ក្រុងតូក្យូ: ជាមួយបង្គន់វៃឆ្លាតរបស់ជប៉ុនកំពុងទទួលបានប្រជាប្រិយភាពខ្លាំងនៅទូទាំងពិភពលោក ម៉ូដែលចុងក្រោយរាងមូលកន្តុបនេះ Toto Neorest NX2 កាន់តែអស្ចារ្យ។
វាចេះលើកទ្រនាប់បង្គន់ស្វ័យប្រវត្ដិពេលអ្នកមកដល់ ហើយបើអ្នកសិតកម្មវិធី វាអាចកម្ដៅទ្រនាប់បង្គន់ឲ្យអង្គុយស្រួលខ្លួនថែមទៀត។
ពេលរួចរាល់កិច្ចការហើយ អ្នកមិនចាំបាច់ប្រើក្រដាសបង្គន់ដើម្បីសម្អាតបាតក្រោមឡើយ ពីព្រោះវានឹងជួយសព្វកិច្ចការទាំងនេះជាមួយការបញ្ចេញទឹកបាញ់សម្អាតល្មម។ ពេលក្រោកឡើងដែលនៅសេសសល់ទឹកប្រឡូកប្រឡាក់ បង្គន់វៃឆ្លាតក៏អាចសម្ងួតបានដោយស្វ័យប្រវត្ដិ។
ប្រព័ន្ធបង្ហូរទឹក «Tornado Flush» របស់ Toto ត្រូវបានឌីហ្សាញរូបរាងថ្មីទាំងស្រុង ដែលមិនត្រឹមតែមានប្រសិទ្ធភាពខ្ពស់ក្នុងការកម្ចាត់កាកសំណល់ពីចានបង្គន់ប៉ុណ្ណោះទេ ប៉ុន្ដែថែមទាំងសម្អាតផ្ទៃខាងលើផងដែរ។
NX2 ប្រើប្រព័ន្ធ eWater+ ដែលតភ្ជាប់បណ្ដាញទឹកជាមួយបរិក្ខារសម្អាត និងសម្លាប់បាក់តេរី ហើយបើវានៅតែមិនទាន់អាចសម្អាតល្អឥតខ្ចោះបាន បច្ចេកវិទ្យាពន្លឺ UV Actilight ប្រាកដជាមានប្រសិទ្ធភាព។ អ្នកមិនចាំបាច់សម្អាតអ្វីទាំងអស់។ អ្នកក៏មិនចាំបាច់កាន់គម្របបង្គន់ ខណៈវាបើកបិទស្វ័យប្រវត្ដិ អាស្រ័យទៅតាមជំហានដើរចូល និងចេញរបស់អ្នក។
ប៉ុន្ដែបង្គន់វៃឆ្លាតដ៏មានគុណប្រយោជន៍បំផុតរបស់ពិភពលោកនេះមិនមានតម្លៃថោកនោះទេ។ យ៉ាងតិច អ្នកត្រូវចំណាយប្រាក់ ១១០០០ ដុល្លារ ពេលវាបង្ហាញវត្ដមានលើទីផ្សារអាមេរិក ក្នុងរដូវក្ដៅនេះ៕HR