ភ្នំពេញ : ស្ថិតនៅផ្លូវវ៉េងស្រេង ភោជនីយដ្ឋាន White ដែលនៅក្រោយស្ថានីយប្រេងឥន្ធនៈ PTT មានបម្រើនូវអាហារបែបខ្មែរកាត់ថៃជាច្រើនមុខ។
ថ្ងៃនេះ ភ្នំពេញប៉ុស្ដិ៍នឹងលើកយកមុខម្ហូប «ស៊ុបក្រហម» ពីភោជនីយដ្ឋានមួយនេះមកបង្ហាញជូនប្រិយមិត្តស្វែងយល់ពីវិធី ចម្អិនរបស់វា។
គ្រឿងផ្សំ : ត្រីក្រហម១ក្បាល ស្ពៃបូកគោ ស្ពៃតឿ ត្រកួន ផ្សិតម្ជុល ជីរនាងវង ជីររណារ ជីរវ៉ាន់ស៊ុយ ស្លឹកគ្រៃ គល់ស្លឹកគ្រៃ ស្លឹកក្រូចសើច ខ្ទឹមក្រហម ខ្ទឹមស រំដេង គ្រឿងតុមយ៉ាំប្រអប់ ទឹកម្ទេស អំបិល និងម្សៅស៊ុប។
វិធីចម្អិន : ដំបូងត្រូវយកត្រីក្រហមទៅចៀរឆ្អឹងចេញ ដោយទុកសាច់សុទ្ធ និងឆ្អឹងដោយឡែកពីគ្នា។ បន្ទាប់មកត្រូវដាំទឹកក្នុងឆ្នាំងឲ្យពុះ រួចដំស្លឹកគ្រៃ គល់ស្លឹកគ្រៃ ស្លឹកក្រូចសើច ខ្ទឹមក្រហម ខ្ទឹមស និងរំដេងដាក់ចូលក្នុងទឹកពុះនោះ រួចសឹមបង់ឆ្អឹងត្រី និងសាច់ត្រីសុទ្ធចូល។ ដំណាក់កាលបន្ទាប់ត្រូវទុកឲ្យទឹកស៊ុបនោះពុះមួយសន្ទុះ រួចសឹមបង់គ្រឿងតុមយ៉ាំ១ដុំចូល មុននឹងបន្ថែមអំបិល និងម្សៅស៊ុបចូលបន្តិច ហើយភ្លក្សសាបប្រៃតាមចំណូលចិត្ត។ បន្ទាប់មកទៀតត្រូវដាក់បន្លែស្ពៃបូកគោ ស្ពៃតឿ ត្រកួន និងផ្សិតម្ជុលចូល។ ចុងក្រោយទើបបង់ជីរនាងវង និងជីររណារ រួចដួសដាក់ចាន និងរោយជីរវ៉ាន់ស៊ុយ។
ចង់ដឹងថា «ស៊ុបក្រហម» មានរសជាតិបែបណា លោកអ្នកអាចអញ្ជើញទៅភ្លក្សផ្ទាល់នៅភោជនីយដ្ឋាន White ដែលស្ថិតនៅផ្លូវវ៉េងស្រេង សង្កាត់ចោមចៅ ខណ្ឌពោធិ៍សែនជ័យ។ ទាក់ទងទូរស័ព្ទលេខ ០១២៥០៦០៨១ និង០៦៩ ៥០៦០៨១៕
