គាត់អត់ចូលចិត្តក៏គាត់ចាប់ផ្តើមញ៉ាំបានដែរ។ ប្រមាណជា ១ ខែគាត់ហាត់ប្រាណផង ញ៉ាំសាលាដ និងទឹកផ្លែឈើជាប់ផង។ គាត់ស្រកអស់ ៦ គីឡូនៅសល់ ៧៦ គីឡូពីមុន ៨១ គីឡូ ទៅ ៨២ គីឡូ។ អ៊ីចឹងហើយបានជាខ្ញុំបើកហាងនេះឡើង»។
JLC ដែលជាឈ្មោះហាងផ្ដើមពីឈ្មោះគូស្វាមីភរិយាម្ចាស់ហាង JOHN LIN COOKING ដែលបម្រើទឹកផ្លែឈើស្រស់គាបចេញពីម៉ាស៊ីនច្រកដបយ៉ាងស្អាត និងសាលាដចម្រុះពណ៌។
ម្ចាស់ហាងរូបនេះបានឲ្យដឹងទៀតថា៖ «សព្វថ្ងៃប្រជាជនយើងគាត់ច្រើននិយមហូបអាហារបំពង អាហារសម្បូរដោយខ្លាញ់ដូចជាសាច់ច្រើន ជាដើម ហើយភាគច្រើនពួកគាត់ក៏មិនចូលចិត្តហូបបន្លែដែរ។ ខ្ញុំគ្រាន់តែចង់បន្ថែមថា ពួកគាត់គួរតែចាប់ផ្តើមស្វែងយល់ពីតម្លៃនៃសុខភាពខ្លួនឯង គាត់អាចញ៉ាំអាហារដែលគាត់ចូលចិត្តបានតែមុននឹងទទួលទាន គាត់គួរគិតថាម្ហូបហ្នឹង វាផ្តល់អ្វីខ្លះដល់រាងកាយ វានឹងថែមស្ករ អាស៊ីត ខ្លាញ់ ឬវីតាមីន»។
បើកដំណើរការហាងរយៈពេលជិត ១ ឆ្នាំដោយមានចំនួនការកុម្ម៉ង់ប្រចាំថ្ងៃប្រមាណ ៦០ ប្រអប់ JLC មានបម្រើនូវសាលាដផ្ទាប់សាច់ជាច្រើនរសជាតិតម្លៃពី ៣ ទៅ ៤,៥ ដុល្លារ។
ជម្រើសទឹកផ្លែឈើគាបលាយបន្លែមានតម្លៃ ១ ម៉ឺនរៀលក្នុង ១ ដប។
បន្លែដែលយកមកប្រើប្រាស់នៅក្នុងហាងវិញគឺនាំចូលពីសួនធម្មជាតិ រីឯសាច់មកពីកសិដ្ឋានក្នុងស្រុក។
ម្ចាស់ហាងរាងខ្ពស់ស្រឡះរូបនេះក៏បានផ្តាំទៅអ្នកដែលមិនសូវនិយមញ៉ាំបន្លែផ្លែឈើថា៖ «សាលាដ និងបន្លែមិនចាំបាច់ទាល់តែទៅទិញនៅហាងថ្លៃ ឬឲ្យគេធ្វើឲ្យទេ។ គាត់អាចញ៉ាំបានគ្រប់ពេលដោយខ្លួនឯង ឬជាមួយគ្រួសារ។ យើងគិតថាពិបាកញ៉ាំ តែវាស្រួលញ៉ាំជាងការគិតទៅទៀត ហើយនៅពេលញ៉ាំហើយ ទើបគាត់មានអារម្មណ៍ថា WOW! ខ្លួនប្រាណគាត់ប្រសើរគ្រាន់បើជាងពីម្សិលមិញ»។
JLC Salad ស្ថិតនៅផ្លូវលេខ ៣១០ កែងផ្លូវត្រសក់ផ្អែម សង្កាត់បឹងកេងកង ១ ខណ្ឌចំការមន រាជធានីភ្នំពេញ៕
វីដេអូ៖