ភ្នំពេញ៖ ចំណោមកុមារជាច្រើនដែលតម្រូវឲ្យរៀននៅផ្ទះ សិស្សមានពិការភាពគថ្លង់ រឹតតែប្រឈមនឹងឧបសគ្គក្នុងការសិក្សា និងទំនាក់ទំនង។
ដោយមើលឃើញពីតម្រូវការនេះ អង្គការគ្រួសារថ្មីដែលបានអនុវត្តកម្មវិធីអប់រំពិសេសសម្រាប់កុមារមានកង្វះញាណដឹងអស់រយៈពេល ២៥ ឆ្នាំមកហើយនោះ បានដាក់ឲ្យដំណើរការនូវកម្មវិធីរៀនសូត្របែបបរិយាបន្នតាមទូរស័ព្ទដៃឈ្មោះថា «ពាក្យ និងរូបភាព» (Words and Pictures) កាលពីសប្ដាហ៍ថ្មីៗកន្លងទៅនេះ។
កម្មវិធីស្មាតហ្វូន «ពាក្យ និងរូបភាព» មិនត្រឹមតែតម្រូវសម្រាប់កុមារមានបញ្ហាគថ្លង់នោះទេ ថែមទាំងជួយឲ្យក្រុមគ្រួសារ មិត្តភក្ដិ បងប្អូន និងមនុស្សទូទៅរៀនសូត្រពីភាសាសញ្ញាកម្ពុជាផងដែរ។
អ្នកនាង ជូលៀត អេស្ត្រា ជាអ្នកគ្រប់គ្រងគម្រោង និងទំនាក់ទំនងម្ចាស់ជំនួយនៅមូលនិធិគ្រួសារថ្មី បានឲ្យដឹងថា អង្គការបានធ្វើកិច្ចការជាមួយគណៈកម្មាធិការភាសាសញ្ញាកម្ពុជា និងវិទ្យាស្ថានជាតិសម្រាប់ការអប់រំពិសេស ដើម្បីធានាថា កម្មវិធីស្មាតហ្វូននេះផ្ដល់អត្ថប្រយោជន៍ដល់ការអប់រំកុមារមានបញ្ហាគថ្លង់។
អ្នកនាងបានប្រាប់ ភ្នំពេញ ប៉ុស្ដិ៍ ឲ្យដឹងថា៖ «វាពិតជាសំខាន់ណាស់ដែលយើងធ្វើការបង្កើត និងកែច្នៃធនធាន ដើម្បីជួយដល់កុមារមានតម្រូវការពិសេស។ យើងជឿថា បច្ចេកវិទ្យាដើរតួយ៉ាងសំខាន់ក្នុងការផ្ដល់លទ្ធភាពអប់រំ និងទំនាក់ទំនងជាមួយកុមារមានកង្វះញាណដឹងទាំងនេះ»។
រឿងរ៉ាវដែលនាំឲ្យមានការបង្កើតកម្មវិធីស្មាតហ្វូន «ពាក្យ និងរូបភាព» ដើមឡើយចេញពីអ្នកជំនាញផ្ដល់ប្រឹក្សាម្នាក់ នៅពេលដែលនាងបានជួបកុមារាពិការភាពស្ដាប់មិនឮម្នាក់ឈ្មោះ ទីណា។
កុមារា ទីណា និងឪពុក បានប្រាប់នាងពីផលលំបាកក្នុងការទំនាក់ទំនងជាភាសាកាយវិការ ដោយគ្រួសារនេះពុំចេះប្រើភាសាសញ្ញា។ ក្រោយមកកុមារា ទីណា បានមកកាន់សាលារៀនអប់រំពិសេស នៃអង្គការគ្រួសារថ្មី ដែលត្រូវបានផ្ទេរការគ្រប់គ្រងជូនរដ្ឋកាលពីខែកក្កដាឆ្នាំមុន។
អ្នកនាង ជូលៀត អេស្ត្រា អ្នកគ្រប់គ្រងគម្រោង និងទំនាក់ទំនងម្ចាស់ជំនួយបានឲ្យដឹងថា៖ «នៅសាលា ទីណា បានរៀនភាសាសញ្ញាកម្ពុជា ហើយក្រុមគ្រួសារគាត់ក៏ត្រូវរៀនភាសានេះដែរ។ នៅពេលទំនាក់ទំនងដោយសញ្ញា កាន់តែយល់គ្នាស៊ីជម្រៅ វាធ្វើឲ្យផ្លូវអារម្មណ៍ និងសុខុមាលភាពកុមារកាន់តែប្រសើរឡើង»។
បទពិសោធក្នុងគ្រួសាររបស់កុមារា ទីណា បានធ្វើឲ្យអង្គការគ្រួសារថ្មីបង្កើតកម្មវិធីសិក្សាទំនើបតាមទូរស័ព្ទដៃ ដើម្បីផ្ដល់ឲ្យក្រុមគ្រួសារមានសមាជិកពិការភាពចាប់យកភាសាសញ្ញាដ៏ត្រឹមត្រូវតាំងពីដើម ក៏ដូចជាលើកកម្ពស់ការយល់ដឹងពីភាសាសញ្ញាកម្ពុជាផងដែរ។
កម្មវិធីទូរស័ព្ទនេះត្រូវបានអភិវឌ្ឍដោយវិទ្យាស្ថានបើកទូលាយ ដោយមានទម្រង់ស្រដៀងនឹងវចនានុក្រមរូបភាព ដើម្បីជួយឲ្យកុមារអាចចាប់បានពីភាសា និងពាក្យពេចន៍ប្រើប្រាស់ប្រចាំថ្ងៃក្នុងបរិបទកម្ពុជាជាង ៥០០ ពាក្យ។
ក្រៅពីផ្ដល់ការអប់រំបែបកម្សាន្ត កម្មវិធី ពាក្យ និងរូបភាព ក៏មានបញ្ចូលនូវសំឡេង និងរូបភាពភាសាសញ្ញាកម្ពុជា និងសញ្ញាអាមេរិក ដើម្បីសម្រួលដល់ការទំនាក់ទំនងរវាងកុមារមានពិការភាពគថ្លង់។
អ្នកនាង ជូលៀត អេស្ត្រា បានឲ្យដឹងថា៖ «ដោយសារតែស្ថានភាពបច្ចុប្បន្នតម្រូវឲ្យសិស្សរៀននៅផ្ទះ ដូច្នេះយើងក៏ពន្លឿនការដាក់ឲ្យប្រើប្រាស់កម្មវិធីទូរស័ព្ទនេះឡើង ជាពិសេសសម្រាប់ក្មេងមានពិការភាពអាចចាប់យកភាសាសញ្ញា រៀនពាក្យអង់គ្លេស និងខ្មែរពីកម្មវិធីនេះ»។
អ្នកប្រើប្រាស់អាចទាញពី Google Play និង Apple stores ដោយឥតគិតថ្លៃ ហើយក្រោយពេលពីដាក់ដំណើរការលើទូរស័ព្ទរួច កម្មវិធីមិនតម្រូវឲ្យភ្ជាប់អ៊ីនធឺណិតទៀតទេ។
អ្នកនាង អេស្ត្រា បានបន្តទៀតថា៖ «ក្រៅពីកុមារមានពិការភាពគថ្លង់កម្មវិធីនេះក៏មានប្រយោជន៍សម្រាប់គ្រួសារមានកូនតូច ឬពុំមានពិការភាពផងដែរ។ អ្នកប្រើប្រាស់ក៏អាចស្វែងយល់ពីភាសាខ្មែរ អង់គ្លេស និងភាសាសញ្ញាខ្មែរ និងសញ្ញាអាមេរិក»។
ទោះជាទើបតែដំណើរការបានប៉ុន្មានសប្ដាហ៍ អ្នកនាង អេស្ត្រា បានឲ្យដឹងថា កម្មវិធី «ពាក្យ និងរូបភាព» ស្ថិតក្នុងចំណាត់ថ្នាក់កម្មវិធីទូរស័ព្ទដ៏ពេញនិយមទាំង ៣ នៅ Google Play Store កម្ពុជា។
អ្នកនាងបានបន្តទៀតថា៖ «យើងក៏ទទួលបានមតិសាទរពីមាតាបិតា និងអ្នកប្រើប្រាស់ជាច្រើន ជាពិសេសគ្រួសារដែលមានកូនមានពិការភាព។ ពួកគេសប្បាយចិត្តដែលទទួលបានមធ្យោបាយបច្ចេកវិទ្យា សម្រួលដល់ការទំនាក់ទំនង»។
ដើម្បីទាញយកកម្មវិធី «ពាក្យ និងរូបភាព» សូមចូលទៅកាន់ http://onelink.to/krousarthmey។ ព័ត៌មានបន្ថែមសូមទំនាក់ទំនងអង្គការគ្រួសារថ្មីតាមរយៈអ៊ីមែល pr@krousar-thmey.org៕