ភ្នំពេញ : ស្ថិតនៅជិតស្ថានទូតអូស្ត្រាលីហាង«ផ្ទះត្រាវ» ដែលទើបតែបើកសម្ពោធកាលពីថ្មីៗនេះ តែងមានសភាពអ៊ូអររាល់ៗល្ងាច ដោយសារតែទីនោះសម្បូរមុខម្ហូបច្នៃប្រឌិតថ្មីៗខុសប្លែកពីហាងដទៃដូចជា ប្រហិតសាច់ កង្កែបខ្យងខ្ទិះអាំង និងបាយ ក្ដាំងពិសេស គោអាំងក្រដាសជាដើម។ គ្រាន់តែឮឈ្មោះមុខម្ហូបនេះភ្លាមប្រិយមិត្តមុខជាងឿងឆ្ងល់មិនខានថាតើ ហេតុអ្វីបានជាគេឲ្យឈ្មោះមុខម្ហូបនេះថាជាគោអាំងក្រដាសដូច្នោះ។
គ្រឿងផ្សំរបស់មុខម្ហូបនេះមានសាច់គោ គល់ស្លឹកគ្រៃ រំដេង ខ្ជាយ ខ្ទឹមស ម្ទេស ស្លឹកក្រូចសើច ការ៉ុត ត្រាវ ប៉េងប៉ោះខ្ចី ម្ទេសហាវ៉ៃ ត្រសក់ អំបិល ស្ករស និងម្សៅស៊ុប។
គល់ស្លឹកគ្រៃ រំដេង ខ្ជាយ ខ្ទឹមស ម្ទេស ស្លឹកក្រូចសើច អំបិល ស្ករស និងម្សៅស៊ុបមកញាំជាមួយចំណិតសាច់គោឲ្យចូលជាតិ។ នៅពេលទទួលទានត្រូវដាក់សាច់គោលើក្រដាស(ប្រភេទក្រដាសបឺតខ្លាញ់) លើឆ្នាំងភ្លើងជាមួយប៊័រ និងប្រេងឆា។ គោអាំងក្រដាសនេះគឺជាអាហារធ្វើពីសាច់គោ និងគ្រឿងផ្សំបែបហឹរ ដែលគេចម្អិនក្ដៅៗលើចង្ក្រានភ្លើងជាមួយប៊័រ និងខ្លាញ់ រួចទទួលទានជាមួយបន្លែ និងទឹកត្រីកោះកុង នោះប្រាកដជាឆ្ងាញ់មាត់ជាមិនខាន។
បើចង់ដឹងថា គោអាំងក្រដាសមានរសជាតិឆ្ងាញ់យ៉ាងណានោះ លោកអ្នកក៏អាចទៅភ្លក្សអាហារនេះផ្ទាល់នៅភោជនីយដ្ឋាន ផ្ទះត្រាវ ស្ថិតនៅជិតស្ថានទូតអូស្ត្រាលី នៅម្ដុំផ្លូវឡើងទៅស្ពានឆ្ពោះទៅកាន់កោះពេជ្រ។ ទូរស័ព្ទ ០៦៩ ៦១ ៩៩ ១៦ និង០៦៩ ២៦ ៧៦ ៧២៕
