ភ្នំពេញ : ព្រឹត្តិការណ៍តាំងពិព័រណ៍ម៉ូតូធំអន្តរជាតិ(Phnom Penh Bike Week) លើកទី២នៅក្នុងប្រទេសកម្ពុជា នឹងប្រព្រឹត្តទៅរយៈពេល ២ ថ្ងៃចាប់ពីថ្ងៃ ៣០ ដល់៣១ ខែមីនា នៅកោះពេជ្រ ដោយមានវត្តមានអ្នកជិះម៉ូតូធំជាតិ និងអន្តរជាតិចូលរួមបង្ហាញយានជំនិះរបស់ខ្លួន ក៏ដូចជាសម្ដែងក្បាច់ជិះម៉ូតូប្លែកៗ ដើម្បីរៃអង្គាសថវិកាសប្បុរសធម៌យកទៅបរិច្ចាគជូន Operation Smile ជាអង្គការផ្ដល់ការវះកាត់មាត់ឆែបជូនកុមារកម្ពុជាដោយឥតគិតថ្លៃ។
កម្មវិធីពិព័រណ៍ម៉ូតូធំអន្តរជាតិក្នុងឆ្នាំនេះគឺធ្វើឡើងក្នុង អត្ថន័យលើកកម្ពស់ការបើកបរដោយទទួលខុសត្រូវ។ នេះជាលើកទីពីរហើយដែលប្រទេសកម្ពុជាបានធ្វើជាម្ចាស់ផ្ទះ ដោយមានការចូលរួមពីសំណាក់អ្នកជិះម៉ូតូធំជាច្រើនរយគ្រឿងមក ពីបណ្តាលប្រទេសនានាដូចជា វៀតណាម ថៃ និងម៉ាឡេស៊ី។
យោងតាម លោក សៀន វ៉ាង ប្រធានប្រតិបត្តិក្លិបម៉ូតូធំកម្ពុជាហៅកាត់ថា CBC កម្មវិធី ពិព័រណ៍ម៉ូតូធំអន្តរជាតិលើកទី២ នៅឆ្នាំ២០១៣នេះគឺត្រូវបានរៀបចំឲ្យមានលក្ខណៈដូចនឹងលើកទីមួយ ដែរ។ គឺធ្វើឡើងក្នុងគោលបំណងផ្តោតទៅលើការបើកបរដោយសុវត្ថិភាពនិងថែ រក្សាជីវិតរបស់យើង។
ប្រធានក្លិបម៉ូតូធំរូបនេះបានលើកហេតុផលថា៖ «ដោយសារតែយើងបានមើលឃើញថា ចំនួននៃគ្រោះថ្នាក់ចរាចរណ៍មាន ច្រើន ដូច្នេះហើយទើបយើងចូលរួមចំណែកក្នុងការកាត់បន្ថយគ្រោះថ្នាក់ ចរាចរណ៍នេះ។ យើងមានមោទនភាពនឹងបង្កើតនូវចលនានេះ ហើយក៏បើកឱកាសឲ្យអ្នកបើកបរទាំងអស់បានចូលរួមចំណែកទាំងអស់ គ្នា។ ក្នុងកម្មវិធីនេះយើងចង់ឲ្យអ្នកបើកបរទាំងអស់មានការទទួលខុស ត្រូវខ្ពស់លើការបើកបរដើម្បីឲ្យជីវិតជួបនូវសុវត្តិភាព»។
លោក បានបន្តទៀតថា ក្នុងកម្មវិធីពិព័រណ៍ម៉ូតូធំអន្តរជាតិឆ្នាំ២០១៣នេះ ក្លិបអ្នកជិះម៉ូតូធំកម្ពុជា ក៏ចូលរួមចំណែកក្នុងកិច្ចការមនុស្សធម៌ដើម្បីរៃអង្គាសប្រាក់ជួយ អង្គការ OperationSmile ដែលផ្ដល់វះកាត់មាត់ឆែបជូនកុមារកម្ពុជាផងដែរ។
កម្មវិធីដែលមានរយៈពេល២ថ្ងៃពេញនេះមានគោលបំណងចម្បងដើម្បីលើកកម្ពស់សុវត្ថិភាពចរាចរណ៍ រៃអង្គាសថវិកាសប្បុរស និងពង្រឹងការបើកបរឲ្យប្រព្រឹត្តទៅបានរលូន។
ពិព័រណ៍ម៉ូតូធំអន្តរជាតិឆ្នាំ២០១៣ នេះក៏មានសកម្មភាពជាច្រើនផងដែរដូចជា កម្មវិធីជួយដល់ប្រយោជន៍សង្គមដោយចែកមួកការពារសុវត្ថិភាពដល់ កុមារកំព្រានៅតំបន់ស្ទឹងមានជ័យ និងបង្ហាញជូនទស្សនជននូវការសម្ដែងជិះម៉ូតូធំ ការប្រកួតម៉ូតូ ការជិះម៉ូតូស្ទីលប្លែកៗ ការប្រកួតកាច់ដៃដោយប្រើកម្លាំង ការប្រគំតន្ត្រីពីសិល្បៈជាតិ និងអន្តរជាតិ ការតាំងផលិតផលលក់ និងកម្មវិធីដទៃជាច្រើនទៀត។
អ្នកជិះម៉ូតូដែលចង់ចូលរួម ក្នុងកម្មវិធីនេះអាចចុះឈ្មោះ និងតម្រូវឲ្យបង់ថ្លៃ១០ដុល្លារ។ ការចំណាយនេះនឹងទទួលបានអាវយឺត ឬក៏ក្រដាសបិទស្ទីកឃើរ រួមទាំងសិទ្ធិទុកដាក់ម៉ូតូនៅក្នុងកម្មវិធីនោះតែម្តង។ ថវិកាដែលប្រមូលបានពីការចុះឈ្មោះ លក់សំបុត្រនឹងត្រូវបានបរិច្ចាគទៅឲ្យអង្គការ Operation Smile៕
