ក្រុងឡុងដ៍៖ ក្រុមហ៊ុនយក្សលក់ចំណីអាហារទាន់ចិត្ដអាមេរិក Burger King កាលពីថ្ងៃអង្គារបានដាក់លក់បឺហ្គ័រអត់សាច់នៅតំបន់អឺរ៉ុប ដោយរំពឹងថានឹងជួយបន្ថែមចំណែកទីផ្សារច្រើនទៀត។
បឺហ្គ័រអត់សាច់លើប្រភេទហេមបឺហ្គ័រ Whopper ត្រូវបានបន្ថែមលើតារាងមុខម្ហូបនៅ ២៥ ប្រទេស និង ២ ៥០០ ហាង ក្រោយពីសាកល្បងនៅសហរដ្ឋអាមេរិក និងស៊ុយអែត។
អគ្គនាយកក្រុមហ៊ុន លោក ដាវីដ សៀរ បានប្រាប់ AFP ថា៖ «វាជាការបើកសម្ពោធចង្វាក់ផលិតផលធំបំផុតពុំធ្លាប់មាននៅតំបន់អឺរ៉ុប។ យើងមើលឃើញពីសក្ដានុពលនាពេលអនាគត ដែលមនុស្សកំពុងតែពេញនិយមអាហារបួស»។
ក្រុមហ៊ុនបានបញ្ជាក់ថា បឺហ្គ័រអត់សាច់ថ្មីគ្រោងដាក់លក់នៅចក្រភពអង់គ្លេសនៅពេលបន្ទាប់ ទំនងជាដើមឆ្នាំក្រោយ។ Burger King ដែលល្បីល្បាញសាច់ចិញ្ច្រាំអាំង បានឲ្យដឹងចំពោះផលិតផលថ្មីរបស់ខ្លួនថា ពេលនេះខ្លួនបានក្លាយជាសម្ព័ន្ធហាងអាហារសម្រន់ទាន់ចិត្ដអឺរ៉ុបធំបំផុត ដែលលក់បឺហ្គ័រស្នូលពីបន្លែ។
ផលិតផលបន្លែបានជំរុញកំណើនការលក់បឺហ្គ័របែបប្រពៃណីនៅសហរដ្ឋអាមេរិក ខណៈវាបានទាក់ទាញអតិថិជនថ្មីៗ ដែលមិនធ្លាប់ចូលហាងលក់អាហារទាន់ចិត្ដ។
JPMorgan បានឲ្យដឹងថា ទីផ្សារអាហារបន្លែអាចមានតម្លៃប្រមាណ ១០០ លានដុល្លារ នៅរយៈពេល ១៥ ឆ្នាំក្រោយ ដោយសារបញ្ហាអាសន្ននៃបម្រែបម្រួលអាកាសធាតុ ខណៈផលិតផលសាច់គោគឺជាដើមចមបំពុលបរិស្ថានចម្បងមួយ។
មហាសេដ្ឋីចក្រភពអង់គ្លេស Richard Branson បានវិនិយោគលើក្រុមហ៊ុន Impossible Foods ខណៈ Beyond Meat គឺជាផ្នែកមួយដែលទទួលហិរញ្ញវត្ថុពីមហាសេដ្ឋី Bill Gates៕ AFP/HR