The Phnom Penh Post Search

Search form

Logo of Phnom Penh Post newspaper Phnom Penh Post - ហាងបុកកន្ទួត បឹងកេងកង​ភ្ញៀវ​ថាចង់​ឆ្ងាញ់​ជាង​នៅ​ថៃ




ហាងបុកកន្ទួត បឹងកេងកង​ភ្ញៀវ​ថាចង់​ឆ្ងាញ់​ជាង​នៅ​ថៃ

Content image - Phnom Penh Post
ហាង​បុកកន្ទួត​នៅម្ដុំ​លក់​ម្ជូរក្បែរ​ផ្សារបឹង​កេងកង មាន​យានជំនិះ​ចត​ត្រៀបត្រា​។ ឈឹម ស្រីនាង

ហាងបុកកន្ទួត បឹងកេងកង​ភ្ញៀវ​ថាចង់​ឆ្ងាញ់​ជាង​នៅ​ថៃ

ភ្នំពេញ: ក្លិនម្ទេស​ឆួល​ចេញពី​ហាង​តូច​មួយ​ដែលមាន​ម៉ូតូ​ចតត្រៀបត្រា ខណៈនារី​ក្មេងៗ​ពីរបីនាក់​កំពុងតែ​ញាប់ដៃ​សាប់​ល្ហុងខ្ចី ​ខ្លះទៀត​កំពុង​កាន់អង្រែ​បុក​យ៉ាង​ញាប់​ដៃ​ជាមួយ​គ្រឿង​ផ្សំ កាពិ ស្ករត្នោត ទឹកត្រី និង​ម្ទេសក្នុង​ត្បាល់​។

កញ្ញា ថន សុ​វណ្ណា អាយុ ៣០ ឆ្នាំ ជា​ម្ចាស់​ហាង «បុក​កន្ទួត» បាន​ឲ្យដឹង​ថា ​ដំបូងឡើយ កញ្ញា​គ្រាន់តែបើក​លក់​សម្លៀក​បំពាក់​នាំ​ពី​ប្រទេស​ថៃមក​លក់​តែ​ប៉ុណ្ណោះ។

បន្ទាប់​មកកញ្ញា​ក៏ផ្ដើម​លើក​ស្លាក​យីហោ​ «បុកកន្ទួត» នៅ​ពី​មុខ​ហាង​លេងៗ ប៉ុន្តែ​មិន​នឹកស្មាន​ថា​មានភ្ញៀវមក​ទិញ​ច្រើន​ពី​មួយ​ថ្ងៃ​ទៅ​មួយថ្ងៃ ទើបសម្រេច​លក់ខោអាវ​តាម​អនឡាញ និង​ដាក់លក់​បុកកន្ទួត និង​គ្រឿងបុក​ជាច្រើន​ប្រភេទ​ជា​ហាង​មានកន្លែង​អង្គុយ​ត្រឹមត្រូវ​។

ដោយសារតែ​ហាង​បុកកន្ទួត​មាន​ទំហំ​តូចបន្តិច ដូច្នេះ​ហើយ​ម្ចាស់ហាង​ទទួលស្គាល់ថា អាច​បម្រើ​ភ្ញៀវ​បាន​ប្រមាណ ៤០ ទៅ ៥០ នាក់​ប៉ុណ្ណោះ។

Content image - Phnom Penh Post
បុក​ល្ហុងពងទាប្រៃ​ និង​ក្ដាមប្រៃ​ឆ្ងាញ់ប្លែក​មាត់​។ ឈឹម ស្រីនាង

កញ្ញា ថន សុវណ្ណា បាន​ត្អូញ​ថា៖ «ពេលខ្លះ​ទៅ​គឺ​ប៉ះពាល់​ដល់​អារម្មណ៍​ភ្ញៀវ​ដែល​គាត់មក​ញ៉ាំនៅទីនេះ ណាមួយ​បុក​មិនទាន់​ឲ្យ​​ភ្ញៀវ ដោយសារតែ​ហាង​ខ្ញុំ​មាន​អ្នកបុកតិច​គឺ​យើង​បុក​តែ​បី​ត្បាល់​តែប៉ុណ្ណោះ អ៊ីចឹង​ទៅពេលខ្លះ​ភ្ញៀវ​គាត់ក៏​ចាំ​មិនបាន​ក៏មាន តែ​យើង​នៅ​តែ​ព្យាយាមបម្រើ​សេវា​ឲ្យទាន់ចិត្ត​ដល់​អតិថិជន​ដែល​គាត់​មក​ហាងបុកកន្ទូ​ត​នេះ»។

ម្ចាស់​ហាង​រូប​នេះបាន​បន្ដ​ទៀតថា៖ «ភ្ញៀវ​ភាគច្រើន​ដែល​ចូលចិត្ត​មក​ហាង​បុក​កន្ទួត​ដោយសារតែ​វាមាន​រសជាតិ​ខុសពី​គេ ហើយ​ភ្ញៀវ​មួយចំនួន​ដែល​គាត់ធ្លាប់​ទៅ​ញ៉ាំ​នៅ​ស្រុក​ថៃ​គឺ​គាត់ថា​នៅទីនេះ​គឺ​បុក​ចង់ឆ្ងាញ់​ជាង​នៅ​ថៃ​ទៀត ដោយសារ​តែខ្ញុំ​ធ្លាប់​ទៅ​រៀនបុកនេះ​នៅ​ស្រុកថៃ ហើយ​បែកគំនិត​យក​ផ្លែឈើ​នៅ​ស្រុក​យើង​មាន​យកមក​ច្នៃ​បុក​ជាមួយគ្នា»។

Content image - Phnom Penh Post
បុកពោត​ ម្កាក់ និង​ក្ដាមប្រៃ រសជាតិ​ហឹរឆ្ងាញ់​។ ឈឹម ស្រីនាង

កញ្ញាលើក​ឡើង​ថា៖ «ខ្ញុំ​ផ្សំ​គ្រឿង​គឺតម្រូវ​រសជាតិខ្មែរ​យើង​គឺ​គាត់​ចូលចិត្ត​រសជាតិ​មុតៗ​ជាង​នៅ​ថៃ ហើយ​នៅក្នុង​ហាង​របស់ខ្ញុំ​នេះ​គឺ​ដាច់ជាងគេ​បុកកន្ទួត​ក្តាមសេះ មានការ​ពេញ​និយម​ញ៉ាំ​ជាងគេ ដោយ​ក្នុង​មួយថ្ងៃ​គឺអាច​លក់​បាន ៣០០ ទៅ ៤០០ ស្បោង និង​អ្នក​កុម្ម៉ង់​ញ៉ាំ​ក្នុងហាង​ជាច្រើន​ទៀត»។

ស្ថិតនៅ​ផ្ទះ​លេខ ០៩ ផ្លូវ ៣៨០ ម្តុំលក់​ម្ជូរ​បឹងកេង​កង​​ ហាង​បុកកន្ទួត​មាន​លក់​ បុកល្ហុង​ពងទាប្រៃ បុង​ល្ហុងក្តាម​សេះ បុកម្កាក់ បុក​បំពេញរាជ បុក​ចេកខ្ចី បុកអម្ពិលខ្ចី​ជាមួយ​ចេក បុកល្ហុង​ប្រហុក បុក​ពោតម្កាក់ បុក​កន្ទួត​ក្តាមសេះ​ តម្លៃ​ពី ៥០០០ រៀល រហូតដល់ ១២០០០ រៀល៕

អត្ថបទគួរចាប់អារម្មណ៍