ភ្នំពេញ : ការប្រកួតដាក់បាតដៃលើរថយន្តស៊ូបារុ ត្រូវបានរៀបចំឡើងជាលើកទី៣ដោយក្រុមហ៊ុន មូធ័រអ៊ីមេជ ខេមបូឌា ដែលនាំចូល និងលក់ចែកចាយនូវរថយន្តជប៉ុនស៊ូបារុ។ ការប្រកួតដែលបានប្រព្រឹត្តទៅនៅខាងមុខផ្សារទំនើបសូរិយា ចាប់ពីម៉ោង៩កន្លះព្រឹកនាថ្ងៃអាទិត្យ ទី១៨ ខែសីហាកន្លងទៅនេះមានអ្នកចូលរួមប្រកួតនិងទស្សនាយ៉ាងច្រើនកុះករ។
ក្រោយពីរងការអត់ទ្រាំនឹងភាពហេវហត់ក្រោមអាកាសធាតុយ៉ាងក្តៅក្នុងការប្រកួតដាក់បាតដៃលើរថយន្តស៊ូបារុរយៈពេល១១ម៉ោងហើយនោះបេក្ខជន១០នាក់ក្នុងចំណោមអ្នកចូលរួមប្រកួត៨០នាក់ នឹងមានឱកាសចេញដំណើរទៅប្រកួតនៅប្រទេសសិង្ហបុរី ជាមួយនឹងបេក្ខជនផ្សេងទៀតមកពីប្រទេសអាស៊ី ដើម្បីដណ្ដើមយករថយន្តស៊ូបារុ XV2.0i ឆ្នាំ២០១៣មួយគ្រឿងដ៏ថ្មីសន្លាងដែលមានតម្លៃ៤៥០០០ដុល្លារ។
ការប្រកួតដាក់បាតដៃនេះត្រូវបានរៀបចំឡើងដើម្បីស្វែងរកមនុស្ស ដែលមានចិត្តជាអ្នកកីឡា មានការប្ដេជ្ញាចិត្តខ្ពស់ និងចេះបត់បែនគ្រប់កាលៈទេសៈដែលស្រដៀងទៅនឹងលក្ខណសម្បត្តិរបស់រថយន្តស៊ូបារុ។
យោងតាមអ្នកនាង ថាក់ សុធាវី ដែលជាបុគ្គលិករបស់មូធ័រអ៊ីមេជ ខេមបូឌា កាលពីឆ្នាំមុន អ្នកដែលឈ្នះរថយន្តស៊ូបារុមួយគ្រឿងដ៏ថ្មីសន្លាងនោះ បានទៅលើជនជាតិសិង្ហបុរីលោក ថូម៉ាស ហ្គាន (Thomas Gan) ដែលអាចតស៊ូដាក់បាតដៃជាប់ជានិច្ចលើរថយន្តស៊ូបារុរយៈពេល៧៨ម៉ោងនិង៣០នាទី។
ដោយឡែក ការប្រកួតនៅប្រទេសកម្ពុជាវិញ បេក្ខជនដែលចូលរួមតម្រូវឲ្យឈរដាក់ដៃស្តាំរបស់ខ្លួននៅលើរថយន្តឲ្យជាប់ជានិច្ច ទោះបីជាស្ថិតក្នុងស្ថានភាពអាកាសធាតុបែបណាក៏ដោយ។
បេក្ខជនបេក្ខនារីទាំងអស់ត្រូវបានអនុញ្ញាតឲ្យសម្រាក៥នាទីរាល់រយៈពេល៦ម៉ោងម្តងដើម្បីញុំាទឹកនិងចូលបន្ទប់ទឹក។ ទន្ទឹមនឹងនោះនៅក្នុងពេលប្រកួតក៏មានជាហ្គេមផ្សេងៗសម្រាប់លេងកម្សាន្ត និងជម្រុះបេក្ខជនពីការប្រកួតផងដែរ។
លោកចូណាថាន់ តាន់ (Jonathan Tan) ប្រធានគ្រប់គ្រងទូទៅរបស់ក្រុមហ៊ុន មូធ័រអ៊ីមេជ វៀតណាម និង ខេមបូឌា បានមានប្រសាសន៍ថា៖ «សម្រាប់ការប្រកួតដាក់បាតដៃលើរថយន្តស៊ូបារុឆ្នាំ២០១៣ខ្ញុំជឿថានឹងធ្វើបានកាន់តែប្រសើរក្នុងការប្រកួតនេះហើយខ្ញុំនឹងរង់ចាំអបអរសាទរបេក្ខជនបេក្ខនារីដែលឈ្នះនៅប្រទេសកម្ពុជា នៅសិង្ហបុរី ដោយសង្ឃឹមថាពួកគេនឹងនាំយករង្វាន់ត្រឡប់មកផ្ទះវិញ»។
អ្នកដែលឈ្នះការប្រកួតដាក់បាតដៃចំនួន១០នាក់នោះរួមមានលោក លី ចំណាន ឃាង ឧត្តម ដេង តារា វាក់ សាវី ប្រាក់ តារា សៅ សិរីបុត្រ ឈឿង សុភិន ហេង សូឡែន សោម សូផារី និង ឈួក ណាលុក។ពួកគេនឹងត្រូវទៅប្រកួតដាក់បាតដៃលើរថយន្តសម្ដែងភាពក្លាហានហេវហត់អំណត់អត់ធន់នៅប្រទេសសិង្ហបុរីដើម្បីដណ្ដើមយករង្វាន់ធំឆាប់ៗខាងមុខនេះ៕
