ក្រុងស៊ីដនី៖ ភីហ្សា និងស្រាបៀរ ត្រូវបានប្រើយន្តហោះដឹកទៅកាន់តំបន់ Outback ដាច់ស្រយាលខ្សត់មនុស្សរស់នៅនៃប្រទេស អូស្ត្រាលី ក្នុងបំណងផ្ដល់ «ក្ដីសុខតិចៗ» ដល់ពលរដ្ឋ ដែលរស់នៅឯកា ខណៈមានការរឹតបន្តឹងការធ្វើដំណើរដោយសារតែការរីករាលដាលនៃវីរុសកូរ៉ូណា។
សណ្ឋាគារ Dunmarra Wayside Inn ដែលជាទូទៅធ្លាប់តែមមាញឹកនឹងភ្ញៀវកុះករមកទទួលទានអាហារ នៅតំបន់ភាគខាងជើងអូស្ត្រាលី បានប្រើប្រាស់យន្តហោះខ្នាតតូចសាកល្បង ដោយសង្ឃឹមថានឹងបន្តហោះហើររៀងរាល់សប្ដាហ៍ សម្រាប់ចែកចាយការកុម្ម៉ង់អាហារ និងភេសជ្ជៈនៅទីដាច់ស្រយាល។
លោក Ben Anderson អ្នកគ្រប់គ្រងសណ្ឋាគារ និងជាចុងភៅចម្អិនភីហ្សាបានប្រាប់ AFP ថា៖ «ស្ថានីយដែលយើងនឹងបញ្ជូនម្ហូបអាហារទៅនោះ ពួកគេពិតជាពេញចិត្តពេញថ្លើមនឹងសេវាកម្មនេះណាស់ ហើយពួកគេញ៉ាំទាំងពេលល្ងាច និងទុកស្អែកសម្រាប់ញ៉ាំពេលព្រឹកទៀត»។
លោកបានព្យាយាមលាក់បាំងសេវាកម្មដឹកជញ្ជូនតាមយន្តហោះនេះរហូតដល់មានកាលវិភាគជាក់លាក់។
លោក អេនឌើរសិន បានបន្តទៀតថា៖ «យើងបានដាក់ឡដុតភីហ្សាខ្នាតធំ ដែលយើងខំរក្សាវាជាអាថ៌កំបាំង»។
ប៉ុន្តែព័ត៌មាននេះលាក់មិនជិត ដោយសារតែមានអ្នកសារព័ត៌មានជាច្រើនបានលេចឮពីការប្រើប្រាស់យន្តហោះខ្នាតតូចដឹកភីហ្សា និងស្រាបៀរទៅឲ្យប្រជាជននៅតំបន់ outback (តំបន់ដាច់ស្រយាលខ្សត់មនុស្សរស់នៅ ឯប្រទេស អូស្ត្រាលី)។
លោកបន្តថា៖ «ស្ថានីយវិទ្យុមួយបានទូរស័ព្ទមកស្នើសុំឲ្យយើងដឹកអាហារកាន់ស្ទូឌីយោនៅទីក្រុងភើត ដែលមានចម្ងាយដល់ទៅ ៣ ០០០ គីឡូម៉ែត្រពីហាងរបស់យើង»។
លោកបញ្ជាក់ថា៖ «វាលើសសមត្ថភាពហើយ ពេលនេះយើងត្រឹមតែអាចដាក់គម្រោងហោះហើរទៅកាន់គោលដៅចម្ងាយក្នុងរង្វង់ ១០០ គីឡូម៉ែត្រប៉ុណ្ណោះ»៕ AFP