ភ្នំពេញៈ រូបមន្តទឹកជ្រលក់ធ្វើពីកាពិ និងបទពិសោធនៃការចូលចិត្តដើរញ៉ាំអាហារច្រើនកន្លែងបានធ្វើឲ្យយុវជនបញ្ចប់ខាងជំនាញ IT នៅសាកលវិទ្យាល័យភូមិន្ទភ្នំពេញលោក ទា ឆាយហេង សម្រេចចិត្តបើកហាងសាច់អាំងមាន អនាម័យ និងទឹកជ្រលក់ឆ្ងាញ់ប្លែកពីគេ។
ការរៀបចំសាច់អាំងទៅតាមប្រភេទនីមួយៗនៅលើចានពណ៌ខ្មៅ តម្រៀបលើតុ បង្កប់ចង្ក្រានធ្យូង និងតង្កៀប ចាប់បន្លែជាច្រើនមុខ ត្រៀមបំពេញរសជាតិដោយទឹកកាពិដ៏ឈ្ងុយ។
លោក ទា ឆាយហេង ម្ចាស់ហាង BBQ Mini សាច់អាំងទឹកកាពិបានថ្លែងប្រាប់ ភ្នំពេញ ប៉ុស្ដិ៍ ថា៖ «ខ្ញុំគិតបច្ចុប្បន្ននេះគេនាំគ្នាចូលចិត្តញ៉ាំជាប្រភេទសាច់អាំងច្រើន។ ចំណែកឯប្រភេទសាច់វិញយើងអាចទុកបាន ហើយណាមួយហាងផ្សេងដែលខ្ញុំធ្លាប់បានចូលញ៉ាំភាគច្រើនគេប្រើហ្គាសសម្រាប់អាំងសាច់ជាអ្វីដែលខ្ញុំមិនសូវចូលចិត្ត»។
ម្ចាស់ហាងវ័យ ២៥ ឆ្នាំរូបនេះបានបញ្ជាក់ពីការប្រើធ្យូងសម្រាប់អាំងសាច់ និងប្រើទឹកកាពិជាទឹកជ្រលក់ថា៖ «ដោយសារការប្រើធ្យូងវា ធ្វើឲ្យរសជាតិសាច់អាំងឆ្ងាញ់ ហើយឈ្ងុយជាងការប្រើហ្គាស។ ចំណែកទឹកកាពិវិញកាលមុនខ្ញុំធ្លាប់ញ៉ាំនៅហាងគេ ហើយឃើញថាមិនមានច្រើនទេ»។
សាច់អាំងដែលប្រើទឹកជ្រលក់ពីកាពិនេះរូបមន្តអ្នកផ្ទះរបស់លោក ហើយចំពោះសាច់នៅក្នុងហាងត្រូវបានលោកអះអាងថាសុទ្ធតែជាប្រភេទសាច់ល្អៗ និងមានគុណភាពខ្ពស់។
សាច់អាំងអាចញ៉ាំផ្ទាប់នឹងបន្លែលាយជាមួយនំបញ្ចុកខ្ចប់នៅក្នុងសាឡាដស្រស់ ជ្រលក់ជាមួយទឹកកាពិលាយម្ទេសស្រស់ក្រហម និងក្រូចឆ្មារមានរសជាតិហឹរ ជូរ ប្រៃ។
BBQ Mini សាច់អាំងទឹកកាពិមានលក់ដូចជាសាច់គោជាប់ស្បែក សាច់គោជាប់ខ្លាញ់ ក្រលៀន បេះដូង ថ្លើមគោ សាច់ជ្រូក ៣ ជាន់ មឹកស្រស់ មឹកអំបិលម្ទេស ព្រុយត្រី ព្រុយត្រីអំបិលម្ទេស បង្គាស្រស់ បង្គាអំបិលម្ទេស ត្រីកាម៉ុងត្រីចូកតឹង ត្រីបបែល ងាវអំបិលម្ទេស (៩ ពាន់រៀល) ពោះវៀនតាន់ (១ ម៉ឺនរៀល) កន្សោមដោះ (១២០០០ រៀល) សាច់ពពែ (១៤០០០ រៀល) ខ្យងចំហុយពិសេស (៨ ពាន់រៀល)។
ភ្ញៀវដែលមកគាំទ្រនៅ BBQ Mini សាច់អាំងទឹកកាពិមួយថ្ងៃមានចំនួនពី ២០០ ទៅ ៣០០ នាក់ដោយភាគច្រើនជាយុវវ័យ។
សាច់អាំងទឹកកាពិស្ថិតនៅខាងជើងស្តុបផ្សារដីហុយ ២០ ម៉ែត្រទូរស័ព្ទលេខ ០៦៩ ៣៦៣ ៦៦៦៕
វីដេអូ៖