.jpg)
រ៉ូបូត Aibo របស់ Sony បំពាក់កាមេរ៉ាបច្ចេកវិទ្យាឆ្លាតវៃ។ រូបថត AFP
ក្រុងតូក្យូ: រ៉ូបូតគំរូសុនខរបស់ក្រុមហ៊ុន Sony ឈ្មោះ អៃបូ (Aibo) បំពាក់កាមេរ៉ា បច្ចេកវិទ្យាវៃឆ្លាត និងសមត្ថភាពអ៊ីនធឺណិតពេលនេះអាចតាមដានពីសមាជិកគ្រួសារ កុមារ និងសត្វចិញ្ចឹមផងដែរ។
រ៉ូបូតឆ្កែប្រវែង ៣ តឹកដែលមានត្រចៀកបក់ និងកែវភ្នែក LED បច្ចេកវិទ្យាចុងក្រោយនឹងបង្ហាញវត្ដមានតាមផ្ទះនានាក្នុងពេលខាងមុខដ៏ខ្លី។
យ៉ាងណាមិញបច្ចេកវិទ្យាសុនខចុងក្រោយនេះមិនមានតម្លៃថោកនោះទេ ដោយឆ្កែយន្ដ ១ ក្បាលមានតម្លៃចាប់ពី ៣ ០០០ ទៅ ៤ ០៨០ ដុល្លារសម្រាប់កញ្ចប់សេវាកម្ម ៣ ឆ្នាំរួមទាំង សេវាកម្មសូហ្វវែរ និងការផ្ទុកទិន្នន័យផងដែរ។
ប្រធានគម្រោង អ៊ីហ្ស៊ូមិ កាវ៉ានីស៊ិ បាននិយាយនៅទីស្នាក់ការកណ្ដាលក្រុមហ៊ុន Sony នៅទីក្រុងតូក្យូថា៖ «លោកអ្នកនឹងអាចតាមដានសមាជិកក្រុមគ្រួសារពីចម្ងាយថា តើពួកគេកំពុងធ្វើអ្វី ឬកូនៗកំពុងធ្វើអ្វី ពេលពួកគេនៅផ្ទះ។ យើងមានបំណងចង់ឲ្យប្រាកដថាលោកអ្នកមានអារម្មណ៍សុវត្ថិភាពដោយរស់នៅជាមួយ Aibo យ៉ាងរីករាយផងដែរ»។
រ៉ូបូតឆ្កែក៏នឹងអាចមើលការខុសត្រូវសត្វចិញ្ចឹមនាពេលអនាគតដោយអរគុណដល់បច្ចេកវិទ្យាស្គាល់រូបភាព និងរៀនស្វែងយល់ពីសមត្ថភាពផ្សេងៗ។ យោងតាម Sony គំរូចុងក្រោយរបស់ Aibo ដែលអាចបង្ហាញទាំងអារម្មណ៍ផ្លូវចិត្ដ ត្រូវបានដាក់លក់កាលពីខែមករាឆ្នាំមុន និងការលក់បានឈានដល់ ២ ម៉ឺនគ្រឿងក្នុងរយៈពេល ៦ ខែដំបូង។
សម័យអ៊ីនធឺណិត បច្ចេកវិទ្យាវៃឆ្លាត និងបញ្ហាប្រឈមមនុស្សចាស់ជរាច្រើន ជប៉ុនបានកែច្នៃសូម្បីឆ្នាំងដាំបាយ និងឧបករណ៍ផ្ទះសំបែងជាច្រើនទៀតឲ្យចេះមើលការខុសត្រូវមនុស្សចាស់រស់នៅក្នុងផ្ទះតែឯង៕ HR
