.jpg)
តារាសម្ដែង និងពិធីការិនីកញ្ញា សោម ស្រីនាថ បង្ហាញរសជាតិ ស៊ុបខ្ទើយ។ ហេង ជីវ័ន
ភ្នំពេញៈ ក្រោមដំបូលតង់តូចរើខ្លួនមិនរួច ភ្ញៀវចេញចូលប្រដាក់គ្នាមិនដាច់ រកតែកន្លែងអង្គុយស្ទើរមិនបាន ដើម្បីមកភ្លក្សស៊ុបរូបមន្តថ្មី ធ្វើផ្ទាល់ដោយដៃតារាសម្តែង និងជាពិធីការិនីរូបស្រស់កញ្ញា សោម ស្រីនាថ បូករួមជាមួយឈ្មោះហាងកប់ស៊េរី «ស៊ុបខ្ទើយ»។
ស្ថិតនៅក្រោយមន្ទីរពេទ្យព្រះកុសុមៈ (ពេទ្យលោកសង្ឃ) ស៊ុបខ្ទើយ ជាឈ្មោះដ៏ទាក់ទាញ ដែលដាក់ដោយប្អូនប្រុសរបស់តារាសម្ដី សោម ស្រីនាថ ដោយសារតែស៊ុបនោះមានច្រើនរសជាតិចូលគ្នា និងជារូបមន្តរបស់អ្នកផ្ទះតារាសម្តែងស្រីរាងតូចច្រឡឹងនេះផ្ទាល់តែម្ដង។
ទើបតែបើកបានមួយអាទិត្យស៊ុបខ្ទើយ មានអ្នកគាំទ្រច្រើនសន្ធឹក ដោយលក់ពីថ្ងៃអង្គារ ដល់ថ្ងៃអាទិត្យ ចាប់ពីម៉ោង ៣ រសៀល រហូតដល់អស់ នៅម៉ោងប្រហែលជា ៨ យប់។
ស៊ុបខ្ទើយមានបន្លែ និងសាច់ជាច្រើនមុខ ១ ឈុតតម្លៃ ២៥០០០៛។ហេង ជីវ័ន
ជំនួញលក់ស៊ុបនេះផ្ដើមពីកញ្ញា សោម ស្រីនាថ ចាប់ដៃជាមួយប្អូនប្រុសទាំង ២ ឆ្លៀតពេលសម្រាកពីការថតកុន និងថតផ្សាយផលិតផល ដោយមិនមានជួលបុគ្គលិកឡើយ។
ស៊ុប ដែលមានរសជាតិប្លែកជូរតិចៗ ត្រូវបានផ្សំឡើយពីសាច់ទាស្រែ ប្រហិតចម្រុះ ពងមាន់ បង្គា ឈាម ផ្សិតម្ជុល ពោតបារាំង ត្រកួន ជីរនាងវង ម្អម និងទឹកជ្រលក់។
ម្ចាស់ហាងជាតារាស្រីរូបស្រស់ កញ្ញា សោម ស្រីនាថ បានប្រាប់ពីមូលហេតុនាំឲ្យនាងបើកកន្លែងលក់ស៊ុបតូចតែខ្លឹមនេះថា៖ «ពេលហ្នឹងគេង ៣ នាក់បងប្អូន ហើយប្អូនប្រុសក៏បាននិយាយឡើងថា តោះបងយើងបើកកន្លែងលក់អីញ៉ាំ ក៏នាំគ្នាគិតថា លក់អីក៏សម្រេចចិត្តលក់ស៊ុបខ្ទើយនេះ ព្រោះមានរូបមន្តហើយស្រាប់ ហើយមួយទៀតប្អូនប្រុសបងទាំង ២ នាក់រៀនចប់ទី ១២ កំពុងចូលរៀននៅសាកលវិទ្យាល័យ ហើយទំនេរ នៅពេលល្ងាច ប៉ុន្តែពួកគាត់សុំមិនលក់នៅថ្ងៃចន្ទ ១ ថ្ងៃ ព្រោះចង់ទុកពេលធ្វើកិច្ចការសាលា»។
ស្ថិតក្រោមដំបូលតង់តាមចិញ្ចើមផ្លូវ ស៊ុបខ្ទើយមានមនុស្សណែនៗ។ ហេង ជីវ័ន
ស៊ុបខ្ទើយ តម្រូវមនុស្សគ្រប់រូបមិនថា ជាសិស្សសាលាក៏ដោយក៏អាចញ៉ាំបានដែរ។ កញ្ញាក៏បានលើកហេតុផលថា៖ «បើកហាងតូចបែបហ្នឹងមកពីយើងមិនទាន់មានលទ្ធភាព និងចង់ធ្វើលក្ខណៈគ្រួសារសិន ធ្វើពីតិចទៅច្រើន»។
ទើបតែចាប់ផ្ដើមលក់ថ្មីថ្មោងចំណូលសម្រាប់ ២ ថ្ងៃដំបូងគឺ ៥០ ម៉ឺនរៀល ក្នុង ១ ថ្ងៃ ដោយលក់អស់គ្មានសល់។
ស៊ុបខ្ទើយ មួយឆ្នាំង មានតម្លៃ ២៥ ០០០៛ ហើយក្រៅពីនោះកញ្ញាក៏មានលក់ ភ្លាក្តាមតម្លៃ ១២ ០០០៛ និង ភ្លាតង្កៀបក្តាម តម្លៃ ១៥ ០០០៛ ចំណែកស៊ុបខ្ទើយឈុតជាចានត្រឹមតែ ៦ ៥០០។ សូមទាក់ទងតាមទូរស័ព្ទលេខ ០៩៣ ៤៨៣ ០៤១និង ០៩៨ ៣១៣ ៦៤៨៕
