សៀមរាប: អាម៉ុក ជាប្រភេទមុខម្ហូបការីម្យ៉ាងដែលចម្អិនតាមប្រពៃណីដោយចំហុយក្នុងកន្ទោងស្លឹកចេក ជាមួយខ្ទិះដូង និងខ្ជាយគឺជាគ្រឿងផ្សំគោល។ អាម៉ុកត្រូវបានស្គាល់ជាមុខម្ហូបអត្ដសញ្ញាណជាតិកម្ពុជាមួយ និងពេញនិយមនៅឡាវ និងថៃផងដែរ។
នៅលើទីតាំងកំពុងពេញនិយមនៃតំបន់ Pub Street និងផ្សារចាស់ ភោជនីយដ្ឋានស្ទឹងសៀមរាបស្ថិតក្នុងសណ្ឋាគារស្ទឹងសៀមរាប រចនាប័ទ្មបារាំងបានបង្ហាញនូវមុខម្ហូបប្រចាំអត្ដសញ្ញាណខ្មែរនេះដោយចម្អិនតាមវិធីសាស្ដ្រកូនកាត់ ដើម្បីជាការចំណេញពេលវេលា និងរក្សារសជាតិឲ្យនៅឈ្ងុយបានយូរ។
លោក ជួប ជុំ ចូលបម្រើការងារក្នុងវិស័យម្ហូបអាហារតាំងពីឆ្នាំ ១៩៨៥ ដែលផ្ដោតសំខាន់លើមុខម្ហូបខ្មែរសម្រាប់ភ្ញៀវក្នុងស្រុក និងបរទេសដែលចង់ភ្លក្សមុខម្ហូបជាតិបាននិយាយថា៖ «ការចម្អិនរបៀបខ្មែរត្រូវចំណាយពេលយូរ ហើយដូចដែលយើងបានធ្វើនេះ វាជាវិធីចម្អិនបែបកូនកាត់ដោយកាត់បន្ថយការចំណាយពេលបានច្រើន»។
នៅក្នុងភោជនីយដ្ឋានដែលស្វាគមន៍ទាំងភ្ញៀវស្នាក់នៅក្នុងសណ្ឋាគារជាង ៧០ បន្ទប់ព្រមទាំងទេសចរដើរផ្សាររាត្រី និង Pub Street មេចុងភៅបម្រើការនៅភោជនីយដ្ឋានស្ទឹងសៀមរាប ១០ ឆ្នាំលោក ជួប ជុំ បានរៀបរាប់គ្រឿងផ្សំ និងវិធីចម្អិនអាម៉ុកត្រី រូបមន្ដប្រចាំភោជនីយដ្ឋានត្រួសៗ។
លោកបាននិយាយថាគ្រឿងផ្សំអាម៉ុកមានគល់ស្លឹកគ្រៃ ខ្ទឹម រំដេង ខ្ជាយ រមៀត ក្រូចសើច ជាពិសេសសាច់ត្រីឆ្ដោ ឬត្រីរ៉ស់ពន្លះរួច ដែលគ្មានឆ្អឹងរំខានពេលទំពា។
លោក ជួប ជុំ បានឲ្យដឹងថា៖ «ភ្ញៀវខ្មែរយើងមិនប្រកាន់នឹងសាច់ត្រីដែលនៅជាប់ឆ្អឹងនោះទេ។ ប៉ុន្ដែភ្ញៀវបរទេស គាត់មិនហូបទេ បើសាច់ត្រីមានជាប់ឆ្អឹងពិបាកទំពាពីព្រោះគាត់ហូបអស់ៗដោយមិនចង់ខ្ជាក់ឆ្អឹងចោលដូចខ្មែរយើងធ្លាប់ហូបនោះទេ»។
ចំពោះវិធីធ្វើ មេចុងភៅប្រចាំភោជនីយដ្ឋានផ្ទុកមនុស្ស ៦០ នាក់ទាំងនៅក្នុងបរិវេណ និងក្បែរអាងទឹកបានប្រាប់ថា គល់ស្លឹកគ្រៃ ខ្ទឹម រំដេង ខ្ជាយ រមៀត បុកចូលជាមួយគ្នារួចកោសក្រូចសើចលាយដើម្បីបង្កើនរសជាតិឲ្យកាន់តែឈ្ងុយ និងប្រឡាក់ជាមួយសាច់ត្រីឲ្យសព្វ។
លោក ជួប ជុំ បានបន្ថែមថាយកខ្ទិះដូងលីងជាមួយខ្ទឹមបារាំងឲ្យរាងទន់ ដាក់ត្រីប្រឡាក់គ្រឿងខាងលើចូលឲ្យឆ្អិនសាច់ត្រីបន្ដិច។ ពេលទឹកខ្ទិះលីងរាងខាប់ហើយ ទើបគោះពងមាន់ ១ គ្រាប់។
លោកបានពន្យល់ថា៖ «បើយើងចម្អិនតាមរបៀបរបបខ្មែរតាមប្រពៃណី យើងត្រូវខ្ទប់គ្រឿង និងសាច់ត្រីក្នុងកន្ទោងស្លឹកចេក ដាក់ចំហុយរយៈពេល ៣០ នាទី។ បើយើងប្រើវិធីកូនកាត់ដោយការឆាចម្អិនក្នុងខ្ទះ វាប្រើពេលតិចត្រឹមប៉ុន្មាននាទី»។
ទោះជាចម្អិនបែបផ្លូវកាត់បន្តិចមែន តែមេចុងភៅ ជួប ជុំ បានអះអាងថា៖ «ប៉ុន្ដែបើប្រៀបធៀបចំពោះរសជាតិវិញ វាប្រហាក់ប្រហែលគ្នាអាស្រ័យទៅលើចំណូលចិត្ដភ្ញៀវ ដែលចូលចិត្ដបែបចំហុយ ឬបែបឆា។ អាម៉ុកចំហុយអាចនឹងធ្លាក់រសជាតិខ្សោះពេលទុកយូរ។ ប៉ុន្ដែអាម៉ុកកូនកាត់អត់បញ្ហាទេពេលទុកចុះត្រជាក់យូរ»។
អាម៉ុកសាច់ត្រី ឬសាច់មាន់ជាមួយបាយសមានតម្លៃ ២៦០០០ រៀល ឬ ៦,៥ ដុល្លារ នៅលើតារាងមុខម្ហូបភោជនីយដ្ឋានក្នុងសណ្ឋាគារបែបប្រណីតបុរាណ ស្ថិតលើទីតាំងកំពុងពេញនិយមនៃតំបន់ Pub Street។
ភោជនីយដ្ឋានស្ទឹងសៀមរាបក្នុងសណ្ឋាគារស្ទឹងសៀមរាបស្ថិតលើផ្លូវ ៩ សង្កាត់ស្វាយដង្គុំ ស្វាគមន៍ភ្ញៀវពីម៉ោង ៦ ព្រឹកដល់ ១០ ព្រឹកម៉ោង ១១:៣០ ដល់ម៉ោង ២:៣០ រសៀល និងម៉ោង ៦:៣០ ល្ងាចដល់ម៉ោង ១១:០០ យប់រៀងរាល់ថ្ងៃ៕
វីដេអូ៖