ក្រុងឡុងដ៍: ការសណ្ដោងរថយន្តខូច ឬក៏កូនផ្ទះចល័ត អាចជាកិច្ចការដ៏ច្រងេងច្រងាង ពិបាកបើកបរ ឬបញ្ជា ប្រសិនបើប្រើកម្លាំងពីរថយន្តខ្នាតធំ។
ប៉ុន្តែជាមួយរថយន្តក្រោះ Trailer Valet RVR robot-tank វាមិនត្រឹមតែកាត់បន្ថយភាពច្រងេងច្រងាងនោះ ទេ គឺថែមទាំងងាយស្រួលទាំងការបើកបរ និងស្វែងរកកន្លែងចូលចតដ៏សន្សំសំចៃទីតាំងថែមទៀតផង។
មើលមួយភ្លែត រថក្រោះ RVR មិនខុសពីរបស់ក្មេងលេងនោះទេតែជាក់ស្ដែង វាជាកូនរថក្រោះ ឬអាចហៅថាជាមនុស្សយន្តសណ្ដោង ដ៏រឹងមាំ ជាមួយសមត្ថភាពទាញទម្ងន់បានដល់ទៅ ៤,១ តោនឯណោះ។
អ្វីដែលអ្នកត្រូវធ្វើ គឺគ្រាន់តែភ្ជាប់រថយន្ត ឬទូចល័ត ដែលត្រូវសណ្ដោង ជាមួយតួរថក្រោះ RVR នោះអ្នកនឹងអាចប្រើតេឡេបញ្ជាចលនាទៅមុខ ទៅក្រោយ បត់បែន និងចូលចតរបស់វាបានភ្លាមៗដោយសុវត្ថិភាព។
ថាមពលដ៏ខ្លាំងរបស់រថក្រោះតូចច្រមក់ គួបផ្សំនឹងខ្សែច្រវាក់កាំរថក្រោះ របស់វា RVR អាចបរលើក្រួសតូចធំ ស្មៅ និងផ្លូវដី ដើម្បីសណ្ដោងទម្ងន់ខ្ទង់តោននៅពីក្រោយវា។ ថាមពលអគ្គិសនីវាអាចប្រើបាន ប្រមាណ ៣០ នាទី។
កូនរថយន្តក្រោះ Trailer Valet RVR robot-tank មាន ៣ ជម្រើស ស្របទៅតាមតម្រូវការ។ ជម្រើសថោកជាងគេ តម្លៃ ២១០០ ដុល្លារ អាចសណ្ដោងបានទម្ងន់ជាង ១,៥ តោន។ ចំពោះតម្លៃ ៣៤០០ ដុល្លារ កូនរថក្រោះ មានសមត្ថភាពសណ្ដោងបានទម្ងន់ជិត ២,៥ តោន។ រីឯជម្រើសកំពូល មានតម្លៃ ៤១០០ ដុល្លារ អាចសណ្ដោងបានជិត ៤,១ តោន៕