.jpg)
ម៉ូតូរពីង ១៥ ម៉ឺនដុល្លារអាចហោះកម្ពស់ប្រមាណ ៥ ម៉ែត្រពីដី។
ក្រុងម៉ូស្គូ: មើលទៅគួរឲ្យស្រៀវសាច់ និងហោះម្ដងមិនលើសពីកន្លះម៉ោងនោះទេ។ ប៉ុន្ដែក្រុមហ៊ុនរុស្ស៊ី Hoversurf បានបើកឲ្យកុម្ម៉ង់ទុកសម្រាប់ម៉ូដែលម៉ូតូរពីងហោះ Scorpion Hoverbike។
ម៉ូតូហោះ ដែលត្រូវបានលក់ឲ្យកងកម្លាំងប៉ូលិសឌូបៃរួចហើយនោះ ត្រូវបានឌីហ្សាញឡើងវិញជាមួយអាគុយ និងគ្រោងជ័រក្រែបកាបូន។
ម៉ូតូហោះមានទម្ងន់ ១១៤ គីឡូក្រាម ដែលមានសមត្ថភាពហោះផុតពីដី ៥ ម៉ែត្រ និងសម្ទុះល្បឿន ៩៦ គីឡូម៉ែត្រក្នុង ១ ម៉ោង ទោះវាត្រូវបានច្បាប់ប្រទេសនីមួយៗកំណត់ល្បឿនខុសៗគ្នាក្តី។
ម៉ូតូរពីង ក៏ត្រូវបានធ្វើបច្ចុប្បន្នភាពជាមួយអាគុយម៉ាញ៉េទិចកូនកាត់ ដែលអាចហោះពីចន្លោះ ១០ ទៅ ២៥ នាទីអាស្រ័យលើអាកាសធាតុ និងទម្ងន់អ្នកបើកបរ។
នៅមានតេឡេបញ្ជាដ្រូនហោះ ដែលមានសមត្ថភាពហោះរហូតដល់ ៤០ នាទីថែមទៀត។ ក្រុមហ៊ុនបានអះអាងថា៖ «ទំហំខ្នាតរបស់ម៉ូតូរពីង អនុញ្ញាតឲ្យវាអាចបត់បែនស្លាបទ្វារ មានសមត្ថភាពហោះហើរ និងចុះចតនៅលើចំណតរថយន្ដធម្មតាបាន»។
អតិថិជនអាចកុម្ម៉ង់ទិញ HoverbikeS3 2019 ជាមួយតម្លៃកក់ ១ ម៉ឺនដុល្លារ ខណៈតម្លៃពេញរបស់វា ១៥ ម៉ឺនដុល្លារ ហើយការដឹកជញ្ជូនគ្រោងនឹងចាប់ផ្ដើមនូវរយៈពេលពី ២ ទៅ ៦ ខែទៀតចាប់ពីថ្ងៃបញ្ជាទិញ។
ក្រុមហ៊ុនបន្ដថា៖ «កម្រិតហោះហើរសុវត្ថិភាពរបស់យើងគឺ ៥ ម៉ែត្រលើដី តែអ្នកបើកបរខ្លួនឯងអាចកែសម្រួលកម្ពស់ទៅតាមកម្រិតផាសុកភាពរបស់ខ្លួន»។
ម៉ូតូរពីង ត្រូវបានឆ្លងកាត់រដ្ឋបាលអាកាសចរណ៍សហព័ន្ធអាមេរិក ដែលត្រូវបានផ្ដល់សិទ្ធិស្របច្បាប់ចំពោះការហោះហើរសម្រាប់អ្នកបើកបរដោយមិនចាំបាច់មានអាជ្ញាប័ណ្ណអាកាសចរណ៍៕HR
