.jpg)
រថយន្ត Bloodhound ត្រូវបានប្រដូចទៅនឹងកាំជ្រួចលើវាលរាប។ រូបថត AFP
ក្រុងខេបថោន៖ សំឡេងរោទ៍យ៉ាងខ្លាំងបានលាន់រំពងកាត់វាលខ្សាច់កាឡាហារី នៃតំបន់អាហ្វ្រិកភាគខាងត្បូង។ វាហាក់ដូចជាយន្ដហោះចម្បាំងហោះហើរទាបដល់ដីនៃតំបន់ ហាស្គីន ផាន ជាបាតបឹងដ៏សោះកក្រោះដាច់ស្រយាលស្ថិតក្នុងខេត្ដខេប ខាងជើងនៃប្រទេស អាហ្វ្រិកខាងត្បូង ក្បែរព្រំដែនណាមីប៊ី។
ផ្សែងដីខ្សាច់សក្បុសហោះត្របាញ់ងងឹតមេឃ ធ្វើឲ្យមេឃមើលពុំច្បាស់ រថយន្ដកាំជ្រួចប្រណាំងបញ្ចេញសំឡេងដូចរន្ទះ និងបោះពួយយ៉ាងលឿនសំដៅគោលដៅខាងមុខ។
រថយន្ដកាំជ្រួច Bloodhound បន្ដបន្ថែមល្បឿនយ៉ាងលឿន ដើម្បីបំបែកកំណត់ត្រាពិភពលោក ដែលមានល្បឿន ១ ២២៣ គីឡូម៉ែត្រ ក្នុង ១ ម៉ោង។ វានៅមានអានុភាពខ្លាំងលើសនេះ មុនពេលកំពូលរថយន្ដនេះប៉ងឲ្យដល់កម្រិតកំពូល។
អ្នកបើកបរ Andy Green បង្កើតល្បឿនរថយន្តបាន ៩០៤ km/h។ រូបថត AFP
អ្នកបើកបរ Andy Green មានបាននិយាយថា៖ «យើងបានឈានដល់ល្បឿន ៩០៤ គីឡូម៉ែត្រ ក្នុង ១ ម៉ោង រហូតដល់អង្គុយហើបផុតពីដី និងមួកសុវត្ថិភាពកាន់ជាប់ដៃ»។
កំពូលរថយន្ដប្រណាំងផលិតនៅចក្រភពអង់គ្លេសឈរយ៉ាងសង្ហាខាងក្រោយរូបលោក ខណៈផ្សែងខ្សាច់នៅតែហុយសំពោង។ ឆត្រយោងពណ៌សជួយទប់ល្បឿនពេលជាន់ហ្វ្រាំង។ វាត្រូវបានឌីហ្សាញយ៉ាងពិសេសចំពោះអានុភាពល្បឿន ដែលក្រុមការងាររំពឹងថា បើវាអាចទៅរួច ពួកគេនឹងបន្ថែមល្បឿនដល់ ១ ០០០ គីឡូម៉ែត្រ ក្នុង ១ ម៉ោង។
លោក ស្ទួត អេដម៉ុនសុន ប្រធានប្រតិបត្ដិ Bloodhound បាននិយាយថា៖ «អស់លោកអាចហៅវាថា កាំជ្រួចលើវាលរាប ពីព្រោះវាបំពាក់ម៉ាស៊ីនយន្ដហោះ តែវាមានអានុភាពលើសនេះថែមទៀត»។
បច្ចុប្បន្ននេះ កំពូលរថយន្ដត្រូវបាននាំយកទៅចក្រភពអង់គ្លេសវិញសម្រាប់ការកែកុន និងបំពាក់ម៉ាស៊ីនរ៉ុក្កែតជាថ្មី មុនពេលវាវិលមកកាន់វាលខ្សាច់កាលីហារី នៅពាក់កណ្ដាលឆ្នាំ ២០២១ ខាងមុខ៕ AFP/HR
