ក្រុងវ៉ាស៊ីនតោន: ក្រុមហ៊ុនដឹកជញ្ជូនយក្សអាមេរិក UPS ពីថ្ងៃអង្គារបានដាក់ឲ្យដំណើរការដ្រូនស្វ័យប្រវត្ដិដែលទទួលអាជ្ញាប័ណ្ណដំបូងដើម្បីដឹកជញ្ជូនកញ្ចប់សេវាកម្មវេជ្ជសាស្ដ្រ។
ក្រុមហ៊ុនបានឲ្យដឹងថាការដឹកជញ្ជូនសំណាកវេជ្ជសាស្ដ្រក្នុងបរិវេណមន្ទីរពេទ្យ WakeMed ក្រុង Raleigh រដ្ឋ ណត ការ៉ូឡៃណា គឺជាការហោះហើរអាជីវកម្មប្រចាំថ្ងៃទៅតាមគម្រោងលើកដំបូងរបស់ខ្លួន។
ក្រុមហ៊ុនដឹកជញ្ជូន UPS បានសហការជាមួយ Matternet ដែលផលិតដ្រូនស្វ័យប្រវត្ដិ និងបានដាក់ឲ្យដំណើរការនៅប្រទេសស្វ៊ីសរួចជាស្រេចសម្រាប់សេវាកម្មដឹកជញ្ជូន។ នេះបើយោងតាមសេចក្ដីថ្លែងការណ៍របស់ក្រុមហ៊ុនយក្សមួយនេះ។
ក្រុមហ៊ុនបានហៅការហោះហើរដំបូង «ជាជោគជ័យដ៏សម្បើមសម្រាប់អាកាសចរណ៍ស្វ័យប្រវត្ដិនៅលើទឹកដីសហរដ្ឋអាមេរិក»។
វានឹងបង្ហាញ «សមត្ថភាពបញ្ចៀសការយឺតយ៉ាវដោយសារចរាចរណ៍បង្កើនប្រសិទ្ធភាពដឹកជញ្ជូនឱសថ តម្លៃទាប និងពន្លឿនឱកាសសង្គ្រោះជីវិតអ្នកជំងឺផងដែរ»។
ដ្រូន «quadcopter» អាចផ្ទុកសម្ភារវេជ្ជសាស្ដ្រទម្ងន់ ២,៣ គីឡូក្រាមលើចម្ងាយផ្លូវ ២០ គីឡូម៉ែត្រ។ ខណៈសេវាកម្មសង្គ្រោះតាមបែបប្រពៃណីជាជម្រើសតែមួយគត់នោះគឺសេវាកម្មដឹកជញ្ជូនដោយមនុស្ស។
អគ្គនាយក WakeMed លោក ដូណាល់ ហ្គីនហ្ស៊ិក បាននិយាយថា៖ «ការដឹកជញ្ជូនតាមរយៈដ្រូននឹងបង្កើនល្បឿននៃសេវាកម្មក្នុងតម្លៃថោក ពង្រឹងលទ្ធភាពវេជ្ជសាស្ដ្រ និងបង្កើតសហគមន៍សុខុមាលភាព»៕ HR