.jpg)
ភ្ញៀវខ្លះញ៉ាំ ២ ចានឆ្អែត រីឯខ្លះទៀតពី ៣ ទៅ ៤ ចាន។ រូបថត ហ្វេសប៊ុក
ភ្នំពេញៈ ចានតូចៗល្មមត្រូវបានតម្រៀបជាជួរនៅលើតុវែង ជាមួយបរិមាណគុយទាវប្រមាណ ២០ ក្រាមស្រុសក្នុងទឹកស៊ុបរម្ងាស់ជាង ១ ម៉ោងកន្លះបន្ថែមដោយសណ្តែកបណ្តុះ ត្រកួន ទឹកត្រី ខ្លាញ់ សាច់ ប្រហិត ខ្ទឹមលីង ដើម្បីបង្កើនក្លិនឈ្ងុយគួរឲ្យចង់ទទួលទាន។
នេះជាគុយទាវទូករសជាតិដើមបើកថ្មីជាមួយតម្លៃកាន់តែធូរជាងមុន និងបរិមាណច្រើនជាងមុន ២០០០ រៀលក្នុង ១ ចាន។
ស្ថិតនៅលើដងវិថីមុនីរ៉េត ក្បែរផ្សារទំនើបស្ទឹងមានជ័យថ្មី ហាងគុយទាវទូក ហុយហុយ ដែលទើបតែបើកដំណើរការបានរយៈពេលជិត ១ ខែមានភ្ញៀវមកគាំទ្រជាច្រើនតាំងពីម៉ោង ១ រសៀលរហូតដល់បិទហាងនៅម៉ោង ៩ និង ៣០ នាទីយប់។
គុយទាវទូកមានជម្រើសសាច់ជ្រូក និងសាច់គោ ១ ចានតែ ២០០០ រៀល។ រូបថត ហ្វេសប៊ុក
លោក ជា ហ្វឹកលួង វ័យ ២៧ ឆ្នាំជាម្ចាស់ហាងគុយទាវទូក ហុយហុយ បានបរិយាយពីមូលហេតុដែលសម្រេចចិត្តបើកហាងគុយទាវទូកនេះឡើងមកថា៖ «គោលបំណងរបស់ខ្ញុំគឺចង់រំឭកពីគុយទាវទូកចានតូចដែលធ្លាប់មានពីមុន ហើយខ្ញុំក៏ធ្លាប់ឃើញមានគេបើកហាងគុយទាវទូកចានតូចៗនេះដែរ ប៉ុន្តែវាបានបរាជ័យ។ អ៊ីចឹងខ្ញុំក៏ចង់បើកវាឡើងមកវិញ»។
ហាងគុយទាវទូក ហុយហុយ ដែលរចនានូវរូបគំនូរសម្រស់ធម្មជាតិមានសត្វដាយណូស័រដ៏រស់រវើកលើផ្ទៃជញ្ជាំងមានលក់គុយទាវទូក ២ រសជាតិ គឺសាច់ជ្រូក និងសាច់គោ ដែលច្នៃរូបមន្តនៃទឹកស៊ុបខ្លួនឯងតម្លៃត្រឹមតែ ២០០០ រៀល និងប្រភេទមីហឹរតម្លៃត្រឹម ៦០០០ រៀល។
ម្ចាស់ហាងលោក ជា ហ្វឹកលួង ក៏បានធានាពីគុណភាពបន្លែ និងសាច់ថា គ្មានជាតិគីមីដោយមិនបានដើរទិញនៅតាមទីផ្សារនោះទេ។ បន្លែដែលប្រើប្រាស់នៅក្នុងហាងបាននាំចូលមកពីចម្ការនៅស្រុកស្អាងផ្ទាល់។ រីឯសាច់យកមកពីកសិដ្ឋានផ្ទាល់ផងដែរ។
គុយទាវទូក ហុយហុយ ទើបតែបើកដំណើរការបានប្រមាណជិត ១ ខែ។ រូបថត ហ្វេសប៊ុក
លោក ជា ហ្វឹកលួង ក៏បានរៀបរាប់ពីប្រវត្តិផ្ទាល់ខ្លួនខ្លះៗក្នុងការសិក្សាដូច្នេះដែរថា៖ «ពីមុនខ្ញុំជានិស្សិតឆ្នាំទី ២ ផ្នែកគ្រប់គ្រងនៅសាកលវិទ្យាល័យជាតិគ្រប់គ្រង ដោយសារតែខ្ញុំចង់មានអាជីវកម្មខ្លួនឯង ហើយណាមួយខ្ញុំបានស្គាល់ខាងចុងភៅស្រាប់ អ៊ីចឹងខ្ញុំក៏ឈប់រៀនហើយមកបើកអាជីវកម្មខ្លួនឯងតែម្តងដែលដំបូងខ្ញុំលក់ស៊ុបបាន ២ ឆ្នាំហើយ»។
ក្នុង ១ ថ្ងៃហាងគុយទាវទូក ហុយហុយ មានភ្ញៀវមកគាំទ្របានចំនួនជាង ១០០ តុ។
សម្រាប់ភ្ញៀវញ៉ាំច្រើនអាចទទួលទានពី ៣ ទៅ ៤ ចាន តែបើសិនជាភ្ញៀវញ៉ាំតិចអាចទទួលទានបានត្រឹម ២ ចាន។
ម្ចាស់ហាងគុយទាវទូក ហុយហុយ ក៏បានបញ្ជាក់ផងដែរថា៖ «គោលបំណងរបស់ខ្ញុំក្នុងការបើកហាងគុយទាវទូកនេះគឺចង់ឲ្យភ្ញៀវបានទទួលនូវតម្លៃមួយដែលសមរម្យ ទោះបីគាត់ចង់មកញ៉ាំតែ ១ ចានក៏បាន ហើយជាពិសេសនោះគឺគុណភាព និងអនាម័យខ្ពស់ ទោះបីជាគុយទាវទូកមិនថ្លៃពិតមែន តែយើងបានធ្វើវាមកដោយគិតពីសុខភាពភ្ញៀវជាចម្បង»៕
