.jpg)
ហាង Two Cows មានជម្រើសស្តេកសាច់គោអាមេរិក និងអាហារបែបអាស៊ីជាច្រើនទៀត។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ ចំណូលចិត្តទទួលទានស្តេកធ្វើឲ្យស្រ្តីមេផ្ទះម្នាក់បានដាក់ទុនបើកភោជនីយដ្ឋានស្តេកសាច់គោអាមេរិកមានរសជាតិឆ្ងាញ់ និងតម្លៃសមរម្យ ក្រោមការសហការពីក្រុមគ្រួសាររបស់អ្នកនាង។
ហាង ធូខៅ (Two Cows Steakhouse) បានចាប់ផ្តើមអស់រយៈពេល ២ ឆ្នាំ ជាមួយសាខាដំបូងនៅ អ៊ីដិន ហ្គាដិន និងសាខាទី ២ ទើបបើកបាន ៣ ខែ នៅម្ដុំទួលទំពូង។
អង្គុយក្នុងភោជនីយដ្ឋានដែលមានការតុបតែងសាមញ្ញប្រកបដោយផាសុកភាព អ្នកនាង ត្រាំង មុយលី ជាម្ចាស់ហាង ធូខៅ បានរៀបរាប់ប្រាប់ ភ្នំពេញ ប៉ុស្ដិ៍ ឲ្យដឹងថា៖ «ហាងនេះខ្ញុំបើកចូលហ៊ុនជាមួយបងប្រុស និយាយទៅដូចជាមុខរបរលក្ខណៈគ្រួសារដែរ ហើយរូបមន្តវិញគឺបងថ្លៃខ្ញុំទៅរៀននៅថៃ និងវៀតណាម»។
ស្តេកសាច់គោបន្ទះមាន ៥ រសជាតិសម្រាប់ភ្ញៀវជ្រើសរើសគឺ រសជាតិប្រចាំហាង រសជាតិដើម រសជាតិម្រេច រសជាតិឈីស និងហឹរ។ ស្ដេកទម្ងន់ ១០០ ក្រាម ៥,៩០ ដុល្លារ និង ១៥០ ក្រាម ៦,៩០ ដុល្លារ។
ស្តេកសាច់គោ ស៊ុត ពោត ដំឡូងបារាំង នំប័ុង និងសាលាដ។ រូបថត យូសុះ អាប់ឌុលរ៉ាស់ហ៊ីម
សាច់គោចម្អិនរួចត្រូវបានដាក់ក្នុងចានដែករាងពងក្រពើជាមួយស៊ុតចៀនជ័រព្នៅ លាយគ្រាប់ពោត ដំឡូងបារាំងបំពងស្រួយ បន្ថែមនំប៉័ងមួយដើម អមដោយបន្លែសាលាដមួយ។
ជាមួយជម្រើសសាច់គោស្ដេកក្នុងកម្រិតឆ្អិនពី ២០ ភាគរយ រហូតដល់ឆ្អិន ១០០ ភាគរយ ម្ចាស់ហាងបានបញ្ជាក់ថា៖ «អ្នកដែលចេះញ៉ាំស្តេក គឺជ្រើសយកកម្រិតឆ្អិន ៥០ ភាគរយ ពេញឆ្ងាញ់តែម្តង ប៉ុន្តែបើសម្រាប់ខ្មែរយើងពិសេសស្រីៗតែម្តង អត់ចំណូលរបស់ឆៅនៅឈាមទេ ភាគច្រើនគាត់យកឆ្អិន ១០០ ភាគរយតែម្តង»។
ផ្ទះបាយ ធូខៅ ប្រើប្រាស់ផលិតផលក្នុងស្រុក តែគ្រឿងផ្សំចម្បងជាសាច់គោអាមេរិក ដើម្បីរក្សារសជាតិ។
ធូខៅ មានការតុបតែងសាមញ្ញ និងមានផាសុកភាព។ រូបថត យូសុះ អាប់ឌុលរ៉ាស់ហ៊ីម
ម្ចាស់ហាង ធូខៅ បានបន្តថា៖ «យើងធ្លាប់បានសាកល្បង យកសាច់គោផ្សេង ដែលល្បីថាឆ្ងាញ់ និងមានគុណភាពល្អមកចម្អិន ប៉ុន្តែរសជាតិមិនដូចសាច់គោអាមេរិកនោះទេ។ សាច់គោទាំងអស់នោះរាងធូរថ្លៃជាងសាច់គោដែលខ្ញុំយកមកប្រើទេ ប៉ុន្តែយើងសុខចិត្តយករបស់ដែលល្អហើយថ្លៃមកប្រើ ព្រោះមិនចង់បាត់បង់គុណភាពនោះទេ ដោយសារយើងក៏ជាអ្នកចូលចិត្តញ៉ាំដែរ»។
អ្នកនាងបន្តថា៖ «យើងក៏ព្យាយាមដាក់តម្លៃឲ្យទាបបំផុតតាមដែលអាចធ្វើបាន សុខចិត្តយកចំណេញតិចតួច ដើម្បីឲ្យភ្ញៀវគ្រប់រូបមិនថាជីវភាពមធ្យម និងអ្នកមិនសូវមានលទ្ធភាព អាចញ៉ាំស្ដេកបានគ្រប់គ្នា»។
ភ្ញៀវក៏អាចសាកល្បង ស្តេកសាច់មាន់ បាយឆាគីមឈី មីហឹរ ស្លាបមាន់ផ្អែម មីគាវគោក ស៊ុបគាវ បាយសាស៊ីវ និងខ្ទះក្តៅតៅហ៊ូជាមួយបាយ (ពី ៣,៥០ ទៅ ៤,៩០ ដុល្លារ)។
ធូខៅ សាខាទី២ ស្ថិតនៅផ្ទះលេខ ២១៥ ផ្លូវលេខ ១៥៥ សង្កាត់ទួលទំពូង ឬទំនាក់ទំនងតាមទូរស័ព្ទលេខ ០១២ ៣៣១ ៣៣៥ និង ០១៦ ២២១ ០០១៕
វីដេអូ៖
