ក្រុងហ្សឺណែវ: នៅពិព័រណ៍រថយន្ដក្រុងហ្សឺណែវ រថយន្ដស្ព័រថ្មីៗ Renault ក៏មិនភ្លេចសម្ញែងរាងរៅខ្លួនទាំងគ្មានមនុស្សបើករបស់ខ្លួនផងដែរ។
Renault EZ-GO ជារថយន្ដអគ្គិសនីស្វ័យប្រវត្ដិ ដែលមនុស្សអាចសម្រាកឲ្យស្រួលខ្លួនក្នុងបន្ទប់ផ្ទុកអ្នកដំណើររហូតដល់ ៦ នាក់។
រថយន្ត EZ-GO រំពឹងថា ការផ្ដល់សេវាកម្មដឹកអ្នកដំណើរតាមរយៈកម្មវិធីទូរស័ព្ទ តែក៏សំចតអចិន្រ្ដៃយ៍នៅតាមស្ថានីយទូទាំងទីក្រុងផងដែរ។
វាមានសមត្ថភាពបើកបរស្វ័យប្រវត្ដិ កម្រិតទី ។ មានន័យថា វាអាចផ្លាស់ប្ដូរគន្លងផ្លូវ បត់នៅចំណុចប្រសព្វ និងគ្រប់គ្រងគម្លាតចម្ងាយពីរថយន្ដនៅខាងមុខថែមទៀត។
រថយន្ដនេះរចនាឡើងជារាងសម្បុកកូននាង រលោងស្រិល ដែលក្រុមហ៊ុន Renault បានឲ្យដឹងថា វាត្រូវបានឌីហ្សាញឲ្យស័ក្ដិសមនឹងភ្នែកសេនស័រស្វ័យប្រវត្ដិ។
អ្នកដំណើរចូលតាមគូទក្រោយទៅផ្នែកខាងមុខ ហើយរថយន្ដនឹងបញ្ចេញពន្លឺដើម្បីបង្ហាញទីតាំងកម្រាលជម្រាលដែលងាយស្រួលឡើងចុះ។
កៅអីត្រូវបានរៀបចំជារាងអក្សរ «U» អ្នកដំណើរអាចឃើញមុខគ្នាទាំងអស់ ដែលធ្វើឲ្យរថយន្ដនេះ ក្លាយជាវេទិកាទំនាក់ទំនងសង្គមថែមទៀត។
ដើម្បីសម្រួលដល់ការធ្វើដំណើរមិនរើសអើសជនចាស់ជរា ពិការ កុមារ ឬអ្នកប្រើរទេះ រថយន្ដ EZ-GO ក្នុងក្ដីស្រមៃនេះបំពាក់ដំបូលកញ្ចក់ ហើយភ្ញៀវអ្នកជិះ មិនថា ដើរ ឬជិះរទេះ ងាយស្រួលឡើងចុះតាមកម្រាលជម្រាល។
ក្រុមហ៊ុន Renault បន្ដថា ម៉ូដែលនេះមានល្បឿនកំណត់ត្រឹម ៥០ គីឡូម៉ែត្រ ក្នុងមួយម៉ោង និងអាចបំផ្លាស់ទីទៅកាន់កន្លែងសុវត្ថិភាពពេលមានឧប្បត្ដិហេតុគ្រោះថ្នាក់កើតឡើងក្បែរនោះ មិនថាតែវាជាអ្នកបង្ក ឬតាមរយៈទំនាក់ទំនងជាមួយទីបញ្ជា។
រថយន្ត EZ-GO បំពាក់នូវបច្ចេកវិទ្យាថាមពលបង្វិលកង់ទាំង ៤ 4CONTROL។ ក្រុមហ៊ុន Renault នឹងផ្ដោតលើតម្លៃដែលថ្លៃជាងឡានក្រុង តែថោកជាងរថយន្ដតាក់ស៊ីក្រុមហ៊ុន Uber ឬ Grab ជាដើម។
លោក Thierry Bollore នាយកប្រតិបត្ដិក្រុមហ៊ុន បានឲ្យដឹងក្នុងសេចក្ដីថ្លែងការណ៍មួយថា៖ «សេវាកម្មរថយន្ដឈ្នួល ជិះរួមនេះតំណាងឲ្យឱកាសដ៏សំខាន់សម្រាប់ក្រុមហ៊ុន Renault ជាពិសេស តាមកណ្ដាលក្រុងនានា។ ពលរដ្ឋខ្លះ មានវ័យចំណាស់ ឬក្មេងពេក និងភ្លក្សបទពិសោធធ្វើដំណើរថ្មីនេះ»។
រថយន្ដតាក់ស៊ីអគ្គិសនីនេះ អាចត្រូវបានប្រើទាំងសេវាកម្មសាធារណៈ និងឯកជន។ ក្រុមហ៊ុន Renault ថា ខ្លួននឹងដាក់លក់រថយន្ដរ៉ូបូត EZ-GO ដំបូងក្នុងឆ្នាំ ២០២២៕HR