ក្រុងវ៉ាស៊ីនតោន: ក្រុមហ៊ុននៅក្រុងវ៉ាស៊ីនតោនមួយបានដាក់កង់រង្វង់ខ្នងធំបែបបុរាណសម័យទសវត្សរ៍ឆ្នាំ ១៨០០ នៅលើម៉ូដែលកង់ថ្មី ឈ្មោះ Bicymple Nuvo។ ក្រឡេកមួយភ្លែត វាបានរំឭកដល់កង់ខ្នងធំសតវត្សរ៍ទី ១៩ តែផ្ដោតលើគំរូឌីហ្សាញសាមញ្ញ។
មិនដូចជាម៉ូដែលកង់ Bicymple គំរូដើម ការឌីហ្សាញកង់ប្រភេទកង់មុខធំ និងកង់ក្រោយតូច ត្រូវបានពង្រីកបន្ថែម ដោយកង់មុខមានទំហំ ៩១ សង់ទីម៉ែត្រ បើធៀបនឹងកង់បុរាណទំហំ ៦០ សង់ទីម៉ែត្រ។
យោងតាមវេបសាយក្រុមហ៊ុន Bicymple បានបង្ហាញថា Nuvo ជាសមិទ្ធផលថ្មីដែលច្របាច់បញ្ចូលគ្នារវាងបច្ចេកវិទ្យាទំនើប រឹងមាំ និងគួរឲ្យជឿជាក់ជាមួយការរចនាសាមញ្ញ ទាន់សម័យនៃម៉ូដបុរាណ។
វេបសាយបានបន្ដថា៖ «កង់នេះស្រួលជិះ ស្ទើរតែមិនចាំបាច់ត្រូវអស់ប្រាក់ជួសជុល និងបត់ក្បាលត្រឡប់ក្រោយដ៏ងាយស្រួលបំផុត»។
ក្រុមហ៊ុន Bicymple អាចកែសម្រួលស្ទើរតែគ្រប់កម្រិតកម្ពស់ អាស្រ័យទៅតាមអ្នកជិះដែលមានកម្ពស់ពី ១,៦០ ម៉ែត្រ ទៅដល់ ២ ម៉ែត្រ។
ជាមួយជំហរខ្ពស់ស្រួលទាំងជិះ និងមើលគេមើលឯងជុំវិញអ្នកជិះកង់នេះអាចជ្រើសរើសរវាងល្បឿនមួយប្រភេទ និងប្រអប់ល្បឿន ២ លេខ ដែលអាចរត់លើផ្លូវនូវល្បឿន ២៤ គីឡូម៉ែត្រក្នុង ១ ម៉ោង។
អ្នកនិយមកង់បុរាណដែលហ៊ានចំណាយ ៩៩៩ ដុល្លារ នឹងទទួលបានកង់ Bicymple ១ ប្រភេទល្បឿន នៅខែសីហា ឆ្នាំ ២០១៨ ខាងមុខ ខណៈ អ្នកហ៊ានចាយប្រាក់ ១៤៩៩ ដុល្លារ នឹងទទួលបានកង់ ២ ប្រភេទល្បឿន៕HR