.jpg)
ផ្លែខ្នុររាប់សិបតោនត្រូវបាននាំចេញទៅបណ្ដាប្រទេសទូទាំងពិភពលោក សម្រាប់កែច្នៃជាអាហារបួស ជំនួសសាច់។ រូបថត AFP
ក្រុងញូវដែលី : ពណ៌បៃតង ស្រោបបន្លាទាល ជាមួយក្លិនក្រអូបឈួលច្រមុះ ផ្លែខ្នុរដ៏ធំធ្ងន់ ប្រែក្លាយពីផល្លាគ្មានអ្នកបេតីក្បែររបងផ្ទះ ទៅជាអាហារចម្អែតក្រពះសម្រាប់អ្នកតមសាច់នៅតំបន់ភាគខាងលិច។
ខ្នុរជាផ្នែកមួយនៃរបបអាហាររបស់ពលរដ្ឋអាស៊ីខាងត្បូងនេះជាច្រើនសតវត្សរ៍។ កាកសំណល់ផ្លែខ្នុររាប់តោនត្រូវបានបោះចោលរៀងរាល់ឆ្នាំ។
ប៉ុន្ដែពេលនេះ តំបន់ឆ្នេរខាងត្បូងប្រទេសឥណ្ឌា ដែលជាប្រទេសផលិតខ្នុរធំបំផុតក្នុងលោក កំពុងធ្វើការវិនិយោគលើជម្រើសអាហារបន្លែជំនួសសាច់ ដែលកែច្នៃដោយក្រុមមេចុងភៅមកពីក្រុងសាន់ហ្វ្រានស៊ីស្កូ រហូតដល់ក្រុងឡុងដ៍ និងញូវដែលហ៊ី សម្រាប់រសជាតិខ្នុរខ្ចី ដែលស្រដៀងនឹងសាច់ជ្រូក។
សាច់ខ្នុរខ្ចី អាចយកទៅប្រឡាក់គ្រឿងឲ្យចូលជាតិ និងចម្អិនឲ្យមានរសជាតិស្រដៀងសាច់ជ្រូក ឬសាច់មាន់ដែរ។ រូបថត AFP
លោក វ៉ាញ៉េស ថារ៉ាកខាន់ បានប្រាប់ AFP ពីចម្ការខ្នុរ ក្នុងស្រុកទ្រីសសួរ នៃរដ្ឋខេរ៉ាឡា ថា៖ «មានការកុម្ម៉ង់យ៉ាងច្រើនពីបរទេស។ ក្នុងកម្រិតស្ដង់ដារអន្ដរជាតិ ចំណាប់អារម្មណ៍ចំពោះផ្លែខ្នុរបានកើនឡើងខ្លាំង»។
ផ្លែឈើ ដែលមានទម្ងន់ ៥ គីឡូក្រាម ជាមធ្យម មានសាច់ពណ៌លឿងពេលទុំ និងអាចទទួលទានបានស្រស់ៗ ឬផលិតជានំ ទឹកផ្លែឈើ ការ៉េម និងនំស្រួយ។ ពេលមិនទាន់ទុំ វាត្រូវបានប្រើជាបន្លែក្នុងសម្លការី ឬឆា ទាំងចិញ្ច្រាំ និងប្រឡាក់គ្រឿងសាតេ។
នៅភាគខាងលិចប្រទេសឥណ្ឌា ផ្លែខ្នុរចំណិតៗបានក្លាយជាជម្រើសអាហារពេញនិយមដែលមានរសជាតិស្រដៀងសាច់ជ្រូក និងត្រូវបានប្រើជាមួយភីហ្សាថែមទៀត។
អ្នកចម្ការនៅឥណ្ឌាមួយចំនួន បានបោះបង់ការបង្កបង្កើនផលដំណាំផ្សេង មកដាំខ្នុរដើម្បីនាំចេញ ដោយសារតែតម្រូវការទីផ្សារខ្ពស់។ រូបថត AFP
លោក អានូ បាមប្រ៊ី ដែលជាម្ចាស់សម្ព័ន្ធភោជនីយដ្ឋានក្នុងសហរដ្ឋអាមេរិក និងឥណ្ឌា បានពន្យល់ថា៖ «អតិថិជនចូលចិត្ដខ្នុរខ្លាំងណាស់។ នំតាកូសស្នូលផ្លែខ្នុរមានការពេញនិយមខ្លាំងនៅគ្រប់ទីតាំងរបស់យើង។ អាហារផ្លែខ្នូរ ដែលកុម្ម៉ង់គ្រប់តុ វាជាសំណព្វចិត្ដខ្ញុំមួយផងដែរ»។
លោក ចេមស៍ ចូស័រ បានលាឈប់ពីការងារជានាយកផ្នែក Microsoft ក្រោយពីមើលឃើញពីចំណាប់របស់ពលរដ្ឋភាគខាងលិចចំពោះផ្លែខ្នុរសម្រាប់ជាជម្រើសអាហារបន្លែជំនួសសាច់។
លោកបានឲ្យដឹងថា៖ «កូរ៉ូណាបង្កការភ័យខ្លាចចំពោះសាច់មាន់ ហើយមនុស្សប្ដូរមកទទួលទានសាច់ផ្លែខ្នុរជំនួសសាច់សត្វវិញ។ នៅរដ្ឋខារ៉ាឡាបម្រាមការធ្វើដំណើរ បានធ្វើឲ្យកើនឡើងតម្រូវការផ្លែខ្នុរ និងគ្រាប់របស់វា ដោយសារតែខ្វះបន្លែ និងសាច់ក្រោយបិទព្រំដែន»។
ផ្លែឈើទម្ងន់ ៥ គីឡូក្រាម ជាមធ្យម មានសាច់ពណ៌លឿងពេលទុំ និងអាចទទួលទានបានស្រស់ៗ ឬផលិតជានំ ទឹកផ្លែឈើ ការ៉េម និងនំស្រួយ។ រូបថត AFP
ពួកគេប្រើផលិតផលផ្សេងៗជំនួសបន្លែ ដូចជា តៅហ៊ូ និងគ្រឿងបំពងស្រួយផលិតពីសណ្ដែកសៀង និងសាច់ប៉ាតេ ផលិតពីស្រូវសាលី និងខ្នុរជាដើម។
លោក ចូស័រ ធ្វើការជាមួយសេវាកម្មស្រាវជ្រាវ Glycemic Index Research Serviceនៃសាកលវិទ្យាល័យស៊ីដនីដើម្បីវាយតម្លៃពីអត្ថប្រយោជន៍ចំពោះសុខភាព។
ក្រៅពីលើកឡើងថា សាច់ខ្នុរអាចប្រឡាក់គ្រឿងចូលជាតិល្អដូចសាច់សត្វ និងងាយស្រួលក្នុងការចម្អិនសម្រាប់អ្នកញ៉ាំបួស លោកក៏បានបន្ថែមពីអត្ថប្រយោជន៍របស់វាដែរថា៖ «ពេលយើងធ្វើការវិភាគលើជីវជាតិរបស់វាយើងបានរកឃើញថា ផ្លែខ្នុរជាសាច់មួយប្រភេទ ដែលល្អជាងបាយ និងនំប៉័ង (រ៉ូទី) សម្រាប់មនុស្សទូទៅដែលចង់គ្រប់គ្រងជាតិស្ករក្នុងឈាម»៕ AFP/HR
លោក ចេមស៍ ចូស័រ បានលាឈប់ពីការងារជានាយកផ្នែក Microsoft ក្រោយពីមើលឃើញសក្ដានុពលផ្នែខ្នុរជាអាហារបន្លែជំនួសសាច់។ រូបថត AFP
