The Phnom Penh Post Search

Search form




Logo of Phnom Penh Post newspaper Phnom Penh Post - ហាង​ម្ហូប​ជនជាតិ​ភាគតិច ​រំលេច​រូបរាង​នៅ​ភ្នំពេញ




ហាង​ម្ហូប​ជនជាតិ​ភាគតិច ​រំលេច​រូបរាង​នៅ​ភ្នំពេញ

Content image - Phnom Penh Post
បុគ្គលិក​ហាង​ ផ្ទះ​បាយ​ជនជាតិ​ដើម បង្ហាញ​អត្ដសញ្ញាណ​របស់​ពួកគាត់​ដោយការ​ស្លៀក​ពាក់​ជាដើម។ ហេង ជីវ័ន

ហាង​ម្ហូប​ជនជាតិ​ភាគតិច ​រំលេច​រូបរាង​នៅ​ភ្នំពេញ

ភ្នំពេញ: ចង់​ស្គាល់ ចង់​ភ្លក្ស​ម្ហូប​បែប​ជនជាតិ​ដើម​ឬទេ? ដោយ​មិន​ចាំបាច់​ចំណាយ​ពេល​ជិះ​ទៅ​ដល់​រតនគិរី​ឡើយ ដោយសារ​តែ​ឥឡូវ​នេះ​នៅ​រាជធានី​ភ្នំពេញ​ក៏មាន​ហាង​លក់​ម្ហូប​ជនជាតិ​ដើម​ដែរ​ធ្វើ​ដោយ​ចុងភៅ​ជនជាតិ​កួយ ព្នង និង​ខ្មែរ​ផងដែរ។

អ្នកស្រី យុន ម៉ាណេ ជនជាតិ​ព្នង​ម្ចាស់​ហាង​ផ្ទះបាយ​ជនជាតិ​ដើម ដែល​កំពុង​តែដួស​ស៊ុប​ចាណាង​បាន​និយាយ​ថា៖ «មូលហេតុ​ដែល​ខ្ញុំសម្រេច​ចិត្ត​បើក​ផ្ទះបាយ​ជនជាតិ​ដើម​នៅ​ទីក្រុង​ភ្នំពេញ​នេះ ដោយសារ​តែខ្ញុំ​ឃើញ​ថា​នៅ​ទីនេះ​មិនទាន់​មាន​ហាង​លក់​ម្ហូប​ជនជាតិ​ដើម​នៅ​ឡើយ ហើយ​ឃើញ​មានអ្នក​ចាប់អារម្មណ៍​ញ៉ាំ​ម្ហូប​ជនជាតិ​ដើម​ភាគតិច​ច្រើន។ ម្យ៉ាងទៀត​ខ្ញុំចង់​បង្កើត​កន្លែង​មួយ​ដើម្បី​ផ្សព្វផ្សាយ​ពីម្ហូប​ជនជាតិ​ដើម ចង់បង្ហាញ​អត្តសញ្ញាណ​របស់​ពួកគាត់​ដោយ​ការ​គូរក្បាច់​រចនា​នៅ​តាម​ជញ្ជាំង ការ​ស្លៀកពាក់​ជាដើម»។

ផ្ទះបាយ​ជនជាតិដើម​នេះ​ទើប​តែ​បើក​លក់​បាន​រយៈ​ពេល​មួយខែ​ជាង ឃើញ​ថា​មាន​ភ្ញៀវ​ចូល​ញ៉ាំ​ច្រើន ទាំង​ជនជាតិ​ដើម (ព្នង គ្រឹ​ង និង ទំពួន) ជនជាតិ​ខ្មែរ និង​ជនជាតិ​បរទេស ហើយ​ភ្ញៀវ​ភាគច្រើន​គឺគាត់​ចូលចិត្ត​កុម្ម៉ង់​ម្ហូប​ពិសេស​ប្រចាំ​ហាង​ដូចជា ចាណាង ភីភា ឡាប និង​បុក​ត្រី​ជាមួយ​គល់​ស្លឹកគ្រៃ។

អ្នកស្រី ម៉ាណេ បាន​បន្ត​ទៀត​ថា៖ «សម្រាប់​ជនជាតិខ្មែរ​ភាគច្រើន​ដែល​គាត់​ធ្លាប់​មក​ញុំា​គាត់​ថា​រសជាតិ​នេះ​គឺគាត់​អាច​ទទួល​យក​បាន ហើយ​ចុងភៅ​ដែល​ធ្វើ​ម្ហូប​នៅទីនេះ​គឺមាន​ជនជាតិ ទំពួន ព្នង និង​ខ្មែរ»។

អ្នកស្រី​បញ្ជាក់​ថា៖ «បន្លែ​ភាគច្រើន​ដែល​ខ្ញុំប្រើ​សម្រាប់​ធ្វើម្ហូប​គឺ​យើង​យក​មកពី​រតនគិរី និង​មណ្ឌលគិរី ដែល​ខាង​សហគមន៍ ជនជាតិ​ដើម​គាត់​ដាំ​ផ្ទាល់ដៃ​តែម្តង និង​បន្លែ​ខ្លះ​គឺ​ខ្ញុំរក​ទិញ​នៅ​ភ្នំពេញ ជ្រើស​រើសយក​បន្លែ​ដែល​ល្អៗ​គ្មាន​ជាតិ​គីមី»។

ផ្ទះបាយ​ជនជាតិដើម បើក​លក់បី​ពេល ព្រឹក ថ្ងៃ និង​ល្ងាច ចាប់ពី​ម៉ោង ៧ ព្រឹក​រហូតដល់ ៨ យប់ ចំពោះមុខ​ម្ហូប​គឺ​ចាប់ពី ៦០០០ រៀល​រហូតដល់ ១២០០០ រៀល ក្រៅពី​ម្ហូប​ជនជាតិ​ដើម និង​ម្ហូប​ខ្មែរ គឺមាន​លក់​ទឹកឃ្មុំ​សុទ្ធ ១០០ ភាគរយ​មកពី​រតន​គិរី ស្រា​ពាង ផ្លែប៊ឺរ និង​ផ្លែ​ក្រូច។

ផ្ទះបាយ​ជនជាតិដើម សិ្ថត​នៅផ្ទះ​លេខ ៦៨A ផ្លូវ ៤៥៦ សង្កាត់​ទួលទំពូង១ ទាក់ទង​ទូរស័ព្ទ​លេខ ០៧៧ ៩៩ ៤២ ៥៤៕

Content image - Phnom Penh Post
ស្រាពាង និង​ទឹកឃ្មុំ​ធម្មជាតិ​មាន​លក់​នៅ​ហាង​ផ្ទះបាយ​ជនជាតិ​។ ហេង ជីវ័ន

Content image - Phnom Penh Post
សម្ល​ត្រួយ​បន្លែ រសជាតិជនជាតិ​ដើម​ភាគតិច។ ហេង ជីវ័ន

អត្ថបទគួរចាប់អារម្មណ៍