ភ្នំពេញ : ថ្វីដ្បិតតែរថយន្តស៊េរីថ្មីៗគឺជាក្ដីស្រមៃរបស់មនុស្សស្ទើរគ្រប់រូប ប៉ុន្តែរថយន្តចំណាស់ដែលសឹងក្លាយជាវត្ថុបុរាណនោះក៏ត្រូវបានគេចាប់អារម្មណ៍រក្សាទុកតាំងលម្អ ឬធ្វើជាយានសម្រាប់ដឹកភ្ញៀវដែលមានមនោសញ្ចេតនាដិតជាប់នឹងសម័យកាលមុនផងដែរ។
ដូចជារថយន្ត Citroen ស៊េរីឆ្នាំ១៩២៧, ១៩២៨ និង១៩៣១ ត្រូវបានសណ្ឋាគារវិចតូរៀអង្គរ ប្រើប្រាស់សម្រាប់ដឹកភ្ញៀវពីអាកាសយានដ្ឋាន និងនាំពួកគេទៅកម្សាន្តនៅខេត្តសៀមរាប។
ដោយឡែក នៅរាជធានីភ្នំពេញម្ដុំសង្កាត់បឹងកេងកង១ ត្រង់វិថី៣៥២ រថយន្តVolkswagen Beetle ពណ៌សក្បុសមួយគ្រឿងដែលចតមុខសណ្ឋាគារLeBlancនោះក៏ត្រូវបានប្រើប្រាស់ក្នុងតួនាទីស្រដៀងនេះដែរ។
រថយន្តអណ្ដើកស៊េរីឆ្នាំ១៩៦០មួយគ្រឿងនេះមិនត្រឹមតែជាយានដឹកភ្ញៀវប៉ុណ្ណោះទេ វាក៏បន្ថែមភាពទាក់ទាញដល់សណ្ឋាគារនោះទៀតផង។
កញ្ញា វណ្ណាស៊ី សូវីវីន នាយកគ្រប់គ្រងLeBlancថ្លែងថា៖ «បច្ចុប្បន្នមនុស្សភាគច្រើនចាប់អារម្មណ៍ទៅលើរបស់បុរាណ។ ពេលដែលដាក់ឡាននេះនៅពីមុខសណ្ឋាគារម៉ូដទំនើបយើងទៅគឺវាពិតជាទាក់ទាញពីភ្ញៀវមកស្នាក់នៅ និងអ្នកដែលជិះកាត់កន្លែងយើងផងដែរ»។
កញ្ញាបានបង្ហើបឲ្យដឹងផងដែរថា រថយន្តអាយុ៥ទសវត្សរ៍មួយនេះត្រូវបានទិញក្នុងតម្លៃ៦០០០ដុល្លារ។
កញ្ញាបានរៀបរាប់ទៀតថា៖ «ពេលដែលទិញមកភ្លាមសភាពខាងក្រៅ និងក្នុងឡានពិតជាចាស់មែនទែនក៏ប៉ុន្តែម៉ាស៊ីនវាអាចប្រើប្រាស់បាន។ យើងបានយកឡាននេះមកប៉ូលាបាញ់ថ្នាំសាជាថ្មីរចនាជាlogoរបស់សណ្ឋាគារដេរពូកថ្មីនិងដាក់ម៉ាញ៉េដោយរក្សាទ្រង់ទ្រាយដើមនៅដដែល។ការជួសជុលទាំងអស់គឺចំណាយជាង១០០០ដុល្លារទៀត។»
រថយន្តមួយនេះគឺសម្រាប់ដឹកភ្ញៀវមកស្នាក់នៅសណ្ឋាគារ និងជូនភ្ញៀវទាំងនោះដើរកម្សាន្តជិតក្រុង។
កញ្ញាបានថ្លែងទៀតថា៖ «ក្រៅពីការដឹកភ្ញៀវយើងក៏បានចតរថយន្តនេះនៅពីមុខសណ្ឋាគារសម្រាប់ជាគ្រឿងលម្អមួយផងដែរពីព្រោះពេលភ្ញៀវគាត់ចូលមកគឺគាត់ពេញចិត្តនឹងឡានមួយនេះណាស់អ្នកខ្លះថតរូបជាមួយឡាន និងខ្លះទៀតក៏សាកល្បងជិះផងដែរ»។
ភ្ញៀវដែលចង់ថតរូបអាពាហ៍ពិពាហ៍អនុស្សាវរីយ៍ជាមួយរថយន្តអណ្ដើកសក្បុសអាចជាវកញ្ចប់សេវាពីសណ្ឋាគារ គួបផ្សំនឹងការថតក្នុងបន្ទប់ក្នុងសណ្ឋាគារក្នុងតម្លៃ៧០ដុល្លារ។ ព័ត៌មានបន្ថែមសូមទាក់ទងទៅលេខ ០២៣ ៩៧១ ៩៧១ និង ០២៣ ៩៧២ ៩៧២៕
