ក្រុងឡុងដ៍: យានកន្តុបសំណព្វចិត្តរបស់កីឡាករប្រឡាំងរថយន្ត F1 និងតារាចម្រៀងក្រុម Spice Girl រថយន្ត Renault Twizy បានបង្ហាញវត្តមានបើកបរស្របច្បាប់ចរាចរណ៍ផ្លូវគោក នៅទីក្រុងឡុងដ៍ ប្រទេសអង់គ្លេស ។
ជាការពិតណាស់ Renault Twizy គឺជារថយន្តសម្រាប់ពលរដ្ឋទីក្រុង ជាពិសេសគឺអ្នកនៅលីវតែម្ដង។ ជាមួយតម្លៃ ៩៤៥៣ ដុល្លារ រថយន្តនេះមានតែ ២ កៅអី និងបិទជិត ដោយមិនមានបង្អួចឡើយ។ វាអាចបើកបរបានក្នុងកម្រិតល្បឿនកំពូល ៨០ គីឡូម៉ែត្រក្នុងមួយម៉ោង។ ពោលគឺជាល្បឿនល្មមសម្រាប់ផ្លូវក្នុងទីក្រុងទំនើប និងហាយវ៉េ។
រចនាជារាងកន្តុបទម្ងន់ស្រាលត្រឹមតែ ៤៧៤ គីឡូក្រាម រថយន្តនេះមានប្រវែង ២,៣៣ ម៉ែត្រ ទទឹង ១,៣៤ ម៉ែត្រ និងកម្ពស់ ១,៤៥ ម៉ែត្រ។
រថយន្តនេះ បំពាក់ដោយម៉ូទ័រអគ្គិសនី និងថាមពលថ្មលីតទីញ៉ូមអ៊ីយ៉ុង 6.1kWh កម្លាំង 17bh ចលនារុញដោយកង់ក្រោយ។ ក្រុមហ៊ុនបានអះអាងថា សម្រាប់ការបញ្ចូលថាមពលពេញ វាអាចធ្វើដំណើរបានចម្ងាយផ្លូវ ១០០ គីឡូម៉ែត្រ។ វាជារថយន្តបៃតង ដោយមិនមានបញ្ចេញឧស្ម័នប៉ះពាល់បរិស្ថានឡើយ។
សរុបមក វាគឺជារថយន្តដែលផ្ដល់ការសប្បាយក្នុងការបើកបរនៅទីក្រុង។ បើទោះជាវារាងចង្អៀត មិនអំណោយផលដល់ការផ្ទុកអីវ៉ាន់ ប៉ុន្តែវាងាយស្រួលជ្រកជ្រៀតតាមផ្លូវតូច។
អ្នកប្រាថ្នារថយន្តនេះ អាចទាមទារពេលវេលា ក្នុងការសម្របខ្លួនបន្តិច ដោយសារតែរថយន្តនេះមិនសូវជាស្ទុះ ហើយមិនមានបង្អួចសម្រាប់ស្រូបខ្យល់អាកាសពេលកំពុងបើកបរ៕