.jpg)
Tandoori Chicken រសជាតិឆ្ងាញ់ និងការតុបតែងស្អាត។ រូបថត Joshua Purushotman
ភ្នំពេញ៖ ពួកគេមកពីគ្រប់ច្រកល្ហកនៃរាជធានីភ្នំពេញបំណងស្វែងរកភោជនីយដ្ឋានម្ហូបឥណ្ឌាដ៏ល្អ ហើយពួកគេព្យាយាមភ្លក្សម្ហូបគ្រប់ហាងអាហារឥណ្ឌា នៅទីក្រុងភ្នំពេញ ទាំងខំរកស្រាវជ្រាវ Google និង TripAdvisor តែប្រែជាគ្មានសង្ឃឹម ខណៈអាហារទាំងនោះមិនត្រូវរសជាតិដើម។
ទីបំផុត! ពីម្នាក់ទៅម្នាក់ទៀតតាមរយៈការនិយាយតៗគ្នា ពលរដ្ឋឥណ្ឌានៅកម្ពុជាបានរកឃើញ ស្វាហ្គាត់ ភោជនីយដ្ឋាន (Swagat Indian Restaurant) បម្រើមុខម្ហូបឥណ្ឌាភាគខាងជើង និងភាគខាងត្បូង ដែលស្ថិតលើវិថី ២៧៨ ក្បែរវត្ដលង្កា។
ភោជនីយដ្ឋានតូចមួយ ដែលមានកៅអីសម្រាប់ភ្ញៀវ ២៦ នាក់ ពេលនេះ ស្វាហ្គាត់ ត្រូវបានទទួលស្គាល់ដោយជនជាតិឥណ្ឌាជាភោជនីយដ្ឋានល្អបំផុតសម្រាប់អ្នកនិយមអាហារឥណ្ឌារសជាតិដើម។
តាំងពីបើកទ្វារកាលពីខែកុម្ភៈឆ្នាំមុន ភោជនីយដ្ឋានបានទទួលទាំងភ្ញៀវអាល្លឺម៉ង់ ជប៉ុន កូរ៉េ ម៉ាឡេស៊ី សិង្ហបុរី បារាំង ម៉ិកស៊ិក ប្រេស៊ីល ឥណ្ឌូនេស៊ី និងអាហ្វ្រិកខាងត្បូង ដែលភាគច្រើនបានក្លាយជាម៉ូយប្រចាំទៅហើយ។
នាយកប្រតិបត្ដិផ្នែកទំនាក់ទំនងវិទ្យាសាស្ដ្រ Prashanth Shetty ជាភ្ញៀវប្រចាំ បានមកសាកម្ហូបនៅ ស្វាហ្គាត់ ដោយចៃដន្យ ក្រោយពីបានជួប Ashok Kumar ជាម្ចាស់ហាង ខណៈកំពុងដើរលើដងផ្លូវ ២៧៨។
អ្នកចូលចិត្ដសាកហាងអាហារថ្មីៗរូបនេះបានថ្លែងថា៖ «ប៉ុន្ដែខ្ញុំបានបើកចិត្ដទូលាយ និងបានសម្រេចចិត្ដសាកល្បងមើល។ មែន! ខ្ញុំពេញចិត្ដនឹងអាហារទីនេះ ហើយខ្ញុំក៏ឧស្សាហ៍មកទីនេះម្ដងហើយម្ដងទៀត។ ឥឡូវខ្ញុំក្លាយជាភ្ញៀវប្រចាំ និងជាផ្នែកមួយនៃក្លិប ស្វាហ្គាត់ ផងដែរ»។
ម្ហូបដ៏ពេញនិយមកុម្ម៉ង់ Chicken Garlic tikka។ រូបថត Joshua Purushotman
លោក Frank Reichardt ជនជាតិអាល្លឺម៉ង់ ដែលជានាយកគ្រប់គ្រងទូទៅនៃក្រុមហ៊ុនក្រាហ្វិកមួយ ក៏លាន់មាត់ថាចូលចិត្ដអាហារ ស្វាហ្គាត់។
លោកនិយាយថា៖ «ខ្ញុំចូលចិត្ដអាហារហឹរ ពេលខ្ញុំធ្វើការនៅឥណ្ឌាមួយរយៈ និងកាន់តែចូលចិត្ដរសជាតិអាហារនៅទីនោះ។ មិនខុសពីអ្នកដទៃ ខ្ញុំក៏ខំរកហាងម្ហូបឥណ្ឌាល្អនៅក្នុងភ្នំពេញផងដែរ»។
លោកបន្ដថា៖ «ជឿ ឬមិនជឿ! នៅអាល្លឺម៉ង់មានភោជនីយដ្ឋានឥណ្ឌាល្អៗជាងនៅកម្ពុជានេះទៅទៀត ហើយខ្ញុំស្ទើរតែបោះបង់ការតាមរកហាងល្អៗរហូតដល់ខ្ញុំត្រូវបានណែនាំឲ្យមកហាង ស្វាហ្គាត់ នេះ»។
ជាម៉ូយប្រចាំម្នាក់ទៀត Amaladass Singarayer ជានាយកផ្នែកសេវាកម្មនៅក្រុមហ៊ុនទូរស័ព្ទមួយនៅកម្ពុជា។ លោកបាននិយាយថា លោកចូលចិត្ដបរិស្ថានកក់ក្ដៅ និងស្រស់ស្រាយនៅ ស្វាហ្គាត់។
លោក Amaladass បានឲ្យដឹងថា៖ «វាជាភោជនីយដ្ឋានតូចដែលមិនខុសពីផ្ទះរបស់យើងទេ។ បុគ្គលិកមានភាពរាក់ទាក់ តែសំខាន់បំផុត អាហារមានរសជាតិល្អ។ ស្វាហ្គាត់ រំលេចដោយអាហារឥណ្ឌាមកពីភាគខាងជើង និងខាងត្បូង ដែលលោកអ្នកអាចរកបាននៅភ្នំពេញ។ ចំណូលចិត្ដខ្ញុំគឺ ម៉ាសាឡា ត្រប់វែងជាមួយនំបន្ទះខ្ទឹមស និងដាមប៊ីយ៉ានី»។
ស្វាមីភរិយាលោក Ashok និងអ្នកស្រី ណាវី។ រូបថត Joshua Purushotman
លោក Ashok មកពីបាងហ្គាឡូ ភាគខាងត្បូងប្រទេស ឥណ្ឌា។ លោកមកកាន់កម្ពុជាតាំងពី ១៦ ឆ្នាំមុន ដើម្បីបំពេញការងារឲ្យក្រុមហ៊ុនឱសថស្ថានមួយ ហើយក៏ជាប់ចិត្តនឹងនារីខ្មែរឈ្មោះ ព្រំ ណាវី។ ប្ដីប្រពន្ធទាំង ២ បានរៀបការ ៨ ឆ្នាំ និងមានកូន ២ នាក់ អាយុ ៧ និង ៣ ឆ្នាំ។
លោកនិយាយថា៖ «ខ្ញុំចាប់ផ្ដើមបើកភោជនីយដ្ឋាន ដោយសារខ្ញុំនឹកអាហារឥណ្ឌាឆ្ងាញ់ៗ។ ខ្ញុំព្យាយាមភ្លក្សនៅភោជនីយដ្ឋានជាច្រើន តែរមែងខ្វះគ្រឿងផ្សំមួយចំនួន។ ខ្ញុំចូលចិត្ដអាហារ ហើយខ្ញុំចង់ធ្វើឲ្យខុសប្លែកទាំងគុណភាព និងរសជាតិនៃអាហារឥណ្ឌា»។
លោកបានបន្ដថា៖ «ក្រៅពីនេះ ខ្ញុំចង់មានភោជនីយដ្ឋានដែលជនជាតិឥណ្ឌាអាចមករីករាយអាហារផ្ទះ មិនខុសអីពីក្រុមគ្រួសារមកពីឥណ្ឌាផងដែរ។ ប៉ុន្ដែខ្ញុំមិនអាចសម្រេចទៅបានដោយខ្វះជំនួយ និងការគាំទ្រពីភរិយាឡើយ។ ណាវី តែងតែនៅចាំជួយខ្ញុំជានិច្ច ជាពិសេសអំឡុងពេលដំណើរការដំបូងៗ ពេលយើងពិបាកស្វែងរកភ្ញៀវ។ ស្វាហ្គាត់ ល្បីតាមសម្ដីភ្ញៀវ ដោយខ្ញុំមិនដែលផ្សព្វផ្សាយ ឬដើរទីផ្សារអ្វីឡើយ»។
លោក Ashok អះអាងថា មុខម្ហូបពេញនិយមរបស់លោកមួយចំនួន ដូចជា សាច់មាន់ខ្ទឹមសដោតចង្កាក់ (chicken garlic tikka) សាច់មាន់តានដូរី (chicken tandoori) ខ្ទឹមស ផាកូដា (onion pakoda) និងដាមប៊ឺយ៉ានី (dum biryani) គឺជាសំណព្វចិត្ដរបស់ភ្ញៀវគ្រប់ពេល។
ឆ្លើយនឹងមូលហេតុដែលភ្ញៀវប្រចាំហៅ ស្វាហ្គាត់ ជាភោជនីយដ្ឋានឥណ្ឌាល្អបំផុតក្នុងក្រុងភ្នំពេញ លោក Ashok បានប្រាប់ថា វាផ្ដើមចេញពីឆន្ទៈដ៏ពិតប្រាកដ។
លោក Ashok បានឲ្យដឹងថា មេចុងភៅរបស់លោកម្នាក់មកពីនេប៉ាល់ និង ២ នាក់ទៀតមកពីឥណ្ឌា។ ពួកគេត្រូវបានជួលឡើងយ៉ាងពិសេសចំពោះជំនាញខាងចម្អិនម្ហូបភូមិភាគខាងជើង និងខាងត្បូង។
លោកបានបញ្ជាក់ថា៖ «អាហាររបស់យើងទាំងអស់ត្រូវបានចម្អិនឡើងថ្មីៗ។ យើងដឹងថា យើងអាចលក់ម្ហូបប៊ឺយ៉ានី ប្រមាណ ២០ ចាន ក្នុង ១ ថ្ងៃ។ ដូច្នេះយើងរៀបចំតែប៉ុណ្ណឹងនោះទេ។ បើអតិថិជនកុម្ម៉ង់ប៊ឺយ៉ានី ក្រោយអស់ពីស្ដុក យើងគ្រាន់តែសុំទោស និងប្រាប់ពួកគេថា យើងមិនមានទៀតទេ។ សូម្បីតែសាច់ បន្លែ និងគ្រឿងផ្សំដទៃទៀត ត្រូវបានផ្គត់ផ្គង់ប្រចាំថ្ងៃ និងស្រស់ៗ។ នេះធ្វើឲ្យមានភាពខុសប្លែកយ៉ាងខ្លាំងចំពោះគុណភាព និងរសជាតិអាហារ»។
លោកបានលើកឡើងទៀតថា៖ «ខ្ញុំគ្រាន់តែរកប្រាក់ចំណេញតិចតួចពីការបើកភោជនីយដ្ឋាននេះប៉ុណ្ណោះ តែខ្ញុំពិតជាចង់ឲ្យអតិថិជនមករីករាយនឹងអាហារល្អៗពិតមែន»៕ Joshua Purushotman
វីដេអូ៖
