ភ្នំពេញ៖ ក្រុមនិស្សិតនៅវិទ្យាស្ថានបច្ចេកវិទ្យាគិរីរម្យ បានបង្កើតកម្មវិធីនៅលើបណ្តាញសង្គម និងវេបសាយសម្រាប់ស្វែងរកជាងជួសជុលបរិក្ខារក្នុងផ្ទះ ដោយសន្សំពេលវេលា និងប្រសិទ្ធភាពពីជាងមានជំនាញ។
ក្នុងចំណោមស្ថាបនិក Fixh.me ទាំង ៤ នាក់ យុវជន តេង ស៊ាវប៉ោ វ័យ ២០ ឆ្នាំ ជានិស្សិតឆ្នាំទី ៣ ផ្នែកវិស្វកម្មបច្ចេកវិទ្យា បានថ្លែងមក ភ្នំពេញ ប៉ុស្តិ៍ ថា៖ «ខ្ញុំបានសម្រេចចិត្តបង្កើតកម្មវិធីនេះ ឡើងមកដោយសារ វាជាបញ្ហាដែលខ្ញុំប្រឈមមុខនឹងខ្លួនឯងផ្ទាល់ នៅពេលរកអ្នកបច្ចេកទេសពិតជាចំណាយពេល និងពិបាកក្នុងការស្វែងរក ជាពិសេសទំនុកចិត្តពេលចូលមកក្នុងផ្ទះរបស់យើង។ ដូច្នេះខ្ញុំបានសម្រេចចិត្តបង្កើតកម្មវិធី ដើម្បីជួយប្រជាជនជាមួយសេវាកម្មរហ័ស និងអាចទុកចិត្តបាន»។
បច្ចុប្បន្ន Fixh.me មានបម្រើសេវាកម្មចំពោះអតិថិជនជាច្រើនដូចជា ជាងជួសជុលម៉ាស៊ីនត្រជាក់ ជាងភ្លើង ប្រព័ន្ធទឹក ម៉ាស៊ីនបោកគក់ ទូទឹកកក និងម៉ាស៊ីនកម្តៅទឹក ដោយម្ចាស់ផ្ទះ អាចកំណត់ថ្ងៃជួសជុល ឬធ្វើការហៅភ្លាមៗជាមួយរយៈពេលរង់ចាំប្រមាណជាង ២០ នាទី។ Fixh.me គិតកម្រៃជើងសាពីជាង ២០ ភាគរយ នៃប្រតិបត្តិការនីមួយៗ។
និស្សិតវ័យក្មេងរូបនេះ បានបន្តប្រាប់ពីរបៀបប្រើប្រាស់ថា៖ «សម្រាប់អតិថិជន អាចទាក់ទងមកយើងតាមរយៈផេចហ្វេសប៊ុក លេខទូរស័ព្ទ និងនៅក្នុងវេបសាយ ដោយក្នុងបច្ចុប្បន្ននេះយើងមិនទាន់មានការដំឡើងក្នុងទូរស័ព្ទនៅឡើយទេ»។
កម្មវិធីសម្រាប់ផ្តល់សេវាកម្មបរិក្ខារក្នុងផ្ទះ Fixh.me បានប្រើរយៈពេល ៦ ខែ ក្នុងការបង្កើត និងបានដាក់ដំណើរការឲ្យប្រើប្រាស់ជាសាធារណៈរយៈពេល ៤ ខែមកហើយ។ ក្រៅពីវេបសាយដែលស្ដុកទិន្នន័យកាន់តែច្រើនឡើងៗ អតិថិជនក៏មានជម្រើសធ្វើការកក់តាមហ្វេសប៊ុក ឬទូរស័ព្ទ។
កម្មវិធីនេះត្រូវបានរចនាដោយក្រុមរបស់លោក ខណៈការសរសេរកូដធ្វើឡើងដោយក្រុមហ៊ុនផ្សេងទៀត។
យ៉ាងណាមិញ កិច្ចការបានផ្តល់នូវបទពិសោធជាច្រើននៅក្នុងវិស័យជំនួញដល់និស្សិតដែលកំពុងសិក្សាជំនាញវិស្វកម្មបច្ចេកវិទ្យា។
លោក តេង ស៊ាវប៉ោ បានលើកឡើងថា៖ «គម្រោងនេះ បានផ្តល់ឲ្យខ្ញុំនូវឱកាស ដើម្បីស្វែងយល់អំពីអ្វីដែលខ្ញុំមិនបានរៀននៅក្នុងថ្នាក់ហើយអនុវត្តន៍ជំនាញទាំងអស់នោះ ក្នុងការបំពេញចិត្តអតិថិជន»។
កម្មវិធី Fixh.me បានធ្វើឲ្យក្រុមរបស់លោកឈ្នះទឹកប្រាក់ ៤ ពាន់ដុល្លារ ពី SmartStart Cycle 2 និងជាប់ជយលាភីលេខ ២ Startupper of the Year ឆ្នាំ ២០១៨-២០១៩ ពី Total ចំនួន ៩ ០០០ដុល្លារ។
ក្រុមយុវជនជានិស្សិតរៀនពេញម៉ោង ក៏ជួបការលំបាកក្នុងការបែងចែកពេលវេលា បទពិសោធតិចតួចក្នុងការសរសេរកូដ និងការធ្វើអាជីវកម្ម ដែលទាមទារការស្រាវជ្រាវច្រើន និងសួរនាំមនុស្សជាច្រើន។
លោក តេង ស៊ាវប៉ោ បានបញ្ជាក់ថា៖ «ផែនការបន្ទាប់របស់ពួកយើង គឺពង្រីកកម្មវិធីនេះបន្ថែមទៀត ដើម្បីឲ្យអ្នករាល់គ្នាដឹងអំពីយើង និងប្រើប្រាស់សេវាកម្មរបស់យើងកាន់តែច្រើន។ សម្រាប់ពេលនេះយើងក៏មានគម្រោងក្នុងការដាក់កម្មវិធីរបស់យើងនៅលើកម្មវិធីទូរស័ព្ទដៃផងដែរ»៕