ភ្នំពេញៈ ចាប់ផ្តើមពីការលក់តាមចិញ្ចើមផ្លូវរហូតដល់សឹងគ្មានកន្លែងឲ្យភ្ញៀវមកអង្គុយទទួលទាន ចុងភៅធ្លាប់ប្រឡងកម្មវិធី Master Chef ខ្មែរត្រឹមវគ្គជម្រុះ ១២ នាក់លោក អៀង ដារិទ្ធ បានសម្រេចចិត្តបើកជាហាងលក្ខណៈផ្ទះល្វែងដែលបម្រើនូវរសជាតិបុកល្ហុងគ្រប់ជាតិសាសន៍ស្ថិតនៅខាងក្រោយផ្សារឈូកមាស។
លោក អៀង ដារិទ្ធ វ័យ ៣៨ ឆ្នាំជាម្ចាស់ហាង «បុកល្ហុងពិសេស» បានប្រាប់ ភ្នំពេញ ប៉ុស្តិ៍ ថា៖ «ខ្ញុំគឺជាអ្នកបុកល្ហុងលក់នៅតាមចិញ្ចើមផ្លូវយូរណាស់មកហើយ ដោយប្រើរទេះតាំងពីនៅសៀមរាបមកម្ល៉េះ ហើយក៏អត់មានអីពិសេសដែរចំពោះការបុកល្ហុងរបស់ខ្ញុំ។ បន្ទាប់ពីខ្ញុំបានប្រលងនៅក្នុងកម្មវិធី Master Chef ខ្មែរ ក៏មានបងប្អូនស្គាល់ខ្ញុំច្រើន និងមកគាំទ្របុកល្ហុងខ្ញុំកាន់តែច្រើនឡើង ខ្ញុំក៏សម្រេចចិត្តបើកជាហាងតែម្តង»។
ហាង បុកល្ហុងពិសេស មានលក់បុកល្ហុងធម្មតា (៥០០០ រៀល) បុកល្ហុងបែកឦសាន បុកមី បុកពោត (៦០០០រៀល) បុកស្វាយគ្រឿងសមុទ្រ គ្រឿងសមុទ្រក្រឡុក បុកមី ពោត ល្ហុងជាមួយគ្រឿងសមុទ្រ (៩០០០រៀល) និងមានជាប្រភេទបំពងមានតម្លៃចាប់ពី ៣ ពាន់រៀលរហូតដល់ ៨ ពាន់រៀល។
ប្រភេទអាំងតម្លៃចាប់ពី ១ ពាន់រៀលដល់ ១ ម៉ឺនរៀល។ ក្រៅពីបុកល្ហុង ហាងក៏មានបម្រើនូវភ្លាគ្រឿងសមុទ្រដាក់ថាសធំតម្លៃ ៣៥០០០៛ និងខួរជ្រូកចំហុយមួយចានមានតម្លៃ ៦០០០៛។ ចំពោះផ្នែកបង្អែមវិញ មានបម្រើការ៉េមដាក់កែវ និងការ៉េមក្នុងផ្លែដូង រួមទាំងជម្រើសភេសជ្ជៈទូទៅជាច្រើនមុខទៀត។
លោក អៀង ដារិទ្ធ បានបញ្ជាក់ពីរសជាតិដែលទាក់ចិត្តភ្ញៀវមកទទួលទាន ដោយសារតែការផ្សំគ្រឿងពិសេសៗ ៤ ទៅ ៥ មុខក្នុងការបុកល្ហុងឲ្យបានមួយចាន។
រីឯគ្រឿងផ្សំសំខាន់ៗដែលត្រូវប្រើគឺនាំចូលមកពីប្រទេសថៃខ្លះ និងមាននៅក្នុងស្រុកខ្លះផងដែរ។
ខណៈហាង បុកល្ហុងពិសេស របស់លោកទទួលបានការគាំទ្រច្រើន លោកក៏បានបង្ហាញនូវក្ដីស្រមៃតាំងពីក្មេងដោយផ្ដើមពីការសន្សំដើមទុន និងការបង្កើនចំណេះដឹងបន្ថែម ដើម្បីឆ្ពោះទៅរកគោលដៅបើកហាងអាហារបែបអឺរ៉ុបនៅថ្ងៃអនាគត។
លោក អៀង ដារិទ្ធ ដែលកូនស្រីមានឈាមជ័រជំនាញចម្អិនម្ហូបនោះក៏បានរំលេចពីបំណងអនាគតថា៖ «ខ្ញុំស្រឡាញ់ការធ្វើម្ហូបអឺរ៉ុប ប៉ុន្តែខ្ញុំមិនទាន់បានសម្រេចបំណងដោយសារហាងអាហារអឺរ៉ុបត្រូវចំណាយដើមទុនច្រើន ទើបអាចដំណើរការទៅបាន ប៉ុន្តែខ្ញុំក៏មិនបោះបង់ដែរ ពេលនេះគឺសន្សំលុយសិន»។
ហាង បងរឹទ្ធ បុកល្ហុងពិសេសមានទីតាំងនៅភូមិដំណាក់ សង្កាត់ក្រាំងធ្នង់ ខណ្ឌពោធិ៍សែនជ័យ ខាងក្រោយផ្សារឈូកមាស។ ទាក់ទងតាមទូរស័ព្ទលេខ ០៩៦ ៩០៣ ៣៨៨៣៨ និង ០៩៣ ៨១០ ៣៨០៕