ភ្នំពេញ : គ្រាន់តែមកដល់អគារឡារ៉ូស ពណ៌សដ៏ស្កឹមស្កៃលើដងវិថីព្រះនរោត្តម ក្លិនស្លឹកគ្រៃដ៏ក្រអូបឈ្ងុយឈ្ងប់បានភាយចេញមកធ្វើឲ្យបណ្ដាភ្ញៀវដែលមកទីនេះមានអារម្មណ៍ល្ហែល្ហើយផ្លូវកាយចិត្ត។
ក្រៅពីបម្រើការជាសណ្ឋាគារប្រភេទប៊ូទិក និងកន្លែងស្ប៉ានោះ ឡារ៉ូសក៏មានភោជនីយដ្ឋាននៅជាន់ក្រោមដែលមានបរិយាកាសដ៏សែនមនោរម្យផងដែរ។
ឈានជើងចូលខាងក្នុងពន្លឺភ្លើងដ៏ស្រទន់ និងជញ្ជាំងពណ៌ក្រហម ត្រូវបានរចនាតុបតែងបន្ថែមដោយក្បូរក្បាច់បុរាណខ្មែរនិងរចនាប័ទ្មបស្ចិមប្រទេសបែបទំនើប។
ផ្ទាំងគំនូរ កញ្ចក់ក្បាច់ ទម្រទៀន និងវាំងននស្បៃធ្វើឲ្យបន្ទប់ទទួលទាននេះមានភាពប្រពៃឥតខ្ចោះ។
គ្រាន់តែចូលអង្គុយភ្លាម បុគ្គលិកនារីដ៏រួសរាយរាក់ទាក់បានចេញមកជម្រាបសួរស្វាគមន៍យ៉ាងកក់ក្ដៅ ជាមួយនឹងបញ្ជីរាយនាមមុខម្ហូប ព្រមទាំងភេសជ្ជៈ និងស្រាក្រឡុកជាច្រើនមុខផងដែរ។
មុខម្ហូបដែលគួរឲ្យទាក់ទាញ នឹងត្រូវលើកយកមកបង្ហាញមិត្តអ្នកអានថ្ងៃនេះគឺ ឡារ៉ូសសាលាដ (crispy noodle salad) ដែលជាញាំសាច់គោ បង្គា ជាមួយនឹងនំបញ្ចុកក្រៀម។ សូមរីករាយនឹងវិធីចម្អិនរបស់វាដូចខាងក្រោម៖
គ្រឿងផ្សំ : សាច់គោ បង្គា ប៉េងប៉ោះពណ៌លឿង សាលាដស្វាយ ស្ពៃក្ដោប នំបញ្ចុកក្រៀម ការ៉ុដ ជីររណារ ជីរនាងវង សណ្ដែកដីលីង ម្ទេសហាវ៉ៃ ខ្ទឹមស ទឹកត្រី ស្ករស និងម្សៅស៊ុប។
វិធីចម្អិន : ដំបូងត្រូវយកនំបញ្ចុកក្រៀមទៅបំពងប្រេងឲ្យឡើងស្រួយ សឹមស្រង់ដាក់កន្ត្រងឲ្យស្រក់ខ្លាញ់អស់។ បន្ទាប់មកត្រូវយកសាច់គោទៅអាំងឲ្យឆ្អិនល្មម រួចសឹមហាន់ជាចំណិតស្ដើងៗល្មមប៉ុនម្រាមដៃ។
យកបង្គាស្រស់ទៅស្រុស រួចវះខ្នង បកសម្បកឲ្យស្អាត។
រៀបចំបន្លែញាំ ដោយយកស្ពៃក្ដោប ប៉េងប៉ោះពណ៌លឿង ការ៉ុដ ជីររណារ ជីរនាងវង និងម្ទេសហាវ៉ៃ មកហាន់ជាចំណិតតូចៗរួចទុកក្នុងចានគោមសម្រាប់ញាំ។
បន្ទាប់មកចាប់ផ្ដើមធ្វើទឹកត្រីដោយបុកខ្ទឹមស និងម្ទេសដៃនាងឲ្យម៉ដ្ឋល្មម មុននឹងចាក់ទឹកក្ដៅបន្តិច ហើយបន្ថែមទឹកត្រី ស្ករស និងក្រូចឆ្មារ ហើយកូរឲ្យចូលជាតិគ្នានោះជាការស្រេច។
ដំណាក់កាលចុងក្រោយត្រូវរៀបនំបញ្ចុកក្រៀមនៅបាតចាន។ យកបន្លែខាងលើមកញាំជាមួយបង្គា និងសាច់គោ រួចចាក់ទឹកត្រីបុកច្របល់ចូលគ្នាឲ្យសព្វ។ ដួសញាំបន្លែសាច់គោ និងបង្គាដាក់ពីលើនំបញ្ចុកក្រៀម ហើយបន្ថែមជីរនាងវងបន្តិចជាកិច្ចបង្ហើយ។
ឡារ៉ូស មានបម្រើអាហារពេលព្រឹក ថ្ងៃត្រង់ និងល្ងាច ព្រមទាំងកាហ្វេ និងភេសជ្ជៈផ្សេងៗភ្ជាប់នឹងសេវា wifi ផងដែរ។ ឡារ៉ូស ស្ថិតនៅអគារលេខ១៦៤B មហាវិថីព្រះនរោត្តម។ ទាក់ទងទូរស័ព្ទលេខ ០៦៨ ៧៧ ៧៧ ៧៧៕
