.jpg)
ភ្ញៀវនាំសម្លាញ់ជើង៤មករត់លេង និងលម្ហែកាយពេលរសៀល។ ហុង មិនា
ភ្នំពេញ៖ ហាក់ដូចជាទូវេទមន្តក្នុងរឿងបរទេស Narnia ដែលក្មេងស្រីចូលទូរបស់នាងហើយកាយខោអាវចេញនាងក៏ស្រាប់តែចូលទៅទឹកដីថ្មីផ្សេង។ ទិដ្ឋភាពក្នុងរឿងនេះហាក់ធ្វើឱ្យអ្នកមានអារម្មណ៍ដូចគ្នាពេលបានបោះជំហានចូលមកសួនឧត្តម។
នៅទីក្រុងដ៏អ៊ូអរណែនណាន់តាន់តាប់ដោយយានយន្តម៉ាស៊ីនក្ដៅងំបំភាយផ្សែងហុយសួនឧត្តម បីដូចជាឧទ្យានលាក់ខ្លួនដ៏អាថ៌កំបាំង។
ស្ថិតនៅចំហៀងផ្លូវតែបន្តិច សួនឧត្តមដ៏ស្ងប់ស្ងាត់មានបរិយាកាសត្រជាក់ក្រោមម្លប់ឈើបៃតងត្រឈឹងត្រឈៃខុសប្លែកគ្នាដូចមេឃនឹងដីពីវិថីដ៏កកស្ទះនៃរាជធានីភ្នំពេញ។
វាជាកន្លែងដ៏ល្អឥតខ្ចោះសម្រាប់អ្នកទីក្រុងមកញ៉ាំអាហារ ក្រេបភេសជ្ជៈ ស្រាបៀរ ស្រូបខ្យល់អាកាស និងជាពិសេសអ្នកមានសត្វចិញ្ចឹម។
នៅក្នុងសួនមានរបងព័ទ្ធមួយ ដែលអាចលែងសម្លាញ់ជើង ៤ រត់លេង ខណៈម្ចាស់វាក៏អាចដើរលម្ហែកាយ។
បង្កើតឡើងក្នុងគោលបំណងល្អៗជាច្រើន សួនឧត្តមស្វាគមន៍ភ្ញៀវលក្ខណៈគ្រួសារមានកូនតូចៗ ភ្ញៀវត្រូវការទីធ្លាហាត់ប្រាណ ភ្ញៀវមកអានសៀវភៅ និងភ្ញៀវចង់ដឹកសត្វចិញ្ចឹម ឬលែងវាឱ្យរត់លេងយ៉ាងសេរី ដោយគ្មានគិតសេវាកម្មអ្វីឡើយ។
លោក ស្វេន អេតឡឺ (Sven Adler) ដែលជាប្រធានគម្រោងការអភិវឌ្ឍរបស់ក្រុមហ៊ុន Urban Living Solution (ULS) បានរៀបរាប់ពីប្រវត្តិខ្លីរបស់សួនឧត្តមយ៉ាងដូច្នេះថា៖ «យើងបានសហការជាមួយម្ចាស់ដីមានគម្រោងអភិវឌ្ឍទីនេះ តែពេលយើងបានមកមើលឃើញដើមឈើធំៗផ្ដល់នូវម្លប់ត្រជាក់រហឹម ខ្យល់អាកាសល្អបរិសុទ្ធ យើងគិតថា វានឹងជាអាសាបង់ឥតបានការ បើយើងយកត្រាក់ទ័រមកគាស់កកាយវា ដោយមិនបានប្រើប្រយោជន៍ពីវាអ្វីសោះ»។
ភ្ញៀវញ៉ាំអាហារសម្រន់ក្នុងបរិយាកាសស្រស់ស្រាយ។ រូបថត យូសុះ អាប់ឌុលរ៉ាស់ហ៊ីម
សួនឧត្តមក៏បានកកើតឡើង ដើម្បីបង្ហាញ និងអនុញ្ញាតឱ្យសាធារណជនមកលេងកម្សាន្តបាន ហើយវាក៏ដូចជាការផ្សព្វផ្សាយគម្រោងរបស់លោកផងដែរ មុននឹងលោកសម្រេចធ្វើការសាងសង់នៅខែមេសាឆ្នាំក្រោយ។
លោកបានបន្តទៀតថា៖ «យើងក៏បានអភិវឌ្ឍវាខ្លះតាមដែលអាចធ្វើបាន ព្រោះបើវាគ្រាន់តែជាកន្លែងទូលាយមានតែដើមឈើមិនមានអ្វីសោះ ភ្ញៀវដើរចូលហើយក៏ចេញវិញ។ ពេលនោះហើយដែលអាហារដ្ឋាន Botanico លេចឡើង»។
លោក ហ្គ្រេក ប៊េសស្យឺ (Greg Beshers) ជាម្ចាស់ហាងដែលមានបទពិសោធជាច្រើនឆ្នាំផងដែរ នៅហាងបានបន្ថែមពីលើនោះថា៖ «ថ្ងៃទី ១ ខែសីហា ជាថ្ងៃដែលសួនឧត្ដម និងហាងបានបើក។ យើងបើកដំណាលគ្នា ដើម្បីឱ្យពេលភ្ញៀវគាត់មក គាត់អាចមកសម្រាកកម្សាន្ត ហើយក៏អាចរកអ្វីហូបបានដូចគ្នា ហើយបើគាត់មានសត្វចិញ្ចឹមដូចជាឆ្កែអីគាត់អាចយកមកបាន ដាក់លេងក្នុងទ្រុង ឬលែងវាឱ្យរត់លេងយ៉ាងសេរី»។
លោកបានបញ្ជាក់ពីមុខម្ហូបដែលលោកបានដាក់បម្រើនៅទីនេះថា មិនសូវមានមុខម្ហូបច្រើនមុខដូចហាងរបស់លោកនៅផ្លូវ ២៩ ជិតវិមានឯករាជ្យទេ។ នៅទីនេះមានភាគច្រើនជាម្ហូបញ៉ាំលេង ដូចជា សាំងវិច ប៊ឺហ្គឺរ តែដោយមានការចូលរួមពី ULS ក៏មានការរៀបំកម្មវិធីម្ហូបជាមួយនឹងតន្ត្រី ដែលធ្វើឱ្យលោកបានព្យាយាមទាញយកម្ហូបថ្មីៗ។
ម្ហូបដែលលោកអះអាងថា មានការពេញនិយមច្រើនគឺ សាំងវិច ៧ ដុល្លារ (Club Sandwich) ប៊ឺហ្គឺរ ៧,៧៥ ដុល្លារ (Mini Burger) និង នំបុ័ងទឹកជ្រលក់មានសណ្ដែកដី និងខ្ទឹម (Hummus) ៥ ដុល្លារ។
សួនឧត្តម និង Botanico បើកដំណាលគ្នាតាំងពីដើមខែសីហា។ហុង មិនា
សម្រាប់កម្មវិធីនានា សួនឧត្តមមានសកម្មភាពប្លែកៗជាច្រើនទៀតដែលភ្ញៀវអាចទទួលដំណឹងពីគេហទំព័រហ្វេសប៊ុករបស់សួនឧត្តម និងហាង Botanico។ ជារៀងរាល់ខែ សួនឧត្តមតែងធ្វើកម្មវិធីទីផ្សារកសិករ ដែលកម្មវិធីនេះមានការដាក់លក់ផលិតផលក្នុងស្រុក និងបន្លែសាច់ធម្មជាតិស្រស់ៗផងដែរ។
លោក ស្វេន និង ហ្គ្រេក បានផ្ដាំផ្ញើដល់ភ្ញៀវទាំងអស់ថា ឱ្យត្រៀមខ្លួនសម្រាប់កម្មវិធីក្រោយៗជានិច្ច ព្រោះនៅទីនេះសឹងតែរាល់អាទិត្យ ដែលតែងមានកម្មវិធីសប្បាយៗ និងប្លែកៗនៅលើឆាកតន្ត្រីសួនឧត្ដម។
លោក ស្វេន បានបន្ថែមថា៖ «សួនបើកសម្រាប់គ្រប់គ្នា ដូច្នេះអ្នកដែលចង់មកកម្សាន្តចង់មកចូលរួម គឺយើងស្វាគមន៍គ្រប់គ្នាមិនតម្រូវឱ្យបង់សេវាអ្វីទេ ហើយយើងក៏មានគម្រោងដាក់កន្ទេលពិកនិកនៅសួនផងដែរ»។
ទំហំផ្ទៃដី ៤ ០០០ ម៉ែត្រការ៉េនេះ នឹងមានការអភិវឌ្ឍជាបន្តបន្ទាប់ តែពេលនេះសួននឹងត្រូវបានរក្សាជាទម្រង់ដើម ដោយមានការកែកុនតិចតួចសម្រាប់ទាក់ទាញភ្ញៀវបន្ថែម។
កន្លងមក លោក ស្វេន បានឱ្យដឹងថា ភ្ញៀវមានការពេញចិត្តយ៉ាងខ្លាំង ដែលអាចរកកន្លែងបែបនេះបាននៅទីក្រុងភ្នំពេញ។
មានទីតាំងនៅ ១៥៨-១៦០ ផ្លូវព្រះនរោត្ដម ទល់មុខផ្សារទំនើបជីបម៉ុង សួនឧត្ដម និងអាហារដ្ឋាន Botanico បើកជារៀងរាល់ថ្ងៃចាប់ពីម៉ោង ៨ ព្រឹកដល់ម៉ោង ១១ យប់ពីថ្ងៃចន្ទ ដល់ថ្ងៃព្រហស្បតិ៍ និង ១២ យប់នៅថ្ងៃសុក្រ និងសៅរ៍ និងត្រឹម ៧ យប់នៅថ្ងៃអាទិត្យ៕
សួនឧត្តម ស្វាគមន៍ភ្ញៀវ ជាពិសេសអ្នកដែលមានសត្វចិញ្ចឹម ដោយឥតគិតថ្លៃ។ហុង មិនា
វីដេអូ៖
