.jpg)
Chef Nak សង្កេតឃើញថា ពលរដ្ឋកម្ពុជាបន្ដប្រពៃណីវប្បធម៌ម្ហូបម្ហាតាមការបង្ហាត់បង្ហាញផ្ទាល់មាត់ជាជាងការសរសេរ។ សហការី
ភ្នំពេញ៖ ការស្រាវជ្រាវចងក្រងសៀវភៅមុខម្ហូបខ្មែរ ចាប់ផ្ដើមពេលមេចុងភៅស្រី Chef Nak ធ្វើការជាមួយអង្គការ សិល្បៈខ្មែរអមតៈ ដោយមើលឃើញថា ពលរដ្ឋកម្ពុជាតែងតែបន្ដប្រពៃណីវប្បធម៌តាមការបង្ហាត់បង្ហាញផ្ទាល់មាត់ជាជាងការសរសេរ។
អ្នកស្រី រស់ រតនៈ ហៅថា Chef Nak បានប្រាប់ ភ្នំពេញ ប៉ុស្ដិ៍ ថា៖ «ដូនតាយើងមិនបានសរសេររូបមន្ដម្ហូបទុកច្រើននោះទេ ដែលស្ទើរតែធ្វើឱ្យយើងពិបាកស្គាល់ពីរូបមន្ដស្ដង់ដាប្រើដោយមនុស្សជំនាន់មុនណាស់។ ដូច្នេះ ក្នុងសៀវភៅនេះ ខ្ញុំត្រូវប្រើប្រភពព័ត៌មាននានាពីការស្រាវជ្រាវ និងការចងចាំពីកុមារ ក៏ដូចជាជីដូន និងមនុស្សចាស់ ជាគ្រឹះនៃរូបមន្ដ»។
បន្ទាប់មក មេចុងភៅ Chef Nak ចាប់ផ្ដើមចម្អិន និងភ្លក្សរសជាតិម្ដងហើយម្ដងទៀត ដើម្បីទទួលបានកម្រិតរង្វាស់គ្រឿងត្រឹមត្រូវ បន្ថែមការតុបតែង និងដំណាក់កាលនៃការចម្អិន ព្រមទាំងរចនារូបភាពស្រស់ស្អាត ដែលអាចទាក់ចិត្ដអ្នកអានជាតិ និងអន្ដរជាតិ។
អ្នកស្រីបានឱ្យដឹងថា៖ «គ្រប់មុខម្ហូបសុទ្ធតែផ្ដល់អត្ថប្រយោជន៍ផ្នែកសុខភាព ហើយយើងបង្កើតភាពចម្រុះនៃមុខម្ហូប ដើម្បីកុំឱ្យមេផ្ទះធុញទ្រាន់ និងអាចរីករាយជាមួយអាហារគ្រប់គ្រួសារយ៉ាងឆ្ងាញ់ពិសា»។
អ្នកស្រីគិតថា ជួនកាល វាមានន័យថា ចំណេះដឹងដ៏មានតម្លៃត្រូវបានបាត់បង់ជាមួយមនុស្សជំនាន់មុន ពេលពួកគេចែកឋានទៅ។ លើសពីនេះ សង្គ្រាមបានបំផ្លិចបំផ្លាញស្ទើរតែទាំងស្រុង នៅសល់ឯកសារតិចតួច។
ការចម្អិនម្ហូបដោយប្រើវិធីសាស្ដ្រសាមញ្ញពីចាស់ៗជំនាន់មុនមានការបាត់បង់នៅតាមតំបន់ខ្លះក្រៅទីជនបទ។សហការី
អ្នកស្រី រតនៈ បានអះអាងថា៖ «ខ្ញុំមិនមែនជាអ្នកសរសេរទេ ដូច្នេះវាមិនងាយស្រួលសម្រាប់ខ្ញុំឡើយ។ ប៉ុន្ដែខ្ញុំពិតជាជឿថា ម្ហូបខ្មែរគួរតែមាននៅលើបញ្ជីមុខម្ហូបអន្ដរជាតិ ហើយខ្ញុំក៏មានអារម្មណ៍ថា វាពិតជាសំខាន់ណាស់សម្រាប់ប្រពៃណីអាហារយើងត្រូវបានអភិរក្សសម្រាប់ក្មេងជំនាន់ក្រោយ»។
Chef Nak បានលើកឡើងថា សមត្ថភាពចម្អិនម្ហូបដោយប្រើវិធីសាស្ដ្រសាមញ្ញពីសំណាក់មនុស្សជំនាន់មុន មានការបាត់បង់នៅតាមតំបន់ខ្លះក្រៅទីជនបទនៃប្រទេស។
ជាក់ស្ដែង វិធីងាយៗដែលប្រជាជនយើងធ្វើសម្លប្រហើរ ដែលជាប្រភេទស៊ុបផ្ដល់អត្ថប្រយោជន៍ដល់សុខភាព និងពេញនិយម អ្វីដែលត្រៀមមុនគេគឺគ្រឿង ដែលត្រូវហាន់ស្ដើងៗ និងបុកបញ្ចូលគ្នា។ នៅទីជនបទខ្លះ គេហៅមុខម្ហូបនេះថា សម្លក់ផ្សិត ហើយគេគ្រាន់តែដំគ្រឿងផ្សំទាំងអស់ដាក់ក្នុងឆ្នាំ និងស្ងោរតែម្ដង។
អ្នកខ្លះអាចគិតថា មុខម្ហូបខ្មែរមិនសូវមានច្រើនសម្រាប់ការផ្លាស់ប្ដូរចម្អិនរៀងរាល់ថ្ងៃនោះទេ។ ប៉ុន្ដែមេចុងភៅស្រី ដែលទើបប្រសូតកាលពីដើមទសវត្សរ៍ឆ្នាំ ១៩៩០ បាននិយាយថា ការស្រាវជ្រាវមុខម្ហូបខ្មែរអាចប្រើពេលវេលាអស់ ១ ជីវិត។
អ្នកស្រី រនតៈ បានប្រាប់ភ្នំពេញប៉ុស្ដិ៍ថា៖ «ខ្ញុំគិតថា បើទោះបីជាខ្ញុំចំណាយពេលពេញ ១ ជីវិតខ្ញុំស្រាវជ្រាវមុខម្ហូបខ្មែរ វាក៏មិនទាន់គ្រាន់ក្នុងការស្វែងយល់អស់ដែរ។ អ្វីដែលខ្ញុំដឹងគឺថា យើងមានភាពសម្បូរបែបចាប់ពីអាហារសម្រន់ រហូតដល់ញាំ ស៊ុប ចៀន និងឆា ខ ចំហុយ មុខម្ហូបរុំខ្ចប់ និងជ្រលក់ ក៏ដូចជាបង្អែមជាដើម»។
ម្ហូបខ្មែរមានភាពសម្រិតសម្រាំងជាងម្ហូបប្រទេសជិតខាង ដោយរសជាតិផ្អែម ប្រៃ និងជូរស្មើសាច់គ្នា។ សហការី
ការងាររបស់មេចុងភៅដែលតែងតែបង្ហាត់បង្ហាញមុខម្ហូបខ្មែរលើបណ្ដាញសង្គមហ្វេសប៊ុករូបនេះនឹងជួយអ្នករស់នៅក្នុងស្រុក និងពលរដ្ឋកម្ពុជានៅជុំវិញពិភពលោកមានមោទនភាពចំពោះមុខម្ហូបជាតិ និងជួយផ្សព្វផ្សាយបន្ដ។
Chef Nak បានរំឭកពេលធ្វើដំណើរទៅកាន់សហរដ្ឋអាមេរិកថា អ្នកស្រីមានអារម្មណ៍ស្រងាកចិត្ដពេលឃើញភោជនីយដ្ឋានក្នុងសហគមន៍ខ្មែរមួយចំនួនណែនាំមុខម្ហូបប្រទេសជិតខាង ដោយសារពួកគេយល់ថា វាទាក់ទាញអតិថិជនជាង។
អ្នកស្រី បានឱ្យដឹងថា៖ «ខ្ញុំគិតថា យើងដាក់ខ្លួនពេកហើយ ហើយពេលនេះ ដល់ពេលដែលយើងមានមោទនភាព និងបង្ហាញពិភពលោកថា តើយើងមានអ្វីខ្លះទៀត ក្រៅពីប្រាង្គប្រាសាទអច្ឆរិយៈ។ ខ្ញុំចង់ឱ្យមានការចាប់ផ្ដើមពីពលរដ្ឋក្នុងស្រុក ដោយសារខ្ញុំជឿថា គ្មាននរណាម្នាក់ផ្សព្វផ្សាយឱ្យយើងជាងខ្លួនយើងនោះទេ»។
អ្នកស្រី ណែនាំថា វិធីល្អបំផុតសម្រាប់ក្មេងៗជំនាន់នេះទទួលបាននូវចំណេះដឹងផ្នែកម្ហូបអាហារខ្មែរ គឺនាំគ្នាចាប់ផ្ដើមជជែកជាមួយឪពុកម្ដាយ និងចាស់ទុំ រៀនធ្វើម្ហូបជាមួយពួកគាត់ អានសៀវភៅម្ហូបខ្មែរ និងផ្សារភ្ជាប់ទំនាក់ទំនងសង្គម និងក្រុមដែលផ្ដោតលើម្ហូបខ្មែរ។
មូលដ្ឋានគ្រឹះនៃម្ហូបខ្មែរជាច្រើនគឺគ្រឿងផ្សំពីគល់ស្លឹកគ្រៃបុកជាមួយរំដេង រមៀត ខ្ជាយ ស្លឹកក្រូចសើច ខ្ទឹមស និងខ្ទឹមក្រហម។ សហការី
Chef Nak បន្ដថា៖ «គន្លឹះសំខាន់គឺថា ត្រូវដឹងអំពីប្រវត្ដិសាស្ដ្រ និងអត្ដសញ្ញាណរបស់យើងជាមុនសិន ដូច្នេះទើបយើងអាចអភិវឌ្ឍ និងបោះជំហានទៅមុខបាន»។
មេចុងភៅស្រីដែលត្រាច់ចរគ្រប់ច្រកល្ហកបំណងស្រាវជ្រាវមុខម្ហូបខ្មែរ បានបន្ថែមថា ម្ហូបខ្មែរមានភាពសម្រិតសម្រាំងជាងម្ហូបប្រទេសជិតខាង ហើយបទពិសោធនៃការទទួលទានមុខម្ហូបពេញនិយមមួយចំនួនគឺមានរសជាតិផ្អែម ប្រៃ និងជូរស្មើសាច់គ្នា។
អ្នកស្រី បានបញ្ជាក់ថា៖ «រូបមន្ដម្ហូបខ្មែរមួយដែលពលរដ្ឋគ្រប់រូបត្រូវដឹងនោះ គឺគ្រឿង។ វាជាល្បាយលាយបញ្ចូលគ្នារវាងគល់ស្លឹកគ្រៃបុកជាមួយរំដេង រមៀត ខ្ជាយ ស្លឹកក្រូចសើច ខ្ទឹមស និងខ្ទឹមក្រហម ដែលបង្កើតបានជាមូលដ្ឋានគ្រឹះនៃមុខម្ហូបខ្មែរជាច្រើន»។
សម្រាប់ព័ត៌មានលម្អិត សុំចូលទៅកាន់វេបសាយ https://chefnak.com/ ឬទំព័រហ្វេសប៊ុកផ្លូវការរបស់មេចុងភៅស្រី រស់ រតនៈ @chefnak៕ HR
វិធីល្អបំផុតសម្រាប់ក្មេងៗជំនាន់មានចំណេះដឹងផ្នែកម្ហូបអាហារ ការជជែកជាមួយចាស់ទុំ និងអានសៀវភៅជាដើម។ សហការី
