ភ្នំពេញ : ក្រុមហ៊ុនខេ(ខេមបូឌា)ទើបប្រកាសផ្ដល់ជូនកម្មវិធីពិសេសដល់អតិថិជនរបស់រថយន្ត ISUZU-DMAX នៅអំឡុងខែកក្កដានេះ។
រាល់ការជាវរថយន្តនេះម៉ូដែលណាមួយដែលបានកំណត់នោះ អតិថិជននឹងទទួលបានការថែមជូនពិសេសទី១រួមមានគម្របឃ្លុបក្រោយអូតូ ពន្ធផ្លូវឆ្នាំ២០១៣ និងគម្របម៉ាស៊ីន។ ការថែមជូនទី២គឺ ធុងជ័រខាងក្រោយ ឈ្នាន់ចំហៀង និងកម្រាលជើងមាន Logo ISUZU ដែលចេញពីរោងចក្រផ្ទាល់។ រីឯការថែមជូនទី៣គឺសេវាធានាផ្ទាល់ពីរោងចក្ររយៈពេល២ឆ្នាំ ឬ៥ម៉ឺនគីឡូម៉ែត្រ ការប្ដូរប្រេងម៉ាស៊ីន តម្រងប្រេង និងតម្រងខ្យល់ឥតគិតថ្លៃរហូតដល់២៥០០០គីឡូម៉ែត្រ។
ទាក់ទិននឹងការផ្ដល់ជូនដែលគិតជាទឹកប្រាក់សរុបស្មើនឹង២ពាន់ដុល្លារនេះ អ្នកនាង ពិន ភារម្យ មន្ត្រីផ្នែកទីផ្សាររបស់ក្រុមហ៊ុនខេ (ខេមបូឌា)បានឲ្យដឹងថា៖«ការផ្ដល់ជូននេះនឹងបន្តរហូតដល់ថ្ងៃទី៣១ ខែកក្កដា»។
រថយន្ត ISUZU D-MAX ត្រូវបានបំពាក់ដោយបច្ចេកវិទ្យារបស់ប្រទេសជប៉ុន ដែលមានប្រព័ន្ធការពារសុវត្ថិភាព និងសោតេឡេបញ្ជាបិទបើកដោយស្វ័យប្រវត្តិ។ ប្រព័ន្ធភ្លើងមុខជា Projector ដែលអាចឲ្យអ្នកបើកបរមើលឃើញឆ្ងាយ និងបានច្បាស់រីឯស្ដុបក្រោយភ្លឺរលោងដោយសារតែការបំភ្លឺពីអំពូលប្រភេទ LED។ ផ្នែកខាងក្នុងរបស់រថយន្តមានភាពទូលាយនិងបំពាក់ដោយកៅអីស្បែកអូតូ។
រថយន្តភីកអាប់ដែលមានជម្រើសពណ៌ស ខ្មៅ និងក្រហមនេះអាចសណ្ដោងបានទម្ងន់៣តោន។ បរិក្ខារដទៃទៀតដែលបំពាក់នៅក្នុងរថយន្តរួមមានប្រព័ន្ធភ្លើងកុងទ័រអូតូ ដែលប្រែប្រួលកម្រិតពន្លឺតាមកាំរស្មីព្រះអាទិត្យ។ ដៃចង្កូតមានប៊ូតុងបញ្ជាឧបករណ៍បំពងសំឡេង៦គ្រាប់និងអាចភ្ជាប់ប្រព័ន្ធប្លូធូត និងUSB។ ក្រៅពីបំពាក់ពោងសុវត្ថិភាពចំនួន២ រថយន្តក៏មានប្រព័ន្ធហ្វ្រាំងជំនួយABS និង EBD។
រថយន្តត្រូវបានគេធ្វើតេស្ដនៅមន្ទីរពិសោធន៍មានលក្ខខណ្ឌអាកាសធាតុ និងបរិស្ថានខុសៗគ្នាតាមស្ថានភាពប្រទេសជាង១២០លើពិភពលោក។ អ្នកជំនាញបានធ្វើពិសោធដោយបើកបរផ្ទាល់នៅគ្រប់ស្ថានភាពផ្លូវល្អ និងផ្លូវលំបាកៗមិនសំចៃដៃ ដែលគិតជារយៈចម្ងាយនៃការធ្វើដំណើរសាកល្បងនេះសរុបជាង៤លាន គីឡូម៉ែត្រ ពោលគឺស្មើនឹង១០០ជុំនៃពិភពលោក៕
