The Phnom Penh Post Search

Search form




Logo of Phnom Penh Post newspaper Phnom Penh Post - អណ្ដាត​ទា​បំពង​ខ្ទឹម​ស​ឈ្ងុយ​ឆ្ងាញ់​ស្រួយ​ខ្ញោក




អណ្ដាត​ទា​បំពង​ខ្ទឹម​ស​ឈ្ងុយ​ឆ្ងាញ់​ស្រួយ​ខ្ញោក

Content image - Phnom Penh Post
អណ្ដាត​ទា​បំពង​ស្រួយ​បន្ថែម​ក្លិន​ឈ្ងុយ​ដោយ​ខ្ទឹម​។ ឈឹម ស្រីនាង

អណ្ដាត​ទា​បំពង​ខ្ទឹម​ស​ឈ្ងុយ​ឆ្ងាញ់​ស្រួយ​ខ្ញោក

ភ្នំពេញ: អង្គុយ​ទទួល​ទាន​អាហារ​ក្នុង​ហាង​ដ៏តូច​ល្មម​ទំហំ​ប៉ុន​ផ្ទះ​ល្វែង​ក៏ពិត​មែន ប៉ុន្តែ​អ្នក​អាច​មាន​អារម្មណ៍​ស្រឡះ​ភ្នែក បីដូច​ជា​កំពុង​ញ៉ាំ​អាហារ​នៅ​ទីធ្លា​ជាប់​ជញ្ជាំង​ផ្ទះ។

ជាមួយ​គំនូរ​បង្អួច​ចម្រុះ​ពណ៌ អម​ដោយ​បង្គោល​អំពូល​ភ្លើង​បំភ្លឺ​ថ្នល់​លក្ខណៈ​បញ្ឆោត​ភ្នែក ទាំងនេះ​គឺជា​ទិដ្ឋភាព​នៅក្នុង​អាហារដ្ឋាន The Street ស្ថិតនៅ​ផ្ទះ​លេខ ២០២ ផ្លូវ ១៤៣ សង្កាត់​បឹងកេង​កង ២។

ក្រៅពី​ការ​រចនា​តុបតែង​ហាង​ឲ្យមាន​លក្ខណៈ​ដូចជា​នៅ​តាម​ដងវិថី រសជាតិ​ចំណី​ចំណុក​លក់តាម​ចិញ្ចើម​ថ្នល់ដ៏​ឆ្ងាញ់​ក៏បាន​អន្ទងចិត្ត​មនុស្ស​គ្រប់វ័យ​ឲ្យឈប់​ម៉ូតូ​រថយន្ត​ចុះ​សំចត​ទទួល​ទាននៅ​ហាង The Street នេះផង​ដែរ។

ហាង​នេះ​បាន​នាំ​យក​រសជាតិ​អាហារ​ចិញ្ចើម​ថ្នល់​មកកែ​ច្នៃលក់​ប្រកប​ដោយ​អនាម័យ មាន​កន្លែង​អង្គុយ​សមរម្យ និង​ចំណត​យាន​ជំនិះ​ងាយ​ស្រួល​សម្រាប់​ភ្ញៀវ​ទាំង​ឡាយ។

ម្ហូប​អាហារ​នៅក្នុង​ហាង​នេះ​មានដូច​ជា​ប្រហិត​ភ្នំភ្លើង​ទឹក​កក ក្ដាម​សេះ​អាំង កង្កែប​អាំង​អំបិល​ម្ទេស ប្រហិត​ត្រីរុំ​គល់ស្លឹក​គ្រៃ សាច់ជ្រូក​អាំង​ចង្កាក់ សាច់​គោរុំ​ផ្សិត​ម្ជុល​ ជើង​មាន់​បំពង​ខ្ទឹម​ស ឆ្អឹង​ជំនីរ​បំពង​ខ្ទឹម​ស ផ្សិតខ្មៅ​ញាត់​ប្រហិត​ត្រី​បំពង ព្រុយត្រី​សាល់​ម៉ុន​អាំង​អំបិល​ម្ទេស​ និង​អាហារ​ជាច្រើន​មុខទៀត។

សម្រាប់​ថ្ងៃនេះ ម្ហូប​ប្លែក​ពិសេស​ដែល​ពីមុន​ល្បី​នៅ​តាម​​បណ្ដា​ហាង​ម្ហូបចិន​នោះ ​ត្រូវបាន​ហាង The Street យក​មក​ចម្អិន​បម្រើ​ជូន​ភ្ញៀវ។ នោះ​គឺ​អណ្ដាត​ទា​បំពង​ ដែល​មាន​រសជាតិ​ឆ្ងាញ់ អាច​ញ៉ាំជា​អាហារ​សម្រន់​ពេល​ល្ងាច។

អណ្ដាត​ទាត្រូវ​បាន​គេយក​ទៅ​ប្រឡាក់​ម្សៅស៊ុប និង​ស្ករស​បន្តិច រួចយក​ទៅ​បំពង​ប្រេង​ឲ្យ​ឆ្អិនល្អ​ ឡើង​ពណ៌​ក្រហម។ ខ្ទឹម​ស​ចិញ្ច្រាំ​លីង លាយ​ជាមួយ​ស្លឹក​ខ្ទឹម​ស្រស់​ និង​ម្ទេស​ត្រូវបាន​រោយ​ពីលើ​អណ្ដាត​ទា​ដែល​ឆ្អិនរួច។

ក្លិន​ឈ្ងុយ​នៃ​ខ្ទឹម​លីង រួម​ទាំង​អណ្ដាត​ទា​ស្រួយ​ខ្ញោក ធ្វើ​ឲ្យអ្នក​ញ៉ាំ​វា​មួយចាន​ហើយ​មួយ​ចាន​ទៀត។ ​The Street មាន​ទូរស័ព្ទ​លេខ ០៦០ ៦៦៦ ៦៣៦៕

អត្ថបទគួរចាប់អារម្មណ៍