The Phnom Penh Post Search

Search form




Logo of Phnom Penh Post newspaper Phnom Penh Post - Kimchi Jigae ពី​សាលា​បង្រៀន​ធ្វើ​ម្ហូប​ពិភពថ្មី




Kimchi Jigae ពី​សាលា​បង្រៀន​ធ្វើ​ម្ហូប​ពិភពថ្មី

Kimchi Jigae ពី​សាលា​បង្រៀន​ធ្វើ​ម្ហូប​ពិភពថ្មី

120710_22b
120710_22b
120710_22c
លោក វិត ថន អ្នកជំនាញផ្នែកចម្អិនម្ហូប បង្ហាញ Kimchi Jigae ឈឹម ស្រីនាង
120710_22a
120710_22a

ភ្នំពេញ : ជម្រាប​សួរ​មិត្ត​អ្នក​អាន ​ភ្នំពេញ ប៉ុស្ដិ៍​ជាទី​មេត្រី! យើង​សង្កេត​ឃើញ​ថា ក្រៅ​ពី​វិស័យ​ខ្សែ​ភាពយន្ត និង​ចម្រៀង ម្ហូប​អាហារ​របស់​ប្រទេស​កូរ៉េ​ខាង​ត្បូង​ក៏​ទទួល​បាន​ការ​ពេញ​និយម​ពី​បណ្ដា​ ប្រជាជន​ខ្មែរ​គ្រប់​ស្រទាប់​វណ្ណៈ​ផង​ដែរ ដោយ​សារ​តែ​រសជាតិ​របស់​វា​មាន​លក្ខណៈ​មុត និង​ហឹរ​តិចៗ ស្រដៀង​នឹង​ម្ហូប​ចំណូល​ចិត្ត​របស់​ខ្មែរ​យើង​ដែរ។

ដូច្នេះ​ហើយ​សប្ដាហ៍​នេះ គឺ​ខុស​ពី​សប្ដាហ៍​មុនៗ ដោយ​ខ្ញុំ​នឹង​នាំ​លោក​អ្នក​ទៅ​សិក្សា​វិធី​ធ្វើ​អាហារ​បែប​កូរ៉េ​ ពី​អ្នក​ជំនាញ​នៅ​សាលា​បង្រៀន​ធ្វើ​ម្ហូប​អន្តរជាតិ​ ពិភពថ្មី។ នៅ​ទីនេះ លោក វិត ថន ដែល​ជា​គ្រូ​បង្រៀន​ធ្វើ​ម្ហូប​ដ៏​ចំណាន នឹង​បង្ហាញ​ពី​វិធី​ធ្វើ​អាហារ​សម្ល​តៅហ៊ូ ជាមួយ​ស្ពៃជ្រក់​គីមឈី ដែល​ភាសា​កូរ៉េ​ហៅថា គីមឈី ជីហ្គេ​ (Kimchi Jigae) ​ដ៏​មាន​ប្រជាប្រិយភាព​នៅ​ប្រទេស​កូរ៉េ​។

ដូច្នេះ​ហើយ សូមប្រិយមិត្ត​រីករាយ​នឹង​វិធី​ចម្អិន​ងាយៗ​ដូច​ខាង​ក្រោម​នេះ។

គ្រឿងផ្សំ : សាច់​ជ្រូក ស្ពៃជ្រក់​គីមឈី តៅហ៊ូ ម្សៅ​ម្ទេសម៉ដ្ឋ​កូរ៉េ​គ្រប់​មុខ និង​ម្សៅ​ស៊ុប​កូរ៉េ។

វិធីចម្អិន : ដំបូង​ត្រូវ​យក​សាច់​ជ្រូក​ទៅ​ហាន់​ជា​ចំណិត​តូច​ល្មម (ដូច​សាច់​ជ្រូក​សម្រាប់​ឆា) រួច​យក​ទៅ​ឆា​ជាមួយ​តៅហ៊ូ​រយៈ​ពេល​២-៣​នាទី បន្ទាប់​មក​ដាក់​គ្រឿង​ទេស​ចូល​រួម​មាន ម្សៅ​ម្ទេស និង​ម្សៅ​ស៊ុប មុន​នឹង​ដាក់​ទឹក​ចូល រួច​រម្ងាស់​រយៈ​ពេល​២​នាទី រួច​បង់​តៅហ៊ូចូល នោះ​ជា​ការ​ស្រេច។

ប្រសិន​បើ​លោក​អ្នក​មិន​ចង់​ទិញ​គីមឈី​ស្រាប់ៗ លោក​អ្នក​ក៏​អាច​សាកល្បង​ធ្វើ​​ខ្លួន​ឯង ដោយ​យក​ស្ពៃស​មក​កាត់​ជា​កង់ៗ​រួច​ត្រាំ​គល់​ក្នុង​ទឹក​អំបិល​ក្ដៅ​ឧណ្ហៗ ប្រមាណ​២​ម៉ោង សឹម​បន្ថែម​ស្លឹក​ស្ពៃ​ចូល​ រួច​ផ្អាប់​ទុក​២​ម៉ោង​ទៀត។ បន្ទាប់​មក​ត្រូវ​លាង​ស្ពៃ​ស​នេះ​ឲ្យ​ស្អាត​ ជ្រះ​អស់​អំបិល រួច​ចាក់​ម្សៅ​ម្ទេស​ម៉ដ្ឋចូល​។ ខ្ញី ស្លឹក​ខ្ទឹម និង​ខ្ទឹម​បារាំង​ត្រូវ​ហាន់​ជាដុំ​តូច​ៗ រួច​ដាក់​ចូល​ជា​មួយ​ស្ពៃស មុន​នឹង​បន្ថែម​ទឹក​ត្រី​ចូល​បន្តិច​។ យក​ផ្លែ​ប៉ោម និង​ផ្លែ​សារី​ក្រឡុក​ឲ្យ​ម៉ដ្ឋ រួច​លាយ​ជាមួយ​នឹង​ស្ពៃស​នោះ​ ហើយ​ផ្អាប់​វា​ទុក​២៤​ម៉ោង នោះ​ជា​ការ​ស្រេច។

បណ្ដា​ភោជនីយដ្ឋាន សាលា​បង្រៀន​ធ្វើ​ម្ហូប និង​លោក​អ្នក​ដែល​មាន​បំណង​ចង់​ចែក​រំលែក​វិធី​ចម្អិន​ម្ហូប​ពិសេសៗ​ជាមួយ​ មិត្ត​អ្នក​អាន​ ភ្នំពេញ​ ប៉ុស្ដិ៍ សូម​ទំនាក់ទំនង​មក​កាន់​ការិយាល័យ​ផ្នែក​ជីវិត​កម្សាន្ត​តាម​រយៈ​លេខ ០៧៧ ៧១៧ ៧១៥ និង ០១៦ ៩៣ ១៣ ១៣៕

អត្ថបទគួរចាប់អារម្មណ៍