ភ្នំពេញ : ស្ថិតលើវិថីលេខ៣៥២ កែងនឹងផ្លូវត្រសក់ផ្អែម ក្នុងសង្កាត់បឹងកេងកង១ ភោជនីយដ្ឋានយីហោមកពីកូរ៉េ MaruShabu បានបើកដំណើរការនៅរាជធានីភ្នំពេញបានរយៈពេល៣ខែមកហើយ។
ភោជនីយដ្ឋាន នេះមានការរចនាខាងក្នុងតាមបែបកូរ៉េសម័យទំនើប ជាមួយនឹងការតុបតែងទៅដោយភ្លើងពណ៌លឿងស្រទន់ចាំងរំលេចលើកម្រាល ឈើដ៏រលើបរលោង។ សង្ហារិមដែលប្រើប្រាស់នៅក្នុងភោជនីយដ្ឋានភាគច្រើនជាតុឈើជ្រុងៗ ដែលតម្រៀបគ្នាយ៉ាងមានរបៀបរៀបរយ ដោយមានបុគ្គលិកប្រុសស្រីក្នុងឈុតឯកសណ្ឋានដូចៗគ្នារង់ចាំស្វាគមន៍ ភ្ញៀវ។
ភោជនីយដ្ឋាននេះបើកតាំងពីឆ្នាំ២០០៤មកម្ល៉េះដោយមាន សាខាជាច្រើនកន្លែងនៅប្រទេសកូរ៉េខាងត្បូង និងបច្ចុប្បន្នមានវត្តមានដំណើរការនៅរាជធានីភ្នំពេញហើយ។
ភោជនីយដ្ឋាន មានបម្រើឈុតស៊ុបសាច់គោShabu និងឈុតគ្រឿងសមុទ្រ Shabu។ ចំពោះតម្លៃវិញគឺការបរិភោគឈុតស៊ុបសាច់គោ Shabu ចំណាយ១២ដុល្លារសម្រាប់មនុស្សធំ និងពី៥ដល់១០ដុល្លារសម្រាប់កុមារ។ តម្លៃនេះគឺបូករួមជាមួយនឹងការញុំាអាហារប៊ូហ្វេផងដែរដោយក្នុង នោះមានដូចជា មីអ៊ីតាលី (Spaghetti) មាន់បំពង មីស៊ុបកូរ៉េ ញ៉ាំបន្លែសាលាដនិងអាហារកូរ៉េជាច្រើនមុខទៀត ព្រមទាំងការ៉េមផ្លែឈើ និងភេសជ្ជៈចម្រុះ។
ពេលល្ងាចតម្លៃអាហារសម្រាប់មនុស្សធំគឺ១៨ ដុល្លារចំពោះឈុតស៊ុបសាច់គោបូករួមនឹងអាហារប៊ូហ្វេ។ រីឯឈុតគ្រឿងសមុទ្របូកនឹងអាហារប៊ូហ្វេគឺ២៤ដុល្លារ។ ចំពោះកុមារតម្លៃគឺចាប់ពី៥ដល់១០ដុល្លារ។ ពេលល្ងាចអាហារប៊ូហ្វេគឺមានបន្ថែមនូវប៊ីប៊ីឃ្យូសាច់គោ ជ្រូក និងមាន់ បែបកូរ៉េ និងជម្រើសអាហារជាច្រើនទៀត។ ព័ត៌មានបន្ថែមទាក់ទងលេខ ០៩២៦៨៩៥៨៦ និង០៧០៦៨៥៥៦៦៕
