ភ្នំពេញ៖ បើគិតពីត្រឹមឆ្នាំ ២០១៨ មកទល់នឹងចុងឆ្នាំ ២០១៩ នេះ ក្រុមផលិតយន្តហោះតូចៗ ពីស្នោរបស់លោក ជឿន ចននី ដែលក្រុមមានឈ្មោះ «គំនិត-Khomnit» បានឆ្លងកាត់ការផលិតយន្តហោះចំនួន ៥ ម៉ូដែល (ធុន) មានចំនួន សរុបទាំងអស់ប្រមាណជិត ២០០ គ្រឿង តែក៏បានលក់ដាច់អស់ហើយដែរ ខណៈបច្ចុប្បន្នក្រុមនេះកំពុងតែសស្រោកសស្រាំ ផលិតឲ្យអតិថិជនខ្លួនលក់មិនទាន់តាមការកុម្ម៉ង់ទៀតផង។
លោក ជឿន ចននី (Churne Johnny) ដែលជាកូនកំព្រាឪពុកម្តាយតាំងពីក្មេងវ័យ ៥ ឆ្នាំ និងបានរស់នៅមណ្ឌលកុមារកំព្រារហូតបានរៀនសូត្រចប់ជំនាញព័ត៌មានវិទ្យាពីវិទ្យាស្ថានជាតិបហុបច្ចេកវិទ្យាកម្ពុជា (NPIC) និងមានទេពកោសល្យយល់ដឹងខ្ពស់ផ្នែកយន្តកម្ម ដោយគ្រាន់តែមើលសៀវភៅក៏សម្រេចជោគជ័យក្នុងការផលិតយន្តហោះតូចៗ ដែលផលិតពីស្នោនៅឆ្នាំ ២០១៨ ខណៈគំនិតផ្តួចផ្តើម និងស្រាវជ្រាវស្វ័យសិក្សាខ្លួនឯងបានចាប់ផ្តើមតាំងពីឆ្នាំ ២០០៥ មក។
ស្ថាបនិកក្រុម «គំនិត-Khomnit» វ័យ ២៨ ឆ្នាំ លោក ជឿន ចននី បានឲ្យដឹងថា៖ «បច្ចុប្បន្ន យើងបានផលិតយន្តហោះពីស្នោ ដែលបានប្រើរូបមន្តពិសេស នៅក្នុងការរក្សាភាពស្វិត បានយូរនៃគុណភាពស្នោរបស់យើង បានផលិត ២ ប្រភេទ នៃយន្តហោះ គឺទី១ ជាយន្តហោះសម្រាប់គប់លេង និងទី២ ជាយន្តហោះសម្រាប់បញ្ជាហោះហើរនៅលើអាកាសដូចជា ដ្រូន នោះ។ សម្រាប់យន្តហោះប្រភេទគប់លេងយើងបានផលិត ៣ ម៉ូដែល (ធុន) គឺម៉ូដែល Boeing 747 ម៉ូដែល A350 និងម៉ូដែល A320 ខណៈប្រភេទទី២ គឺយន្តហោះបញ្ជាប្រភេទ Airbus A350 remote contor RC មានប្រវែងជាង ៣ ម៉ែត្រឯណោះ ហើយប្រភេទយន្តហោះបញ្ជាប្រភេទ Airbus A350 remote contor RC នេះផងដែរ ក៏ខ្ញុំគ្រោងនឹងបន្តការពិសោធបន្ថែមទៀត នឹងទទួលបានលទ្ធផលច្បាស់លាស់នៅក្នុងអំឡុងពេលប្រមាណជា ១-២ ខែ ទៀត ដោយយើងនឹងធ្វើការប្រកាសលក់ទៅដល់បណ្តាក្រុមហ៊ុនលក់គ្រឿងអេឡិចត្រូនិកធំៗតែម្តង ដែលជាជំហានជោគជ័យទី២ បន្ទាប់ពីការផលិតយន្តហោះ សម្រាប់គប់លេងមកនោះ»។
ទោះជាយ៉ាងណា មុននឹងឈានមកបង្កើតយន្តបញ្ជាប្រភេទ Airbus A350 remote contor RC ដោយមានទម្ងន់ដល់ទី ៧ គីឡូក្រាមនោះ លោក ជឿន ចននី និងក្រុមការងារឈ្មោះ «គំនិត-Khomnit» ដែលមានសមាជិកចំនួន ៧ នាក់ របស់លោកក៏ធ្លាប់បានសាកល្បងជោគជ័យប្រភេទតូចមួយរួចមកហើយកាលពីពេលកន្លងមកដោយមានសមត្ថភាពអាចហើរបានក្នុងកម្ពស់ ៤០ ម៉ែត្រ ទៅដល់ ៨០ ម៉ែត្រ ទើបអាចឲ្យលោកឈានមកបង្កើតធុនធំជាងមុន។
លោក ជឿន ចននី រំឮកឲ្យដឹងថា៖ «កាលដំបូងធ្វើតេស្តយន្តហោះបញ្ជាឈ្មោះថា Dive Shark មានប្រវែង ១ ម៉ែត្រ និងទម្ងន់ ៩០០ ក្រាម ដោយវាអាចមានសមត្ថភាពហោះហើរលើអាកាសបានអាស្រ័យតាមលក្ខខណ្ឌនៃអាកាសធាតុដែរ គឺនាពេលយើងបង្ហោះដោយគ្មានខ្យល់នោះ វាអាចហោះបានត្រឹមតែប្រមាណ ៤០ ម៉ែត្រប៉ុណ្ណោះ តែពេលមានខ្យល់អាចហោះកម្ពស់ចន្លោះពី ៦០-៨០ ម៉ែត្រ»។
ចំពោះយន្តហោះស្នោសម្រាប់គប់លេងដែលក្រុម «គំនិត-Khomnit» ផលិតលក់នោះ មាន ៣ ខ្នាត គឺតូច មធ្យម និងធំ ហើយតម្លៃចន្លោះពី ៣ ដុល្លារ ៥ ដុល្លារ និង ១០ ដុល្លារ ខណៈយន្តហោះប្រភេទបញ្ជាវិញប្រសិនបើទទួលបានជោគជ័យនៅក្នុងដំណាក់កាល ពិសោធចុងក្រោយនោះ លោកក៏បានកំណត់តម្លៃនៃការលក់រួចហើយដែរគឺ ១ គ្រឿង តម្លៃ ២ ៥០០ ដុល្លារ។ ខណៈក្រុម «គំនិត-Khomnit» កំពុងតែមានភាពមមាញឹកផលិតយន្តហោះប្រភទទី១ មិនមានយន្តហោះសម្រាប់តម្រូវតាមការកម្ម៉ង់ពីអតិថិជនឡើយ បើទោះបីជាក្រុមលោកបានចំណាយពេលផលិតជាមធ្យមអាចបានចំនួនប្រមាណ ៥០ គ្រឿងក៏ដោយ។
ស្ថាបនិកក្រុម «គំនិត-Khomnit» ដែលជាកូនកំព្រាតាំងពីតូច ដោយឪពុកម្តាយមានស្រុកកំណើតនៅខេត្តកំពង់ចាម និងខ្លួនធំដឹងក្តីនៅភ្នំពេញ លោក ចននី ក៏បានបញ្ជាក់ដែរថា៖ «ក្រោយពីមានការគាំទ្រ និងដឹងពីគុណភាពនៃការផលិតយន្តហោះស្នោ ដែលមិនងាយខូចរបស់យើងមកនោះ សព្វថ្ងៃនេះទាំងបងប្អូនខ្មែរ និងបរទេសមានដូចជា ចិនហុងកុង ឥណ្ឌា ជាដើម បានជាវរបស់យើងមិនសល់នោះឡើយ ហើយយើងផលិតមិនទាន់ការកុម្ម៉ង់ទិញទៀតផង។
ចំពោះយន្តហោះស្នោប្រភេទទី១ សម្រាប់ខ្នាតតូច ដែលមានទម្ងន់ ៥០ ក្រាម យើងលក់ ១ គ្រឿង តម្លៃ ៣ ដុល្លារ ចំណែកខ្នាតមធ្យមមានទម្ងន់ ១២០ ក្រាម យើងលក់ ១ គ្រឿង តម្លៃ ៥ ដុល្លារ និងខ្នាតធំមានទម្ងន់ ២០០ ក្រាម យើងលក់ ១ គ្រឿង តម្លៃ ១០ ដុល្លារ ហើយសម្រាប់យន្តហោះប្រភេទទី២ ដែលអាចបញ្ជាហោះហើរនៅលើអាកាសដូចជា ដ្រូនបាននោះវិញ នឹងលក់ ១ គ្រឿង តម្លៃ ២ ៥០០ ដុល្លារ ក្រោយពីយើងធ្វើការពិសោធចុងក្រោយ នារយៈពេលប្រហែល ១ ឬ ២ ខែខាងមុខ»៕