.jpg)
ដើម្បីជំនួយប្រសិទ្ធភាពនៃការបញ្ចេញពោងខាងក្រៅ រថយន្តក៏តម្រូវឲ្យមានបំពាក់នូវសិនស័រ។ រូបថត ZF
ក្រុងប៊ែរឡាំង: ពោងសុវត្ថិភាពក្រៅរថយន្ដដែលបំពាក់សម្រាប់ការប៉ះទង្គិចចំហៀងអាចជាបច្ចេកវិទ្យានាពេលអនាគត បើគម្រោងក្រុមហ៊ុនអាល្លឺម៉ង់មួយរំលេចរូបរាង។
ពោងសុវត្ថិភាពនឹងប៉ោងឡើងភ្លាមៗមុនពេលបុកប៉ះទង្គិចនៅផ្នែកចំហៀងរថយន្ដ ដោយផ្អែកលើបច្ចេកវិទ្យាសេនស័រការពារទាំងផ្នែកខាងមុខ និងខាងក្រោយរបស់អ្នកដំណើរ។
ក្រុមហ៊ុនបានឲ្យដឹងថាការធ្វើតេស្ដសាកល្បងបានបង្ហាញថា បច្ចេកវិទ្យានេះអាចកាត់បន្ថយគ្រោះថ្នាក់រងរបួសធ្ងន់ធ្ងរចំពោះអ្នកដំណើររហូតដល់ ៤០ ភាគរយ។
ពោងសុវត្ថិភាពផ្នែកខាងក្រៅត្រូវបានចាត់ទុកជាបរិក្ខារសុវត្ថិភាពសម្រាប់នាពេលអនាគត តែក្រុមហ៊ុនគ្រឿងបន្លាស់រថយន្ដ ZF Friedrichshafen (ZF) នៅភាគនិរតីប្រទេសអាល្លឺម៉ង់ ពេលនេះបានផលិតផលិតផលសម្រេចឲ្យក្រុមហ៊ុនរថយន្ដ និងធ្វើតេស្តរួចហើយ។
ZF បានអភិវឌ្ឍប្រព័ន្ធមួយដែលប្រើបច្ចេកវិទ្យាសេនស័រអេឡិចត្រូនិក ដើម្បីវិភាគទិន្នន័យ និងទស្សន៍ទាយពេលអាចកើតមានឧប្បត្ដិហេតុចៃដន្យ។ ពោងសុវត្ថិភាពចំហៀងស្ថិតនៅក្នុងកៅអីរបស់រថយន្ដ និងបំពាក់ភ្ជាប់ជាមួយតួកៅអី។
រូបភាពពីការពិសោធបុករថយន្តដែលបំពាក់ពោងខាងក្រៅ។ រូបថត ZF
យោងតាម ZF បានឲ្យដឹងថា មិនដូចជាពោងផ្នែកខាងមុខដែលពឹងអាស្រ័យលើកម្លាំងប៉ះទង្គិចទើបប៉ោងឡើង ពោងខាងក្រៅផ្លុំប៉ោងឡើងភ្លាមៗមុនពេលប៉ះទង្គិចដើម្បីផ្ដល់សុវត្ថិភាពកាន់តែល្អ។
ប្រព័ន្ធនេះបានប្រើបច្ចេកវិទ្យា ឬ សេនស័រទស្សន៍ទាយពីការប៉ះទង្គិចត្រឹមត្រូវគួរឲ្យជឿជាក់ជាអ្វីដែលធ្លាប់តែជាឧបសគ្គក្នុងការអភិវឌ្ឍកន្លងមក។
វេជ្ជបណ្ឌិត មីឆែល បាកស្ន័រ ប្រធានផ្នែកប្រព័ន្ធសុវត្ថិភាពអកម្មរបស់ក្រុមហ៊ុន ZF បាននិយាយថា៖ «ប្រព័ន្ធសុវត្ថិភាពនេះពិតជាល្អ សម្រាប់បំពាក់លើរថយន្ដស្វ័យប្រវត្ដិ និងការបើកបរស្វ័យប្រវត្ដិ»។
រថយន្ដនាថ្ងៃអនាគតនេះក៏បានប្រើសេនស័រប្លែកៗជាច្រើនរួមទាំង រ៉ាដា កាមេរ៉ា និងលីដា ដើម្បីការពារពីផលប៉ះពាល់ផងដែរ។
គោលបំណងចម្បងនៃការបង្កើតប្រព័ន្ធនេះគឺការពារអ្នកដំណើរក្នុងរថយន្ដពីគ្រប់ជ្រុងជាជាងគ្រាន់តែផ្នែកខាងមុខតាមរយៈការបំពាក់តែពោងដៃចង្កូតនោះឡើយ។
ដើម្បីបង្កើនសមត្ថភាព ក្រុមហ៊ុនបានផលិតពោងការពារជាច្រើនទៀតដែលស្ថិតនៅចន្លោះកៅអី និងក្រោមកៅអី។ ពោងវាំងនន និងពោងខ្យល់ចំហៀង ត្រូវបានបំពាក់ដើម្បីការពារអ្នកដំណើរ និងបញ្ចៀសការផ្លោងខ្ទាតពីរថយន្ដ ក្នុងករណីក្រឡាប់ផងដែរ៕ HR
