.jpg)
យន្តហោះ ហោះបានតែ ១៦០គីឡូម៉ែត្រចំពោះការសាកថាមពលម្ដង។ រូបថត AFP
ក្រុងវ៉ានខូវើរ៖ យន្ដហោះពាណិជ្ជកម្មអគ្គិសនីសុទ្ធជាលើកដំបូងក្នុងលោក បានបើកបរសម្ពោធជាផ្លូវការកាលពីថ្ងៃអង្គារ ដោយចេញដំណើរពីទីក្រុងវ៉ានខូវើរ របស់កាណាដា និងបានផ្ដល់ក្ដីសង្ឃឹមថា ថ្ងៃណាមួយយាន្ដនេះអាចបញ្ឈប់បញ្ហាបំពុលបរិស្ថាន។
លោក Roei Ganzarski នាយកប្រតិបត្ដិក្រុមហ៊ុនវិស្វកម្ម magniX មូលដ្ឋាននៅក្រុង Seattle បាននិយាយថា៖ «នេះសបញ្ជាក់ថា យានពាណិជ្ជកម្មក្នុងទម្រង់ថាមពលអគ្គិសនីទាំងស្រុងអាចដំណើរការបាន»។
ក្រុមហ៊ុនបានឌីហ្សាញម៉ូទ័រយន្ដហោះ និងសហការជាមួយដៃគូ Harbour Air ដែលដឹកជញ្ជូនអ្នកដំណើរកន្លះលាននាក់ក្នុង ១ ឆ្នាំ រវាងទីក្រុងវ៉ានខូវើរ រីសត Whistler ski និងប្រជុំកោះក្បែរខាង ព្រមទាំងសហគមន៍ឆ្នេរនានា។
ការហោះហើរ ១៥ នាទីអាចជំនួសការបើកបររថយន្តជាង ១ ម៉ោង។ រូបថត AFP
ហ្គាន់ហ្សាស្គី និយាយថា បច្ចេកវិទ្យាអាចជួយសន្សំសំចៃការចំណាយលើសេវាយន្ដហោះ ដោយមិនទាន់គិតដល់បញ្ហាបំពុលបរិស្ថានផង។
លោកបានប្រាប់អ្នកសារព័ត៌មានថា៖ «នេះជាសករាជនៃការចាប់ផ្ដើមរជ្ជកាលយន្ដហោះអគ្គិសនី»។
អាកាសចរណ៍ស៊ីវិល គឺជាប្រភពបញ្ចេញឧស្ម័នកាបោនដ៏ច្រើនបំផុតមួយ ខណៈមនុស្សនាំគ្នាធ្វើដំណើរលើអាកាសច្រើន ហើយបច្ចេកវិទ្យាថ្មីៗហាក់នៅតែមានសម្ទុះយឺតយ៉ាវចំពោះការចេញដំណើរពីដី។
យ៉ាងណាមិញ Harbour Air នឹងត្រូវរង់ចាំយ៉ាងហោច ២ ឆ្នាំ មុនពេលវាចាប់ផ្ដើមបំពាក់ថាមពលអគ្គិសនីលើយន្ដហោះឆ្លងសមុទ្រជាង ៤០ គ្រឿង៕ AFP/HR
