.jpg)
គ្រឿងសមុទ្ររសជាតិហឹរមានការពេញនិយមពីយុវវ័យ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ផ្តើមចេញពីការចូលចិត្តញ៉ាំអាហារគ្រឿងសមុទ្រជាមួយនឹងទឹកជ្រលក់ហឹរខ្លាំង ម្ចាស់ហាង Holy Lobster (ហូលី ឡបស្ទើរ) បានបើកដំណើរការហាងរបស់ខ្លួនប្រមាណជាងកន្លះឆ្នាំ និងកំពុងទទួលបានការគាំទ្រយ៉ាងច្រើនពីសំណាក់ភ្ញៀវដែលចូលចិត្តរសជាតិម្ហូបក្រៅផ្ទះ។
ម្ចាស់ហាងហូលី ឡបស្ទើរ បានរៀបរាប់ថា៖ «ខ្ញុំចូលចិត្តដើរលេង ហើយញាំគ្រឿងសមុទ្រ តែខ្ញុំឃើញថានៅភ្នំពេញយើង កន្លែងលក់បង្កងអាំង គ្រឿងសមុទ្រអីហ្នឹង អត់មានច្រើនកន្លែងទេ ហើយតម្លៃថ្លៃទៀត បើមានភាគច្រើននៅតាមហាងប៊ូហ្វេ អ៊ីចឹងខ្ញុំក៏នឹកបង្កើតកន្លែងលក់គ្រឿងសមុទ្រហូលី ឡបស្ទើរហ្នឹង»។
ជាមួយការតុបតែងហាងដោយតាំងបង្ហាញនូវរូបភាពម្ហូបជាច្រើនប្រភេទនៅលើជញ្ជាំង ហាង ហូលី ឡបស្ទើរ មានម្ហូបពិសេសប្រចាំហាងដូចជា បង្កងអាំងអំបិល ចានតូចតម្លៃ ៣៥ ០០០ រៀល និងចានធំ តម្លៃ ៤៥០០០ រៀល ក្តាម Holy (ហូលី) តម្លៃ ២៨ ០០០ រៀល ត្រីសាំបាក់បំពង តម្លៃ ១៥ ០០០ រៀល ងាវអប់ទឹកស៊ីអ៊ីវ តម្លៃ ១២០០០ រៀល ប្រហិតក្រឡុក ៨ ០០០ រៀល តៅហូ និងមឹកអាំង ១ ចង្កាក់តម្លៃ ២ ០០០ រៀល។
ជាមួយការរចនារូបភាពម្ហូបស្អាតៗ និងសំណេរប្លែកៗភ្ញៀវក៏មិនរំលងលើកទូរស័ព្ទថតសែលហ្វ៊ី។ រូបថត យូសុះ អាប់ឌុលរ៉ាស់ហ៊ីម
បន្ថែមពីនេះ ហូលី ឡបស្ទើរ ក៏មានអាហារបែបគ្រឿងសមុទ្រជាច្រើនទៀតដូចជា ក្តាមអាំងគ្រឿងម្ទេស តម្លៃ ២៤០០០ រៀល ក្តាមបំពងខ្ទឹមស តម្លៃ ២៤ ០០០ រៀល បង្កងឆាជូរអែម តម្លៃ ១៨ ០០០ រៀល បង្គាញាំស្វាយខ្ជី តម្លៃ ១២ ០០០ រៀល ព្រុយត្រីសាលម៉ុនអប់ទឹកស៊ីអ៊ីវតម្លៃ ១០ ០០០ រៀល រួមទាំងអាហារចង្កាក់ និងអាហារផ្សេងជាច្រើនមុខទៀត។
សម្រាប់សេវាកម្មដឹកជញ្ជូនចម្ងាយជិតតម្លៃ ១ ដុល្លារឆ្ងាយ ២ ដុល្លារ និងក្រៅក្រុងតម្លៃ ៣ ដុល្លារ។
ទន្ទឹមនឹងនេះកញ្ញាម្ចាស់ហាង វ័យ ២៥ ឆ្នាំរូបនេះបានបង្ហាញពីចំណុចពិសេសរបស់ហាងខ្លួនថា៖ «យើងមានគ្រឿងសមុទ្រធានាថាធម្មជាតិគឺយើងយកមកផ្ទាល់ ហើយតម្លៃវិញគឺសមរម្យ។ មួយទៀតយើងមានគ្រឿងផ្សំពិសេសប្រចាំហាង ជាពិសេសទឹកជ្រលក់ធានាថាឆ្ញាញ់ប្លែក»។ សម្បូរទៅដោយអាហារចម្រុះអាំង បំពង ស្ងោរ អប់ ឆា ហាងហូលី ឡបស្ទើរ មានទឹកជ្រលក់បីរសជាតិ ឆ្ញាញ់ជាប់ចិត្តគឺទឹកជ្រលក់ជួរអែមទឹកជ្រលក់គ្រឿងសមុទ្រ និងទឹកជ្រលក់ពណ៌បៃតងដែលមានរសជាតិហឹរខ្លាំងត្រូវចិត្តអ្នកចូលចិត្តញាំហឹរ។
ចាប់បើកទទួលភ្ញៀវពីម៉ោង ១១ ព្រឹកដល់ម៉ោង ១០ យប់ហូលី ឡបស្ទើរមានបុគ្គលិករួសរាយរាក់ទាក់ដែលភាគច្រើនជាសិស្សនិស្សិត ទំនេរពីការសិក្សាធ្វើការក្រៅម៉ោងរកប្រាក់ដើម្បីដោះស្រាយជីវភាពរស់នៅ។
នៅក្នុង ១ ថ្ងៃហាង ហូលី ឡបស្ទើរទទួលភ្ញៀវបានប្រមាណជាង ២០០ នាក់ហើយពេលខ្លះក៏ពុំមានកន្លែងសម្រាប់ទទួលភ្ញៀវថែមទៀតផង។ ម្ចាស់ហាងគ្រោងនឹងពង្រីកទំហំហាងក៏ដូចជាបន្ថែមសាខារបស់ខ្លួនបន្ថែមទៀតផងដែរ។
ហាង ហូលី ឡបស្ទើរ មានទីតាំងនៅតាមបណ្តាយផ្លូវ ១១៨ ជាប់ Gogi Korean BBQ ក្រោយ KIO សាខាសាកលវិទ្យាល័យភូមិន្ទភ្នំពេញ។ ទំនាក់ទំនងទូរស័ព្ទ ០១០ ២២៥៥១១ និងហ្វេសប៊ុកឈ្មោះ Holy Lobster៕
វីដេអូ៖
