ភ្នំពេញ : ស្ថិតនៅក្នុងភោជនីយដ្ឋាន Xotique នៅម្ដុំទួលទំពូង ការរចនាខាងក្នុងមានលក្ខណៈបែបខ្មែរបុរាណលាយបញ្ចូលគ្នានឹងការ រចនាសម័យទំនើប។ រូបចម្លាក់ចាស់ៗ និងវត្ថុប្រើប្រាស់ពីសម័យដើម ដូចជាទូរស័ព្ទ ឧបករណ៍ចាក់តន្ត្រី ឃ្មោះ និងគ្រឿងប្រដាប់ស្លាម្លូជាដើម។
ថ្ងៃនេះភ្នំពេញប៉ុស្ដិ៍នឹងនាំ លោកអ្នកទៅភ្លក្សម្ហូបបរទេសឈ្មោះថា Dory Parmesan ពីភោជនីដ្ឋាន Xotique ដែលស្ថិតនៅខាងក្រោមអគារអាផាតមិនរចនាជាលក្ខណៈខ្មែរដ៏ខ្ពស់ ស្កឹមស្កៃ។
មុខម្ហូបនេះមានគ្រឿងផ្សំរួមមាន ត្រីដូរី ឈីស Parmesan មីអ៊ីតាលី (Spaghetti) សណ្ដែកបារាំង ម្ទេសប្លោកហាវ៉ៃ ស្លឹកជីរវ៉ាន់ស៊ុយបារាំង (ឬស្លឹកខូរៀនដឺ) ពងមាន់ អំបិល ប្រេងអូលីវ ម្រេច និងទឹកប៉េងប៉ោះ។
វិធីចម្អិនគឺដំបូងគេត្រូវយកត្រី ដូរីទៅប្រលាក់ជាមួយពងមាន់ក្រហម រួចយកវាទៅចៀនជាមួយប្រេងអូលីវ រួចទុកមួយអន្លើសិន។ មីអ៊ីតាលីត្រូវយកវាទៅស្រុះឲ្យឆ្អិន រួចរោយអំបិល និងម្រេចបន្តិច។ សណ្ដែកបារាំងត្រូវយកទៅស្រុះ ដោយក្នុងទឹកពុះនោះត្រូវដាក់ប្រេងអូលីវបន្តិច ដើម្បីរក្សាពណ៌បន្លៃបៃតងឲ្យនៅស្រស់។ សណ្ដែកបារាំងត្រូវរៀបជាមួយនឹងចំណិតម្ទេសហាវ៉ៃពណ៌ក្រហម រួចដាក់មីអ៊ីតាលី និងត្រីដូរីចៀនពីលើ ហើយរោយស្លឹកជីរវ៉ាន់ស៊ុយបារាំង នោះជាការស្រេច។
ចង់ដឹងថា អាហារបរទេសដែលចម្រុះដោយប្រូតេអ៊ីន និងបន្លែបៃតងនេះមានរសជាតិបែបណា សូមសាកល្បងទៅភ្លក្សផ្ទាល់នៅភោជនីយដ្ឋាន Xotique ស្ថិតនៅអគារ៣២ ផ្លូវ៤៥៦ សង្កាត់ទួលទំពូង១ ខណ្ឌចម្ការមន រាជធានីភ្នំពេញ។ ទំនាក់ទំនងទូរស័ព្ទលេខ ០១២៦៤៧០៧០ និង០៧៨ ៤៩៨០០០៕
