.jpg)
រថយន្តរបស់លោក Wiebe Wakker ឈ្មោះថា The Blue Bandit។ រូបថត AFP
ក្រុងស៊ីដនី: បុរសហូឡង់ម្នាក់បានបញ្ចប់ដំណើរផ្សងព្រេងលើចម្ងាយផ្លូវ ៩៥០០០ គីឡូម៉ែត្រតាមរយៈរថយន្ដអគ្គិសនីក្នុងទីក្រុងស៊ីដនីកាលពីចុងសប្ដាហ៍ ដើម្បីបញ្ជាក់ពីសមត្ថភាពប្រភេទរថយន្ដអគ្គិសនីនេះពុះពារឧបសគ្គបម្រែបម្រួលអាកាសធាតុ។
លោក Wiebe Wakker បានបើកបរធុនតូចប្រភេទបរិវេណក្រោយធំទូលាយច្នៃពិសេសដោយដាក់ឈ្មោះ «The Blue Bandit» បានបរឆ្លងកាត់ ៣៣ ប្រទេសនូវអ្វីដែលលោកបាននិយាយថា វាជាដំណើរដ៏វែងឆ្ងាយបំផុតក្នុងលោកដោយប្រើរថយន្ដអគ្គិសនី។
ដំណើរពីប្រទេសហូឡង់ទៅកាន់អូស្ដ្រាលីចំណាយពេលតែជាង ៣ ឆ្នាំ និងត្រូវបានផ្ដល់មូលនិធិដោយម្ចាស់ជំនួយសាធារណៈមកពីជុំវិញពិភពលោក រួមទាំងអគ្គិសនីសម្រាប់សាកអាគុយ Bandit អាហារ និងទីស្នាក់អាស្រ័យ។
លោក Wakker ចតរថយន្តនៅភ្នំថ្មដ៏ល្បីល្បាញនៅប្រទេសអូស្ត្រាលី។ រូបថត AFP
លោក Wakker បានបើកបរឆ្លងកាត់ប្រទេសជាច្រើន និងបរិស្ថានអាកាសធាតុខុសៗគ្នារួមមាន តួកគី អ៊ីរ៉ង់ ឥណ្ឌា មីយ៉ាន់ម៉ា ម៉ាឡេស៊ី និងឥណ្ឌូនេស៊ី យោងតាមផែនទីលើវេបសាយ។
លោកបានបន្ដថា៖ «ខ្ញុំចង់ផ្លាស់ប្ដូរផ្នត់គំនិតមនុស្ស និងលើកទឹកចិត្ដឲ្យពួកគេចាប់ផ្ដើមបើកបររថយន្ដអគ្គិសនីដោយបង្ហាញពីគុណប្រយោជន៍ផ្នែកចីរភាពបរិស្ថាន។ បើបុរសម្នាក់អាចបើកបរឆ្លងកាត់ផ្នែកម្ខាងទៀតនៃពិភពលោកតាមរយៈអគ្គិសនី អ៊ីចឹងរថយន្ដអគ្គិសនីគួរតែអាចប្រើក្នុងជីវភាពប្រចាំបានយ៉ាងងាយ»។
លោក Wakker បាននិយាយថាមុនពេលរថយន្ដនេះកែមកប្រើអគ្គិសនី វានឹងប្រើសាំង ៦៧៨៥ លីត្រ ដើម្បីបញ្ចប់ដំណើរនេះ។
សម្រាប់យានជំនិះរបស់លោក រថយន្ដអគ្គិសនីនេះអាចធ្វើដំណើរលើចម្ងាយផ្លូវ ២០០ គីឡូម៉ែត្រក្នុងពេលសាកភ្លើងម្ដងដោយលោក Wakker បានឲ្យដឹងថា លោកបានចំណាយប្រាក់ ៣០០ ដុល្លារកើការសាកថាមពលរថយន្ដ ដោយភាគច្រើនជាតំបន់វាលខ្សាច់ដាច់ស្រយាល Outback of Australia៕ HR
