The Phnom Penh Post Search

Search form




Logo of Phnom Penh Post newspaper Phnom Penh Post - ស៊ុប ចាណាង ម្ហូប​ជនជាតិ​ដើម​ដែល​អ្នក​ទៅ​លេង​រតនគិរី​ មិន​ដែល​រំលង




ស៊ុប ចាណាង ម្ហូប​ជនជាតិ​ដើម​ដែល​អ្នក​ទៅ​លេង​រតនគិរី​ មិន​ដែល​រំលង

Content image - Phnom Penh Post
ស៊ុប ចាណាង​ អាច​ទទួល​ទាន​ជាមួយ​បាយ ឬ​មី។ ហេង ជីវ័ន

ស៊ុប ចាណាង ម្ហូប​ជនជាតិ​ដើម​ដែល​អ្នក​ទៅ​លេង​រតនគិរី​ មិន​ដែល​រំលង

ភ្នំពេញ: ហាង​ម្ហូប​បែប​ជនជាតិ​ដើម​ដែល​ទើប​តែ​បើក​ថ្មីៗ​នៅ​ម្តុំ​ទួលទំពូង ១ ត្រូវ​បាន​ភ្ញៀវ​ជាច្រើន​គាំទ្រ ទាំង​ភ្ញៀវ​ជនជាតិ​ខ្មែរ ជនជាតិ​ដើម​ដែល​មក​រស់នៅ​ទីក្រុង​ភ្នំពេញ និង​ភ្ញៀវ​បរទេស។

មុខម្ហូប​ដ៏មាន​ប្រជាប្រិយភាព​ជាងគេ​គឺ ចាណាង ភីភា ឡាប និង​បុក​ត្រី​ជាដើម ហើយ​ក្នុង​ចំណោម​មុខម្ហូប​ទាំង ៣ នេះ​គឺ ចាណាង ជា​មុខម្ហូប​ពិសេស​ដែល​ភ្ញៀវ​តែងតែ​កុម្ម៉ង់​ញ៉ាំ​គ្រប់​ពេល មិន​ថា​ព្រឹក ថ្ងៃត្រង់ ឬ​ពេល​យប់​នោះ​ទេ។

អ្នកស្រី យុន ម៉ាណេ ជនជាតិ​ព្នង​ម្ចាស់​ហាង​ផ្ទះបាយ​ជនជាតិ​ដើម ដែល​កំពុងតែ​ដួស​ស៊ុប​ចាណាង បាន​និយាយ​ថា៖ «ចាណាង​គឺជា​មុខម្ហូប​ដែល​ល្បី​ខ្លាំង​នៅ​ខេត្ត​រតនគិរី ហើយ​អ្នកណា​ដែល​ទៅ​លេង​រតនគិរី​គឺមិន​ដែល​រំលង​ចាណាង​នោះ​ទេ ព្រោះ​ស៊ុប​ចាណាង​ជាអាហារ​ប្រចាំ​តំបន់​ដែល​ជនជាតិ​តែង​តែធ្វើ​សម្រាប់​បរិភោគ​ជា​ប្រចាំ អ៊ីចឹង​អ្នក​ដែល​ទៅ​ដល់​រតនគិរី ហើយ​មិនបាន​ញ៉ាំ ដូចជា​អត់​បាន​ជាន់​ទឹកដី​ហ្នឹង​អ៊ីចឹង»។

ចំពោះ​ស៊ុប​ចាណាង​គឺមាន​គ្រឿង​ផ្សំ​ដូចជា ស្បែក​គោ ឆ្អឹង​គោ ស្លឹក​ចាណាង ទំពាំង​ស្រស់ ស្នៀត​ពោត ផ្សិត រំដេង ម្ទេស និង​ស្លឹក​ក្រូចសើច របៀប​ធ្វើ​គឺយក​ស្បែក​គោ​មក​ហាន់​ជាបន្ទះ​ធំៗ បន្ទាប់​មក​យក​ស្លឹក​ចាណាង​ពូត​ហើយ​ត្រង​យក​ទឹក​ទៅ​ផ្អាប់​ទុក​រយៈពេល ២ ទៅ ៣ ថ្ងៃ រួចហើយ​ទើប​យកមក​រម្ងាស់​ឲ្យ​វាពុះ​ទើប​ដាក់​រំដេង​ចូល ដោយ​បន្ថែម​ឆ្អឹង​គោ ស្បែក​គោ ទំពាំង និង​គ្រឿង​ផ្សំ​រសជាតិ​រួច​រម្ងាស់​ចោល ១ ថ្ងៃ​ពេញ​ទើប​ដាក់​ផ្សិត ស្លឹក​ក្រូចសើច និង​ស្នៀត​ពោត​ចូល​ជាការ​ស្រេច។

សម្រាប់​ស៊ុប​ចាណាង​នេះ​អាច​ញ៉ាំ​ជាមួយ​បាយ​ក៏បាន ឬ​ជាមួយ​មី​ក៏បាន​ទៅ​តាម​ចំណង់​ចំណូល​ចិត្ត និង​បន្ថែម​ម្ទេស​ជ្រក់​ពិសេស​របស់​ជនជាតិ​ដើម​រឹតតែ​ឆ្ងាញ់​មួយ​កម្រិត​ទៀត។

ផ្ទះបាយ​ជនជាតិ​ដើម សិ្ថត​នៅ​ផ្ទះ​លេខ ៦៨A ផ្លូវ ៤៥៦ សង្កាត់​ទួល​ទំពូង ១ ទាក់ទង​ទូរស័ព្ទ​លេខ ០៧៧ ៩៩ ៤២ ៥។ ហាង​ចាប់​បើក​ពីម៉ោង ៧ ព្រឹក​រហូត​ដល់ ៨ យប់។ មុខម្ហូប​គឺ​ចាប់ពី ៦០០០ រៀល​ដល់ ១២ ០០០ រៀល៕

Content image - Phnom Penh Post
អ្នកស្រី យុន ម៉ាណេ ដួស​ចាណាង​ពីឆ្នាំង​ស៊ុប​។ ហេង ជីវ័ន

អត្ថបទគួរចាប់អារម្មណ៍