.jpg)
Robot One សមិទ្ធផលមនុស្សយន្តដែលត្រូវបានច្នៃពីម៉ូតូហុងដាចាស់ៗ។ រូបថត AFP
ក្រុងហាណូយ៖ លើសពីចំណីចក្ខុចំពោះការទស្សនាតួអង្គគំនូរជីវចលយកលំនាំតាមមនុស្សយន្ដ «Transformers» វាថែមទាំងអាចនិយាយភាសាវៀតណាម និងត្រូវបានផលិតឡើងពីគ្រឿងបន្លាស់ម៉ូតូផងដែរ។
រ៉ូបូតយក្ស Robot One និយាយពេលវាដើរចុះដើរឡើងក្នុងរោងជាងក្រុងហាណូយថា៖ «សួស្ដីអ្នករាល់គ្នា! ខ្ញុំមកពីប្រទេស វៀតណាម»។
ក្រុមការងារផ្នែក IT Programe និងនិស្សិតបាននិយាយថា ពួកគេចង់ផ្សព្វផ្សាយអំពីបញ្ហាគ្រឿងបន្លាស់ម៉ូតូបោះចោលពេញទីក្រុងហាណូយ ជាទីដែលអ្នកជិះម៉ូតូជិត ៦ លាននាក់ ធ្វើចរាចរណ៍លើដងផ្លូវរៀងរាល់ថ្ងៃ។
មន្ដ្រីក្រុងហាណូយ បានប្ដេជ្ញាកាលពីឆ្នាំ ២០១៧ នឹងហាមឃាត់ការជិះម៉ូតូក្នុងទីក្រុងនៅមុនឆ្នាំ ២០៣០ ដើម្បីកាត់បន្ថយការបំពុលបរិស្ថាន និងសម្រួលចរាចរណ៍កកស្ទះខ្លាំង។
និស្សិតវិស្វករទើបបញ្ចប់ការសិក្សា ដូ ដាញ់ផុង ជាសមាជិកក្រុម Robot Bank ក្រៅផ្លូវការបាននិយាយថា៖ «ក្រុមរបស់យើងបានផលិតរ៉ូបូតក្នុងបំណងបញ្ជូនសារទៅមនុស្សគ្រប់រូប ឲ្យនាំគ្នាចេះការពារបរិស្ថាន»។
យកលំនាំតាមតួអង្គភាពយន្ដមនុស្សយន្ដហូលីវូដ ដែលរកចំណូលបានរាប់លានដុល្លារ «Transformers» Robot One ត្រូវបានច្នៃឡើងពីគ្រឿងបន្លាស់ម៉ូតូរបស់យីហោជប៉ុន Honda និងយីហោតៃវ៉ាន់ SYM។
ទម្ងន់ ១០០ គីឡូក្រាម និងកម្ពស់ ៣ ម៉ែត្រ Robot One ត្រូវបានគ្រប់គ្រងដោយដៃបញ្ជា PlayStation អាចធ្វើចលនាបែបធម្មតា និងនិយាយឃ្លោងឃ្លាសាមញ្ញមួយចំនួន។
ក្រុមអ្នកផលិតត្រូវរើកកាយដើម្បីរកគ្រឿងបន្លាស់ចាស់ៗមកផ្គុំឲ្យក្លាយជាគ្រោងឆ្អឹងមនុស្សយន្ដ។ Robot One ជាសមិទ្ធផលដំបូងក្នុងចំណោមគម្រោងជាច្រើននៃក្ដីស្រមៃបង្កើតឧទ្យានរ៉ូបូតក្នុងទីក្រុងហាណូយនាពេលណាមួយ៕ AFP/HR
