ក្រុងញូវយ៉ក: ស្ថិតក្នុងការិយាល័យដ៏អ៊ូអរ ម៉ាស Bolx-Vox អាចជួយធានាមិនឲ្យកិច្ចសន្ទនាតាមទូរស័ព្ទ អ្នកលេចឮទៅនរណាម្នាក់ឡើយ។
ជាគំនិតផ្ដួចផ្ដើមរបស់លោក ក្រេក អាមហូហ្វើ អ្នកឯកទេសបច្ចេកវិទ្យាហិរញ្ញវត្ថុ ម៉ាស BolxVox ត្រូវបានស្ថាបនិករូបនេះចាត់ទុកថា ជាដំណោះស្រាយរក្សាភាពឯកជន និងការសម្ងាត់ នៅក្នុងការិយាល័យមានបុគ្គលិកច្រើន ដោយអ្នកលើកទូរស័ព្ទមិនចាំបាច់ងើបពីតុធ្វើការ ហើយដើរទៅរកកន្លែងស្ងាត់ដើម្បីនិយាយគ្នាឡើយ។
ស្ថាបនិកម៉ាស BolxVox ដែលបានដាក់ពាក្យប្រមូលការគាំទ្រមូលនិធិផលិត តាមរយៈវេបសាយ Kickstarter រូបនេះ បានលើកឡើងថា៖ «ក្រោយពីផលិត ម៉ាសគំរូអស់ប្រមាណ ៧៥ ផលិតផល និងធ្វើតេស្ត កែខៃឡើងវិញម្ដងហើយម្ដងទៀត ខ្ញុំពិតជារំភើបណាស់ក្នុងការបង្ហាញដំណោះស្រាយនឹងបញ្ហាក្នុងការិយាល័យ»។
ម៉ាស BolxVox ធានាថាអាចរក្សាសម្ដីសន្ទនារបស់អ្នក មិនឲ្យហូរចូលត្រចៀកជនទី ៣ ដោយអ្នកប្រើប្រាស់គ្រាន់តែគ្របវាលើមាត់ រួចបំពាក់ខ្សែលើក្បាលជាការស្រេច។ តែចំណុចអវិជ្ជមានម្យ៉ាងរបស់វា គឺរូបរាងមិនសូវទាក់ទាញ ដែលស្រដៀងទៅនឹងច្រមុះគោ។
ស្ថាបនិក ក្រេក អាមហូហ្វើ រំពឹងថា នឹងអាចកៀរគរថវិកាគាំទ្រ ២៥០០០ ដុល្លារលើវេបសាយ Kickstarter ដើម្បីសម្រេចគម្រោងផលិត ម៉ាស BolxVox លក់លើទីផ្សារ។
អតិថិជន ដែលហ៊ានបោះទុនកុម្ម៉ង់ ម៉ាស BolxVox នៅពេលនេះអាចចំណាយត្រឹមតែ ៥០ ដុល្លារ ប៉ុន្តែនៅពេលវាចេញលក់លើទីផ្សារ តម្លៃវានឹងហក់ដល់ ១០០ ដុល្លារ៕