.jpg)
តាក់ស៊ីហោះជាដំណោះស្រាយបញ្ហាស្ទះចរាចរណ៍ និងការដឹកជញ្ជូនបន្ទាន់ៗ។ រូបថត AFP
ក្រុងអូស្ទីន: មនុស្សគ្រប់រូបរមែងស្រមៃដល់ពេលកំពុងជាប់ស្ទះចរាចរណ៍ថានឹងអាចដោះខ្លួនដោយការហោះលើវេហាស៍យ៉ាងព្រងើយ។ យោងតាមក្រុមអ្នកជំនាញដែលបានជួបជុំគ្នានាពេលថ្មីៗនៅភាគខាងត្បូងជួបភាគនិរតីក្នុងទីក្រុងអូស្ទីន រដ្ឋតិចសាសដែលទំនងជាអាចនឹងកើតឡើងក្នុងពេលឆាប់ៗជាមួយវត្ដមានតាក់ស៊ីហោះលើផ្ទៃមេឃអំឡុងឆ្នាំ ២០២៥។
លោក មីឆែល ថាកឃ័រ ជាអគ្គនាយករងផ្នែកបច្ចេកវិទ្យា និងនវានុវត្ដភាពក្រុមហ៊ុន Bell បាននិយាយថា៖ «មនុស្សគ្រប់រូបតែងតែសុបិនចង់បានបែបនេះជាច្រើនទសវត្សរ៍មកហើយ ហើយបច្ចេកវិទ្យាមួយនេះនឹងរំលេចជារូបរាង។ ចំណោតមានតែ ១ គត់គឺថា តើយើងត្រូវធ្វើដូចម្ដេចជាមួយវា?»។
លោក ថាកឃ័រ បានឲ្យដឹងថាក្រុមហ៊ុនរបស់លោកបានចូលរួមជាមួយក្រុមហ៊ុនផ្ដល់សេវាកម្មដឹកជញ្ជូនតាមរយៈកម្មវិធីទូរស័ព្ទ Uber និងក្រុមហ៊ុនផលិតយន្ដហោះជាច្រើនទៀតរួមទាំង Safran របស់បារាំង ដើម្បីផលិតតាក់ស៊ីហោះដែលត្រូវបានហៅ «យានហោះ និងចុះចតត្រង់ (VTOL)»។
តាក់ស៊ីហោះអាចដំណើរតាមរយៈ Uber។ រូបថត AFP
យន្ដហោះអគ្គិសនីកូនកាត់ Nexus ត្រូវបានបង្ហាញវត្ដមានដំបូងកាលពីខែមករានៅពិព័រណ៍អ្នកប្រើប្រាស់បច្ចេកវិទ្យាអេឡិចត្រូនិកក្នុងក្រុងឡាសវេហ្គាស។ ក្រុមហ៊ុនប្រមាញពី ២០ ទៅ ៣០ កំពុងធ្វើកិច្ចការលើគម្រោងអនាគតស្រដៀងៗនេះដោយក្នុងចំណោមនោះ ក្រុមហ៊ុនតូចៗ និងធំៗ ជាច្រើន ដូចជា Airbus ដែលទើបបានបង្ហាញយន្ដហោះអគ្គិសនី CityAirbus ផងដែរ។
Uber គ្រោងដាក់ឲ្យដំណើរការតាក់ស៊ីអាកាសរបស់ខ្លួនជាលើកដំបូងក្នុងទីក្រុងឡូសអេនជឺលេស និងដាលឡាសជាទីក្រុងស្ទះចរាចរណ៍ខ្លាំងបំផុតរបស់សហរដ្ឋអាមេរិក។
សួរថា តើហេតុអ្វីមិនប្រើឧទ្ធម្ភាគចក្រជំនួសវិញលោក ថាកឃ័រ បានឆ្លើយថា តាក់ស៊ីហោះនេះចំណាយសេវាតិចជាង និងមានសំឡេងរំខានតិចជាងផងដែរ។
លោកអះអាងថា៖ «សំឡេងរំខានត្រូវតែមានកម្រិតប្រហាក់ប្រហែលនឹងសំឡេងទីក្រុង»។
លោកទស្សន៍ទាយថា តាក់ស៊ី អាកាសទាំងនេះអាចចាប់ផ្ដើមប្រតិបត្ដិការអំឡុងឆ្នាំ ២០២៥។
លោកបានលើកឡើងថា៖ «វានឹងមិនអាចជំនួសតាក់ស៊ីលើដីនោះទេ។ វាមិនអាចឡើយ»៕ HR
