.jpg)
លោក និងអ្នកស្រី វើន័រ ជិះកង់អគ្គិសនីឆ្លងកាត់កសិដ្ឋានចិញ្ចឹមគោ។ រូបថត AFP
ក្រុងប៊ែរឡាំង៖ រ៉ូប៊ឺត វើន័រ និងភរិយា អ៊ូរស៊ូឡា តែងតែឆ្លៀតនិយាយពាក្យសួស្ដីទៅកាន់ក្រុមអ្នកឡើងភ្នំ ខណៈពួកគេជិះកង់អគ្គិសនីយឺតៗតាមជម្រាលភ្នំ Bavarian Alps។
ប៉ុន្ដែជារឿយៗ ការស្វាគមន៍របស់ប្ដីប្រពន្ធទាំង ២ បានទទួលមកវិញពីការចងចិញ្ចើមដាក់។ ម្ចាស់សណ្ឋាគារ អាយុ ៤៦ ឆ្នាំ លោក រ៉ូប៊ឺត និយាយថា៖ «អ្វីដំបូងដែលពួកគេក្រឡេកមើលពេលឃើញយើងគឺ កង់អគ្គិសនីរបស់យើង។ បើយើងប្រើម៉ាស៊ីន ពួកគេមិនសូវចូលចិត្ដយើងឡើយ»។
ខណៈដែលលោក និងអ្នកស្រី វើន័រ និយាយពីគុណប្រយោជន៍ចំពោះកង់អគ្គិសនី ដែលអាចធាក់ឈ្នាន់ផង និងប្រើថាមពលអាគុយផងដោយអាចជួយសម្រាលបន្ទុកដ៏យ៉ាប់យ៊ឺនរបស់អ្នកជិះ អ្នកខ្លះទៀតមិនចូលចិត្ដចំពោះភាពច្នៃប្រឌិតនេះទៅវិញ។
អង្គុយលើកង់អគ្គិសនី ប្ដីប្រពន្ធទាំង ២ ជិះឡើងភ្នំកម្ពស់ ៨០០ ម៉ែត្រ ទៅកាន់កំពូលភ្នំ Herzogstand ចំណាយពេលកន្លះម៉ោង ដោយអត់ចេញញើសអ្វីសោះ។
ប្ដីប្រពន្ធអាល្លឺម៉ង់ដែលជិះកង់អគ្គិសនីឡើងភ្នំរងការរិះគន់។ រូបថត AFP
មនុស្សជាច្រើនជឿថា វាគួរតែជាការប្រើប្រាស់ថាមពលពីធញ្ញជាតិបំប៉នរាងកាយ មិនមែនថាមពលអគ្គិសនីទេ។ ពួកគេចាត់ទុកការប្រើជំនួយពីថាមពលអគ្គិសនជាជំនួយបច្ចេកវិទ្យាដ៏ឥតប្រយោជន៍ចំពោះសុខភាព។
វត្ដមានកង់អគ្គិសនីលើជម្រាលភ្នំ និងជួរភ្នំដទៃទៀតក្លាយជាប្រធានបទជជែកដ៏ចម្រូងចម្រាស។ ការតវ៉ាពីសំណាក់ក្រុមអ្នកឡើងភ្នំបានក្លាយជាប្រធានបទល្បីលើបណ្ដាញសារព័ត៌មានអាល្លឺម៉ង់ ដោយតែងតែចោទលើអ្នកជិះកង់អគ្គិសនីឡើងចុះភ្នំដែលអាចជួបគ្រោះថ្នាក់ និងប៉ះពាល់បរិស្ថាន។
លោក Friedl Kroenauer អាយុ ៥៩ ឆ្នាំ មកពីក្រុមអង្គការបរិស្ថាន BUND Naturschutz បាននិយាយថា៖ «កង់អគ្គិសនីអនុញ្ញាតឲ្យមនុស្សជាច្រើនមានឱកាសឡើងលើកំពូលភ្នំ។ សកម្មភាពទាំងនេះបង្កឲ្យមានការច្រោះបាក់ដីជាដើម»។
Kroenauer បន្ដថា អ្នកដែលឡើងភ្នំក្នុងតំបន់ដោយការជិះកង់អគ្គិសនី កំពុងតែបោកខ្លួនឯង។
លោកបានលើកឡើងថា៖ «ទៅដល់កំពូលភ្នំជាអ្វីដែលលោកអ្នកមានមោទនភាព។ អ្នកត្រូវមានអារម្មណ៍ថា ខ្លួនចំណាយកម្លាំងថាមពល និងនឿយហត់ពិតៗ»៕ AFP/HR
