ភ្នំពេញ: មើលពីការចំណាយពេលវេលាលើដីស្រែ ចម្ការច្រើនធ្វើឲ្យនិស្សិតមួយក្រុមសហការគ្នាបង្កើតឧបករណ៍មួយដើម្បីជួយកាត់បន្ថយភាពមមាញឹកលើដីដំណាំកសិផលរបស់ខ្លួនមកបង្កើតភាពស្និទ្ធស្នាលជាមួយក្រុមគ្រួសារ និងបំពេញភារកិច្ចផ្សេងៗទៀត។
កាលពីមួយខែមុនក្នុងពេលត្រៀមការប្រកួត Techno Innovation Challenge Cambodia ឆ្នាំ ២០១៩ សមាជិកក្រុម ៥ នាក់បានសម្រេចចិត្ដបង្កើត Smart Farm Assistance ដែលអាចជួយកសិករត្រួតពិនិត្យទិន្នន័យស្ថានភាពដី សំណើមដី និងបិទបើកទឹកស្វ័យប្រវត្ដិតាមរយៈទូរស័ព្ទដៃ។
លោក អ៊ាវ ដេវីដ សហស្ថាបនិក Smart Farm Assistance បាននិយាយថា៖ «គោលបំណងរបស់យើងគឺកាត់បន្ថយការចំណាយពេលរបស់កសិករពីស្រែចម្ការមកនៅជាមួយក្រុមគ្រួសារ និងស្វែងរកការងារផ្សេងៗដើម្បីបង្កើនចំណូលជីវភាពប្រចាំថ្ងៃ។ ជាទូទៅកសិករចំណាយច្រើនលើដីស្រែចម្ការជាជាងក្រុមគ្រួសារ។ ជាមួយឧបករណ៍នេះពួកគេអាចគ្រប់គ្រងដីស្រែចម្ការតាមរយៈទូរស័ព្ទដៃ និងបញ្ជាបើកបិទទ្វារស្វ័យប្រវត្ដិ»។
ដេវីដ ដែលជានិស្សិតឆ្នាំទី ២ នៃវិទ្យាស្ថានបច្ចេកវិទ្យាកម្ពុជាបានប្រាប់ ភ្នំពេញ ប៉ុស្ដិ៍ ថាប្រជាកសិករមិនចាំបាច់ចុះស្រែចម្ការរាល់ថ្ងៃនោះទេ ជាពិសេសអាចទស្សន៍ទាយពីលទ្ធភាពនៃការធ្លាក់ភ្លៀងដែលម្ចាស់ស្រែចម្ការមិនចាំបាច់បង្ហូរទឹក។
លោកបន្ដថា៖ «កសិករនឹងដឹងព័ត៌មានដី និងការទស្សន៍ទាយអាកាសធាតុថា តើគួរបើកប្រព័ន្ធបង្ហូរទឹកឬយ៉ាងណា? យើងក៏បានបំពាក់សេនស័រតាមដីស្រែចម្ការដើម្បីបើកប្រព័ន្ធស្រោចស្រពផងដែរ»។
សហស្ថាបនិកម្នាក់ទៀតលោក ញ៉ សុភា បានឲ្យដឹងថាដោយសារយើងសិក្សាជំនាញ Internet of Thing (IOT) ដែលផ្ដោតលើវិស្វកម្មអគ្គិសនីលោកមើលឃើញថាវាអាចជួយប្រជាកសិករចំណេញពេលវេលា ថវិកា និងកម្លាំងពលកម្មលើដីស្រែចម្ការ។
នៅស្រែចម្ការ Smart Farm Assistance ដែលមានស្ថានីយមួយដំឡើងភ្ជាប់បង្គោលជាមួយថាមពលបន្ទុកអគ្គិសនីសូឡា ស៊ីមកាតទូរស័ព្ទសម្រាប់បញ្ជូនព័ត៌មានតាមទូរស័ព្ទក៏ដូចជា សេនស័រចំនួន ៣ ប្រភេទ រួមមាន ពិនិត្យស្ថានភាពដី ព្យាករអាកាសធាតុ និងបញ្ជាប្រព័ន្ធស្រោចស្រពស្វ័យប្រវត្ដិ។
លោក ដេវីដ អាយុ ២០ ឆ្នាំ ដែលអះអាងថាអ្នកប្រើប្រាស់នឹងលែងចំណាយពេលច្រើនលើដីស្រែចម្ការបាននិយាយថា៖ «ជាក់ស្ដែងដីស្រែមួយហិកតា យើងប្រើប្រអប់ស្ថានីយមួយជាមួយសេនស័រ ៦ គ្រាប់»។
យ៉ាងណាមិញការបញ្ចូល និងទទួលព័ត៌មានតាមរយៈសារស៊ីមកាតទូរស័ព្ទ មិនរហ័ស និងគ្រប់ជ្រុងជ្រោយដូចជាប្រតិបត្ដិការតាមអ៊ីនធឺណិតឡើយ។ ប៉ុន្ដែផលលំបាកចម្បងមួយរបស់កសិករនោះគឺសេវាអ៊ីនធឺណិតតាមទីជនបទដាច់ស្រយាល និងប្រព័ន្ធអគ្គិសនីដែលក្រុមរបស់លោកចាប់យកជម្រើសអគ្គិសនីសូឡាជំនួសវិញ។
កត្ដាសំខាន់មួយទៀតប្រជាកសិករត្រូវដំឡើងប្រព័ន្ធស្រោចស្រពដែលងាយស្រួលក្នុងការបញ្ជាបើកបិទទឹកស្វ័យប្រវត្ដិ។
លោក ដេវីដ បានបន្ដថា៖ «យើងអាចបើកបិទទឹកតាមរយៈកម្មវិធីទូរស័ព្ទ ឬយើងអាចដាក់កំណត់ម៉ោងបិទបើកដោយស្វ័យប្រវត្ដិដោយគ្រាន់តែចុចប៊ូតុងពីផ្ទះប៉ុណ្ណោះ»។
Smart Farm Assistance ស័ក្ដិសមសម្រាប់ដំណាំស្រែចម្ការទាំងលក្ខណៈគ្រួសារ និងឧស្សាហកម្មធំៗ ហើយអ្វីដែលខុសប្លែកនោះ វាគ្រាន់តែត្រូវបំពាក់សេនស័រច្រើនលើដីស្រែចម្ការធំៗ។
ស្ថិតក្នុងដំណាក់កាលអភិវឌ្ឍឧបករណ៍ Smart Farm Assistance មួយឈុតដែលមានប្រអប់ស្ថានីយភ្ជាប់ស៊ីម បន្ទះសូឡា និងសេនស័រមានតម្លៃប្រមាណ ២៨ ម៉ឺនរៀល។
បច្ចុប្បន្នប្រជាកសិករនៅខេត្ដកោះកុង និងពោធិ៍សាត់មានការចាប់អារម្មណ៍ដំណើរការប្រព័ន្ធវៃឆ្លាតនេះសាកល្បងនៅលើដីស្រែចម្ការខ្លួនដែលអាចប្រើពេល ៣-៤ ខែក្នុងការអភិវឌ្ឍឲ្យកាន់តែល្អប្រសើរ។
លោក ដេវីដ បានបញ្ជាក់ថា៖ «យើងបារម្ភពីឧបករណ៍របស់យើងរងផលប៉ះពាល់ពីអាកាសធាតុក្ដៅដែលធ្វើឲ្យវាដំណើរការមិនល្អ។ យើងកំពុងសិក្សាពីការដំឡើងឧបករណ៍ឲ្យមានសុវត្ថិភាព ពីព្រោះវាក៏អាចប្រឈមនឹងការបាត់បង់ផងដែរ»។
ក្រុមនិស្សិតអាយុត្រឹមខ្ទង់ ២០ ស្ដើងទាំងអស់ក៏ប្រឈមនឹងការលំបាកមួយចំនួនទៀតទាក់ទងនឹងបច្ចេកវិទ្យាទាំងហាដវែរ និងសូហ្វវែរការប្រើប្រាស់ស៊ីមទូរស័ព្ទដែលអាចអត់មានសេវា និងសីតុណ្ហភាពក្ដៅធ្វើឲ្យប៉ះពាល់ដល់គុណភាពឧបករណ៍។
គួរបញ្ជាក់ថា ក្រុមនិស្សិតឈ្មោះ Agri-Economiser បានឈ្នះជយលាភីលេខ ១ នៃការប្រកួតនៅ TICC លើប្រធានបទ Smart Farm Project ជាមួយទឹកប្រាក់ ១ ២៥០ ដុល្លារ។
បច្ចុប្បន្នយុវជនផលិត ឧបករណ៍ Smart Farm Assistance កំពុងស្វះស្វែងរកដៃគូវិនិយោគពង្រីកទីផ្សារផលិតឲ្យដល់ដៃអតិថិជនទូទាំងប្រទេស។
ព័ត៌មានលម្អិតសុំចូលទៅកាន់ទំព័រហ្វេសប៊ុក @Smart Farm Asstistance ឬទូរស័ព្ទ លេខ ០៧៨ ៩៤៦៩០៣៕